Avavʉlanɨsi ava vʉdesi
2
Ʉnsiki ghʉmonga mʉ Vaisilaeli valyahʉmiile avavɨli ava vʉdesi,
vakavɨlagha isa vʉdesi.
Fye lʉlɨvuo na kʉlyʉmue,
pakate palyʉmue vilihʉmɨla avavʉlanɨsi ava vʉdesi,
vivʉlanɨsyagha isa vʉdesi.
Avaanhu avuo vililetagha kɨsyefu imbʉlanɨsio isa vʉdesi isa kʉvasofia ʉmue na kʉkʉnkaana ʉMʉtwa jʉno alyavavangile.
Ʉluo lulikʉvapelela avaanhu avuo kutipulua ngʼhaningʼhaani.
2 Avaanhu vinga vivɨngɨlɨlagha amaghendele ghaave agha vʉghendamwalu,
kange vwɨmɨla aveene,
imbʉlanɨsio sa kyangʼhaani sibenapʉlwagha.
3 Avavʉlanɨsi avuo vwɨmɨla ʉvʉhojofu vwave ʉvwa kyʉma,
vikʉvavʉlagha ifipango ifya vʉdesi,
neke mʉvapeele indalama.
Kuhʉma mʼbʉkʉʉlʉ ʉNgʉlʉve ilɨngʼhanisie kuhɨgha avaanhu avuo,
kange ɨkʉvatipula ngʼhaningʼhaani!
4 ɄNgʉlʉve naalyavavoniile ɨkɨsa avanyamhola vano valyavombile inyɨvi,
akavataagha mʉ liina mʉ ngʼhiisi ɨmbaha.
Ʉkuo vapinyilue ni nyololo,
vighuula ɨkɨghono ɨkya vʉhɨghi.
5 Kange mʼbʉkʉʉlʉ,
ʉnsiki ʉghwa Nwaka,
ʉNgʉlʉve naalyavavoniile ɨkɨsa avaanhu vano navalyale vikʉmwoghopa ʉmwene.
Alyaletile ɨghalika mʉ ɨɨsi jɨla,
avaanhu vakafua.
Neke ʉNgʉlʉve alyampokile ʉNwaka palɨkɨmo na vange lekelalʉbale.
ɄNwaka ʉjuo ghwe jʉno akapʉlɨsyagha avaanhu kuuti vavombaghe isa vʉgholofu.
6 Kange,
ʉNgʉlʉve alyavahɨghile avaanhu ava mʉ lɨkaaja ɨlya Sodoma nɨ lya Gomola na kʉkʉghatipula nʉ mwoto.
Mʉ ʉluo,
alyahʉfisie ɨkɨhwanɨkɨsio ɨkya sino silikʉvaagha vano navikʉmwɨmɨka ʉmwene.
7 ɄNgʉlʉve alyampokile ʉLoti,
ʉmuunhu ʉmʉgholofu,
jʉno alyale ipumuka kyongo mʉ mwojo ghwake vwɨmɨla ʉvʉvwafu vʉno vʉlyale vuvombeka na vahosi mʉ lɨkaaja ɨlio.
8 ɄLoti ʉjuo,
alyale pakate pa vaanhu avahosi,
ifighono fyoni akava ɨkʉsivona imbombo saave imbiivi na kupʉlɨka amasio ghaave amaviivi.
Ʉluo,
lʉkampelela kupumuka kyongo mʉ mwojo ghwake,
ʉlwakʉva alyale mʉgholofu.
9 ɄMʉtwa ʉNgʉlʉve akagwile vʉle ɨkʉvapokagha mʉ ngelo avaanhu vano vikʉmwoghopa ʉmwene.
Kange,
akagwile vʉle kyaɨkʉvavɨɨka mʉ lʉpumuko avahosi,
kuhanga kufika ɨkɨghono ɨkya vʉhɨghi.
10 Ilikʉvavɨɨka mʉ lʉpumuko avahosi,
kyongo vano vivɨngɨlɨla ʉvʉnoghelua ʉvwa mʼbɨlɨ na kubenapʉla ʉvʉtavʉlɨlua vwa Ngʉlʉve.
Avaanhu avuo valɨ nʉ lughinio,
navipʉlɨka,
kange vikʉfiligha ifipelua ifya kʉkyanya fino fili nʉ vʉvaha.
11 Nambe avanyamhola vano valɨ ni ngʉfu kukila avavʉlanɨsi avuo,
navikʉfiligha mʉlwa kʉfihɨgha ifipelua ifio pamaaso gha Mʉtwa ʉNgʉlʉve.
12 Avaanhu avuo vahwene fikanu,
ifisila lʉhala,
fivomba isa vughane vwa fyene,
fiholua pambele fikolua na kuhɨnjua!
Viligha ifiinu fino navafitangʼhinie.
ɄNgʉlʉve ilikʉvatipulua lwoni vwɨmɨla ʉvʉhosi vwave.
13 Avaanhu avuo vilikwʉpɨla ʉlʉpumuko,
ʉlwakʉva vavapeleliile avange ʉlʉpumuko.
Aveene vasila soni,
nambe pa vwelu vihovoka kuvomba isa vʉnoghelua vwa mavɨlɨ ghaave,
amaghendele ghaave maviivi,
kange pano vihanga ifyakʉlia numue,
vikʉvakosia isoni vwɨmɨla imbombo saave isa vʉsyangi.
14 Ʉnsiki ghwoni,
visaagha kukuvwafuka,
navivʉhɨɨla kuvomba inyɨvi,
vikʉvahosia vano navakangiile mʉ lwɨtɨko.
Vamemile ʉvʉhojofu vwa kyʉma.
Avaanhu avuo vaghunilue!
15 Vajɨlekile ɨsɨla ɨngolofu,
vasovile,
vivɨngɨlɨla ɨsɨla ɨja Balamu,
ʉmwana ghwa Beoli.
ɄBalamu akalondagha ɨkyʉma vwɨmɨla kuvomba ʉvʉhosi.
16 Neke ʉNgʉlʉve akajɨpelela ɨdogovi kʉkʉnʼdalɨkɨla ʉBalamu vwɨmɨla ʉvʉhosi vwake.
Ɨdogovi jɨno najijova,
jɨkajova hwene muunhu,
jɨkansigha ʉmʼbɨli ʉjuo kuvomba imbombo saake isa kɨjasu.a
17 Avavʉlanɨsi ava vʉdesi avuo,
vasila lʉvʉmbʉlɨlo,
valɨ ndavʉle ifitiimu ifisila malenga,
nambe ɨlɨfunde ɨlya fula lɨno lipulua nɨ mhepo.
ɄNgʉlʉve avalɨngʼhanɨkisie ʉlʉpumuko kʉ ngʼhiisi ɨmbaha.
18 Aveene vijova amasio agha lughinio,
amasila mʉlʉvo,
kange vwɨmɨla ʉvʉnoghelua vwave ʉvwa mʼbɨlɨ vikʉvahosia vano vahʉmile pivangʉka,
vano valekile kuvomba sino vivomba avahosi.
19 Vikʉvahʉvɨsia kuuti viiva vavʉke,
kʉmo aveene vakami va vʉhosi vʉno vʉkʉvanangania,
ʉlwakʉva ʉmuunhu ghweni,
nkami ghwa kɨɨnu kɨno kɨntemile.
20 Avaanhu vano vavʉhɨlile kuvomba ʉvʉhosi vwa mʉ ɨɨsi vwɨmɨla kʉkʉmʼbɨngɨlɨla ʉMʉtwa ghwitu,
ʉMpoki ʉYesu Kɨlɨsite,
nave vagomoke kange kuvomba inyɨvi,
viiva mʉ lʉtalamu ʉlʉvaha kukila ʉlʉtasi.
21 Nijova enendɨɨkɨ,
ʉlwakʉva lwale luuva kʉba kʉ vaanhu avuo,
vale vaave navakagwile lwoni ɨsɨla ɨja vʉgholofu,
kukila kukagʉla ɨsɨla ɨjio,
neke kange kuvʉhɨɨla kuvɨngɨlɨla indaghɨlo inyɨmɨke sino vʉpiile.
22 Avaanhu avuo vwɨmɨla sino vavombile lʉlɨngʼhiine nʉ lʉjovo lʉno lwiti,
“Ɨmbua jɨgomokiile amasyetʉlɨlo ghaake,”
nambe ʉlʉjovo lʉno lwiti,
“Ɨngʉbe jɨno jɨsukilue,
jighalasana mʉ matope!”