Màrk 6

Waa Nasaret nanguwuñu Yeesu

Yeesu jóge foofu te dem ci dëkk bi mu yaroo te taalibe yi topp ko. 2 Bi bésu noflaay bi ñëwee mu tàmbali di jàngale ci kër-ñaan bi. Nit ñu bari ñi ko doon déglu yéemu tey naan: «Fan la jële mbir yii? Ban xel mu rafet lañu ko jox? Te kéemaan yii naka la leen di defe? 3 Ndax ki du doomu minise bi, di doomu Maryaama, di magu Saak, Yose, Yudd, ak Simoŋ? Ay rakkam yu jigéen, ndax nekkuñu fii ci sunu biir?» Loolu moo tax ñu ñàkk ngëm. 4 Yeesu ne leen: «Ab yonent, duñu ko xeeb fenn fu dul ci dëkkam ak ci biir mbokkam mbaa ci këram.» 5 Foofu Yeesu mënu fa woona def kéemaan, terewul mu wéral ñenn ci ñi feebaroon ci bi mu leen tegee loxo. 6 Waaru woon na lool ndax seen ñàkka gëm.

Yeesu yónni na fukki ndaw yi ak ñaar ci ay dëkk yu wuute ngir ñu waare tey wéral ñi feebar

Yeesu doon na dem ci gox yi wër foofu di jàngale. 7 Mu woo fukk yi ak ñaar, te mu yónni leen ñaar ñaar te jox leen sañ-sañ ngir ñu dàq rab yi. 8 Mu jox leen ndigal ngir ñu baña yóbbaale dara ci tukki bi lu dul yet. Mu ne leen: «Buleen yóbbaale mburu, saaku tukki, walla xaalis ci seeni nafa; 9 waaye solleen ay dàll, te ngeen baña sol ñaari yére.» 10 Yeesu teg ca ne: «Bu ngeen duggee ci kër, na ngeen des foofu ba seen waxtu dem jot. 11 Bépp dëkk bu leen nit ñi baña dalal te ñu bañ leen déglu, génnleen foofu te ngeen faxas pënd bi nekk ci seen tànk ngir loolu mën leena seedeel seen réer.» 12 Ñu dem nag tey waare nit ñi ñu tuub seeni bàkkaar. 13 Ñu dàq rab yu bari te wéral ñi feebaroon, di leen sotti diw ci seen bopp.

Buur bi Erodd reylu na Yaxya

14 Buur bi Erodd déggoon na ñuy wax ci Yeesu ndaxte turam siiwoon na fépp. Ñenn ñi dañu doon wax ne: «Yaxya moo dekki ci ñu dee ñi. Loolu moo tax mu am kàttanu def ay kéemaan.» 15 Ñeneen ñi di wax ne: «Kii, Ilyaas la.» Ñi ci des di wax ne: «Yonent la bu mel ni yonent yu jëkk yi.» 16 Bi Erodd déggee loolu, mu ne: «Yaxya mi ma dagglu woon boppam, moo dekki.»

17-18 Deewu Yaxya nii la deme woon: Erodd takkoon na Erojàdd, fekk mu nekkoon jabaru magam Filib. Yaxya doon na wax Erodd ne: «Yoon bi dafay tere nga takk sa jabaru mag.» Noonu Erodd joxe ndigal ñu jàpp Yaxya, yeew ko, te tëj ko ci kaso bi. 19 Noonu Erojàdd mere woon na ko te bëggoon ko reylu, waaye mënu ko woon, 20 ndaxte Erodd dafa ragaloon Yaxya. Xamoon na ne nit ku jub la te sell. Loolu moo tax mu ko doon aar. Bu ko daan déglu sax da doon jaaxle lool, teewul mu bëgg di ko déglu. 21 Waaye benn bés Erojàdd lal pexe bi Erodd di màggal bésu juddoom. Noonu Erodd woote xew mu réy te mu woo ci ay jaraafam, ay kommandaŋ, ak ñi am ndombal tànk ci diiwaanu Galile. 22 Doom bu jigéen bu Erojàdd dugg te di fecc. Mu neex Erodd ak ganam yi. Noonu buur bi wax xale bu jigéen bi ne: «Ñaan ma loo bëgg, te dinaa la ko may.» 23 Mu teg ca waatal ko waat bii: «Lépp loo ma ñaan, dinaa la ko jox, su de sax sama genn-wàllu nguur.» 24 Xale bu jigéen bi génn te ne yaayam: «Lan laay ñaan?» Mu tontu ko ne: «Boppu Yaxya.» 25 Ci saa si mu gaawantu dellu ci buur bi te ne ko: «Damaa bëgg nga jox ma ci saa si boppu Yaxya ci ndab.» 26 Buur bi daldi ànd ak tiis waaye bëggu ko woona bañal ndax waatam bi ak ganam yi. 27 Mu yónni ci saa si benn soldaar, jox ko ndigal mu andil ko boppu Yaxya. Soldaar bi dem ci kaso bi te dagg boppu Yaxya. 28 Noonu mu andi bopp bi ci ndab te jox ko xale bu jigéen bi, te mu jox ko yaayam. 29 Bi taalibe Yaxya yi déggee loolu, ñu ñëw, jël néewam, te denc ko ci bàmmeel.

Yeesu dundal na nit ñu bari te dox ci kaw ndox mi

30 Ndaw yi dellu ci Yeesu, te ñu nettali ko lépp li ñu defoon ak li ñu jàngale. 31 Noonu mu ne leen: «Ñëwleen nu dem ci béréb bu wéet ngir ngeen noppalu tuuti.» Ndaxte ay nit yu bari doon nañu dem ak di ñëw, ba tax Yeesu ak taalibeem yi amuñu woon jotu lekk. 32 Ñu yéeg ci gaal, dem ci béréb bu wéet, ñoom rekk. 33 Waaye ñu bari gis leen ñuy dem, ñu xàmme leen. Ñu jóge ci dëkk yépp, di daw, te jiitu Yeesu ak taalibeem yi ci béréb bi ñu doon dem. 34 Bi Yeesu wàccee ci gaal gi, mu gis mbooloo mu takku te mu yërëm leen ndaxte dañoo meloon ni ay xar yu amul sàmmkat. Noonu mu tàmbali di leen jàngal ci ay mbir yu bari. 35 Bi jant bi di waaja sow taalibeem yi jegesi ko, te ne ko: «Mu ngi waaja guddi te béréb bi nu nekk màndiŋ la. 36 Yewwil mbooloo mi nag, ngir ñu dem ci dëkk yi ak ci gox yi nu wër ngir jënd lu ñuy lekk.» 37 Waaye Yeesu tontu leen ne: «Yeen ci seen bopp, joxleen ñoom ñu lekk.» Ñu ne ko: «Xanaa danuy jënd mburu njégu ñaari téeméeri xànjar, te nu jox leen ñu lekk?» 38 Yeesu laaj leen: «Ñaata mburu ngeen am? Demleen, ngeen xool.» Bi ñu amee lu leen leer, ñu ne ko: «Am nanu juróomi mburu ak ñaari jën.» 39 Noonu Yeesu jox ndigal taalibeem yi ñu toogloo mbooloo mi ci ay géew ci ñax mu naat mi. 40 Noonu ñu toog ci ay géewi téeméer ak géewi juróom fukk. 41 Yeesu jël juróomi mburu yi ak ñaari jën yi, yékkëti bëtam yi ci asamaan, barkeel leen, damm mburu mi, te jox leen taalibeem yi ngir ñu séddale leen. Ñu séddale tamit ñaari jën yi ci ñépp. 42 Ñépp lekkoon nañu ba regg, 43 ba ñu for ci fukki pañe ak ñaar yu fees ci ay daggitu mburu ak ay daggitu jën. 44 Ñi lekkoon ci mburu mi tollu woon nañu ci juróomi junniy góor.

45 Ci saa si Yeesu duggloo taalibeem yi ci gaal gi ngir ñu jiitu ko ci beneen wetu dex bi féete ci Betsayda, te moom mu yewwi mbooloo mi. 46 Gannaaw bi mu tàggatoo ak ñoom, mu yéeg ci tund wi ngir ñaan. 47 Bi guddi jotee, gaal gi nekkoon na ci diggu dex gi, te Yeesu moom rekk moo desoon ci suuf si. 48 Mu gis ne taalibeem yi sonnoon nañu lool ci joow gaal gi, ndaxte ngelaw bi da leen doon songe kanam. Bi fajar di waaja jot, mu jëm ci ñoom di dox ci kaw dex gi, ba bëgg leena raw. 49 Bi ñu ko gisee muy dox ci kaw dex gi, ñu foog ne ab njuuma la. Ñu tàmbali di yuuxu, 50 ndaxte ñépp gisoon nañu ko, te ñu tiit. Ci saa si Yeesu ne leen: «Takkleen seen fit. Man laa! Buleen tiit.» 51 Noonu mu yéeg ci gaal gi, fekki leen, te ngelaw bi dal. Waaru woon nañu lool, 52 ndaxte ràññeewuñu woon li jëm ci kéemaan yi Yeesu defoon ci mburu yi, waaye seen xol dafa dëgër.

53 Bi ñu jàllee dex gi, ñu yegsi ci diiwaanu Senesaret te teer foofu. 54 Bi ñu génnee ci gaal gi, ci saa si nit ñi xàmme Yeesu. 55 Ñu daw ci diiwaan bi yépp ngir yégle ñëwam. Fu ñu dégg ne Yeesu mu nga fa, ñu andi foofu ñi feebar ci seeni basaŋ. 56 Fépp fu Yeesu doon dem, muy ci gox-goxaat yi, ci dëkk yi, walla ci këru àll yi, dañu doon andi ñi feebaroon ci pénc dëkk yi te ñu ñaan Yeesu ngir mu may leen, ñu laal catu yéreem rekk, te ñépp ñi ko laaloon doon nañu wér.