Ay nit yu bari ñu ngi xumbal duggu Yeesu ci Yerusalem
11
Yeesu ak taalibeem yi jegesi nañu Yerusalem. Bi ñu yegsee dëkku Betfase ak bu Betani ci wetu tund bi ñuy woowe tundu Oliw ya, mu yónni ñaar ci taalibeem yi 2 ne leen: «Demleen ci gox bi nekk ci seen kanam. Su ngeen fa duggee, dingeen fekk benn mbaam bu ndaw bu ñu yeew bu kenn mësula yéeg. Yewwileen ko ngeen andi ko fii, 3 te bu leen kenn laajee: "Lu tax ngeen di def loolu?", neleen ko: "Boroom bi moo ko soxla te léegi mu delloosi ko."» 4 Noonu ñu dem te fekk benn mbaam bu ndaw bu ñu yeew ci wetu benn bunt ci mbedd mi. Ñu yewwi ko. 5 Yenn nit yi nekkoon foofu ne leen: «Lan ngeen di def nii? Lu tax ngeen di yewwi mbaam mi?» 6 Ñu tontu leen ni ko Yeesu waxe woon te ñu bàyyi leen ñu dem. 7 Noonu ñu andil Yeesu mbaam mi te teg seeni yére ci kaw mbaam mi, te Yeesu daldi toog ci kaw. 8 Nit ñu bari di lal seen yére yi ci yoon bi; ñeneen ñi di lal ay caru garab yu naat yu ñu dagge woon ci tool yi. 9 Ñi jiitu woon Yeesu ak ñi ko doon topp di yuuxu naan:«Osaana!
Na Yàlla barkeel kiy ñëw ci turu Boroom bi!
10 Na Yàlla Barkeel nguuru Daawuda sunu maam biy ñëw.
Osaana ci asamaan yi gëna kawe!»
11 Yeesu dugg na Yerusalem te dem ci ëttu kër-Yàlla gi. Gannaaw bi mu xoolee lépp li ko wër, mu dem Betani ak fukk ak ñaar yi ndaxte guddee woon na.
Yeesu móolu na benn garabu gaŋ te dàq jaaykat yi ci kër-Yàlla gi
12 Ci ëllëg sa bi ñu jóge Betani, Yeesu xiif. 13 Mu gis fu sori garabu gaŋ bu amoon ay xob. Mu dem di xool ndax dina fa fekk ay meññeef, waaye bi mu fa yegsee fekku fa lu dul ay xob ndaxte nekkul jamono bi gaŋ yi di am meññeef. 14 Noonu Yeesu wax garabu gaŋ bi: «Bu kenn lekkati say meññeef ba fàww!» Te taalibeem yi dégg li mu wax.
15 Ñu yegsi Yerusalem. Yeesu dugg ci ëttu kër-Yàlla gi. Noonu mu tàmbali di dàq ñi doon jaay ak ñi doon jënd ci ëttu kër-Yàlla gi. Mu daaneel taabali wéccikatu xaalis yi ak toogukaayu jaaykatu pitax yi, 16 te mayul kenn mu yóbbu dara ci ëttu kër-Yàlla gi. 17 Da leen doon jàngal te ne leen: «Mbind mi nee na: "Sama kër dinañu ko woowe këru ñaanukaay ngir xeet yi yépp," waaye yeen def ngeen ko këru sàcc yi.» 18 Noonu njiiti-jébbalkati-sarax yi ak jàngalekati-yoonu-Musaa dégg ko te ñuy wut ni ñuy reye Yeesu. Ragaloon nañu ko, ndaxte mbooloo mi yépp da yéemu woon ci njàngaleem. 19 Bi muy waaja guddi, Yeesu ak taalibeem yi génn dëkk bi.
20 Ci ëllëg sa, suba teel, bi ñuy romb, ñu gis garabu gaŋ bi wow koŋŋ ba ci reen yi. 21 Piyeer fàttaliku li xewoon te mu ne Yeesu: «Jàngalekat bi, xoolal! Garabu gaŋ bi nga móolu woon wow na koŋŋ.» 22 Noonu Yeesu ne taalibeem yi: «Gëmleen ci Yàlla. 23 Ci dëgg maa ngi leen koy wax: bu kenn waxee tund wii "Jógal fii te nga daanu ci géej gi," te amul benn sikki-sàkka ci xolam waaye mu gëm ne li mu wax dina am, noonu Yàlla dina ko ko may. 24 Loolu moo tax maa ngi leen koy wax: lépp lu ngeen ñaan Yàlla, gëmleen ne jot ngeen ko, te moom dina leen ko may. 25-26 Te sungeen taxawee ngir ñaan, fekk jàppal ngeen nit dara, baalleen ko, ngir seen Baay bi nekk ci asamaan baal leen tamit seeni bàkkaar.»
Njiiti Yawut yi laaj nañu Yeesu ci sañ-sañam
27 Yeesu ak taalibeem yi dellu Yerusalem. Ci bi Yeesu di doxantu ci ëttu kër-Yàlla gi, njiiti-jébbalkati-sarax yi, jàngalekati-yoonu-Musaa ak mag ñi ñëw ci moom. 28 Ñu laaj ko ne: «Ci ban sañ-sañ ngay defe mbir yii? Ak kan moo la jox sañ-sañ ngir nga def leen?» 29 Noonu Yeesu tontu leen ne: «Man tamit, am naa benn laaj ngir yeen. Tontuleen ma te dinaa leen wax ci ban sañ-sañ laay defe mbir yii. 30 Li Yaxya doon def, di sóob nit ñi ci ndox, fan la ko jële, ci Yàlla walla ci nit? Tontuleen ma.» 31 Noonu ñu tàmbali di waxtaan ci seen biir naan: «Lan lanu wara wax? Bu nu ne "ci Yàlla la ko jële," dina wax "Lu tax yeen gëmuleen ko?" 32 Waaye bu nu ne "ci nit la ko jëlee," nu muy deme?» Ñoom, dañoo ragaloon mbooloo mi, ndaxte ñépp jàpp nañu ne Yaxya yonent bu dëggu la woon. 33 Noonu ñu tontu Yeesu ne: «Xamunu fan la ko jële.» Yeesu tontu leen ne: «Man tamit duma leen wax ci ban sañ-sañ laay defe mbir yii.»