Yeesu yónni na juróom ñaar fukki taalibe yi ak ñaar
10
Gannaaw loolu Boroom bi tànn yeneen juróom ñaar fukk taalibe ak ñaar, yónni leen ñaar ak ñaar ngir ñu jiitu ko ci dëkk yépp ak béréb yépp yi mu naroona dem moom ci boppam. 2 Mu ne leen: «Ngóob bi yaatu na waaye liggéeykat yi bariwuñu. Ñaanleen Boroom ngóob bi ngir mu yónni ay liggéeykat ci ngóobam. 3 Demleen! Maa ngi leen di yónni ni ay mbote ci biir bukki. 4 Buleen yóbbu kalpe walla saaku tukki walla dàll te buleen taxaw ci mbedd bi di nuyu kenn. 5 Boo leen duggee ci kër, jëkkleen wax ne: "Na jàmm wàcc ci kër googu," 6 su fa nitu jàmm nekkee, seen jàmm dina wàcc ci moom. Ni ko moy jàmm ji dina dellusi ci yeen. 7 Desleen ci kër googu, lekk te naan lu ñu leen di jox ndaxte liggéeykat bi yelloo na peyooram. Buleen dem kër ak kër di ñaan ngir ñu dalal leen. 8 Boo leen duggee ci dëkk ñu dalal leen, lekkleen lu ñu leen di won, 9 te ngeen wéral ñépp ni nga xamante ne ñoo feebar te nekk fa. Te waxleen ne: "Nguuru Yàlla gi jegesi na leen." 10 Waaye boo leen duggee ci dëkk te nanguwuñu leen, génnleen dem ba ci péncu dëkk bi te ngeen wax leen: 11 "Nu ngi faxas pënd bi takk ci sunuy tànk, ngir mu doon seede ci yeen. Waaye xam leen ne: Nguuru Yàlla gi jegesi na." 12 Maa ngi leen koy wax: Ci bésu àtte bi Sodom dina leen tane.13 «Musiba dal na leen, yeen waa Korasin. Musiba dal na leen, yeen waa Betsayda, ndax kéemaan yu ma def ci yeen su ma ko defoon ci dëkku Tir walla ci dëkku Sidon, kon bu yàgg doon nañu sol ay saaku di xëpp seen bopp dóomu taal ngir wone ne dañu tuub seeni bàkkaar. 14 Looloo tax ci bésu àtte bi, Tir ak Sidon dinañu leen tane. 15 Yeen waa Kapernawum, ndax xalaat ngeen ne dinañu leen yékkëti ba ci kaw asamaan? Déedéet. Dinañu leen wàcce ba fi ñu dee ñi nekk.» 16 Yeesu waxaat taalibeem yi ne: «Ku leen déglu, man la déglu, te ku leen bañ, man la bañ, te ku ma bañ, bañ ki ma yónni.»
17 Bi juróom ñaar fukki taalibe yi ak ñaar dellusee ñu ànd ak bég te wax Yeesu ne: «Boroom bi, bi nu doon woo sa tur, rab yi sax dañu doon déggal.» 18 Yeesu ne leen: «Gis naa Seytaane daanu ci asamaan ni melax di daanoo. 19 Xoolleen! Jox naa leen sañ-sañ ngir ngeen dox ci jaan yi ak ci jiit yi te jox naa leen sañ-sañ ci bépp kàttanu noon bi Seytaane, ba tax dara du leen def lu bon. 20 Maa ngi leen koy wax, buleen bég ndaxte rab yi dañu leen déggal, waaye bégleen ndax seen tur yi ñu bind ci asamaan.»
21 Ci saa si, Xel mu Sell mi feesal Yeesu ak mbégte bu réy. Yeesu ne: «Baay, yaw miy Boroomu asamaan ak suuf, sant naa la ndaxte yaw yaa nëbb yëf yii boroom xam-xam yi ak boroom xel yi, te xamle ko gone yi. Waaw Baay, def nga loolu ndaxte loolu moo la neex. 22 Sama Baay jox na ma lépp. Te kenn xamul Doom bi ku dul Baay bi, te kenn xamul Baay bi ku dul Doom bi ak ki ko Doom bi bëgga xamle.» 23 Noonu mu walbatiku ne taalibe yi kese: «Barkeel ngeen yeen ñi seen bët di gis li ngeen di gis, 24 ndaxte maa ngi leen koy wax: yonent yu bari ak buur yu bari, bëggoon nañu gis li ngeen di gis waaye gisuñu ko, te dégg li ngeen di dégg waaye dégguñu ko.»
Léebu benn waa Samari bu baax
25 Te noonu benn bés amoon na benn jàngalekatu-yoonu-Musaa bu jóg ngir fexe fiir Yeesu. Mu ne ko: «Jàngalekat bi, lan laa wara def ngir am dund gu dul jeex?» 26 Yeesu tontu ko ne: «Lan lañu bind ci yoonu Musaa ak ban jàngat nga ci am?» 27 Mu ne ko: «Nanga bëgg Yàlla sa Boroom ak sa xol bi yépp, sa bakkan bépp, sa kàttan bépp ak sa xel mépp te nga bëgg sa moroom ni nga bëgge sa bopp.» 28 Yeesu ne ko: «Wax nga dëgg. Defal loolu te dinga dund.» 29 Waaye jàngalekatu-yoonu-Musaa bi bëgga jox boppam dëgg, mu ne ko: «Kan mooy sama moroom?»
30 Yeesu tontu ko ne: «Dafa amoon benn waay bu jóge woon Yerusalem ngir dem Yeriko. Bi muy dem ci yoon bi ay bandi dogale ko, futti ko, dóor ko ba mu bëgga dee, bàyyi ko ci yoon bi. 31 Benn jébbalkatu-sarax jaar fa, gis waa ji, teggi ko, dem yoonam. 32 Benn waay bu soqikoo ci giiru Lewi jaar fa, gis waa ji, teggi ko, dem yoonam. 33 Waaye benn waay bu dëkk Samari, bi mu séenee waa ji, mu yërëm ko, 34 jegesi ko, jël diwlin ak biiñ, faj góom yi, lëmës leen, yéegal ko ci mbaamam, yóbbu ko ci bérébu fanaanukaay bi te di ko toppatoo. 35 Ci ëllëg sa, mu yékkëti lu tollook peyooru benn fanu liggéey, jox ko boroom fanaanukaay ba, ne ko: "Toppatool waa ji, te loo ci yokk, bu ma dellusee man, dinaa la ko fey."»
36 Noonu Yeesu laaj jàngalekatu-yoonu-Musaa bi ne: «Kan ci ñett ñooñu moo wone woon ne mooy moroomu waa ji bandi yi dogale woon?» 37 Mu tontu ko ne: «Xanaa ki amoon yërmande ci moom.» Yeesu ne ko: «Demal te nga def ni moom.»
Màrt ak Maryaama dalal nañu Yeesu
38 Yeesu ak taalibe yi doon nañu tukki, dem ba yegg ci benn dëkk, fekk fa benn jigéen bu ñuy wax Màrt. Mu dalal leen ci këram. 39 Amoon na rakkam bu tudd Maryaama. Mu ñëw, toog ci wetu Yeesu di déglu jàngaleem. 40 Màrt féete woon liggéeyu kër gi yépp. Màrt ñëw, ne ko: «Boroom bi, ndax defu la dara, sama rakk bàyyee ma liggéey bi yépp? Ndax doo ko wax mu ñëw jàppale ma?» 41 Boroom bi tontu ko ne ko: «Màrt, Màrt, yaa ngi jaxasoo ak di jaaxle ci mbir yu bari, 42 waaye benn mbir rekk moo am solo, te Maryaama tànn na ko ba noppi, te kenn du ko jël ci moom.»