Ɨkɨghono ɨkya kwisa ʉMʉtwa ʉYesu
3
Vaghanɨke vango,
ɨkalata ɨjɨ jɨno nɨkʉvalembela,
ja vʉvɨlɨ.
Mʉ kalata se ivɨɨlɨ nilonda kusisimula amasaaghe ghiinu amanono mʉlwa kʉvakʉmbʉsia kuuti,
2 mʉkʉmbʉkaghe amasio ghano valyajovile kali avavɨli avɨmɨke na sino ʉMʉtwa ghwitu,
ʉMpoki,
alyavalaghiile avasungʼhua viinu.
3 Ɨkɨvaha,
mʉkagʉlaghe kuuti ifighono ifya vʉsililo vilikwisa,
avaanhu avanya mbedo vivɨngɨlɨlagha ʉvʉnoghelua vwave ʉvʉviivi.
Avaanhu avuo vikʉvabenapʉlagha ʉmue,
4 vitisagha,
“ɄKɨlɨsite alyalaghile kuuti ikwisa!
Lɨno alɨ kʉʉghi?
Kuhʉma vifua avakʉʉlʉ viitu,
ifiinu fijiighe vʉle vʉle ndavʉle filyapelilue.”
5 Avaanhu avuo,
vikuvɨkagha hwene vasyemilue kuuti,
kʉvʉtengʉlɨlo ʉNgʉlʉve alyajovile ɨlɨsio lyene,
ʉvʉlanga nɨ ɨɨsi fikapelua.
Alyapelile ɨɨsi kuhʉma mʉ malenga,
ɨɨsi jɨkava paajo na malenga.
6 Kange,
vwɨmɨla amalenga aghuo,
kwekʉti ɨghalika,
ʉNgʉlʉve amasiki ghala agha pakali,
akajɨtipula ɨɨsi.
7 Neke lɨno,
ʉNgʉlʉve mʉ ngʉfu isa lɨsio lyake avʉlekile ʉvʉlanga nɨ ɨɨsi ɨjɨ kuhanga kufika ɨkɨghono ɨkya vʉhɨghi kɨno filitipulua nʉ mwoto.
Ɨkɨghono ɨkio avahosi vilihɨghua na kutipulua.
8 Looli vaghanɨke vango,
mʉkʉmbʉkaghe kuuti,
kwa Ngʉlʉve ɨkɨghono kɨmo kɨhwene maaka mbilima jɨmo,
ghoope amaaka ɨmbilima jɨmo ghahwene kɨghono kɨmo.a
9 Avaanhu vamonga visaagha kuuti,
ʉMʉtwa ʉNgʉlʉve idɨɨla kuvomba sino alyalaghile.
Jeeje,
naidɨɨla,
looli ʉmwene alɨ nʉ lugudo vwɨmɨla ʉmue,
nailonda kuuti jʉmonga mʉlyʉmue asove,
ʉlwene ilonda kuuti vooni valaate inyɨvi saave.
10 Neke ʉMʉtwa ilikwisa mʉ ngʼhenyemʉkɨla ndavʉle ʉmʉlyasi.
Ɨkɨghono ɨkio,
ʉvʉlanga vʉlasovanɨka nʉ mʉghindi ʉnkome.
Ifiinu fino mwefili mʉ vʉlanga filikwengʉka nʉ mwoto,
joope ɨɨsi jilisovanɨka palɨkɨmo ni fiinu fyoni fino mwefili.
11 Lɨno,
ʉlwakʉva ifiinu fyoni filitipulua enendɨɨkɨ,
ʉmue mʉnoghiile kuuva na maghendele amɨmɨke na kʉkʉmwoghopa ʉNgʉlʉve.
12 Mʉvombaghe ʉluo kʉmo mughuula nʉ vʉsyʉkue ʉvʉkome kukwisa ngʼhaningʼhaani ɨkɨghono ɨkya Ngʉlʉve.
Ɨkɨghono ɨkio,
ʉvʉlanga vulikwengʉka nʉ mwoto ni fiinu fyoni fino mwefili,
filisovanɨka lwoni.
13 Neke ʉsue,
tughuula ʉvʉlanga ʉvʉpia nɨ ɨɨsi ɨmhia ndavʉle alyatʉlaghile ʉNgʉlʉve.
Ʉkuo kwe kʉno vilikukala avagholofu.
14 Lɨno vaghanɨke vango,
pano mughuula ɨkɨghono kɨla ɨkya vʉhɨghi,
mʉghimbaghe kuuva vagholofu,
vasila nkole na kuuva nʉ lʉtengaano nʉ Ngʉlʉve.
15 Mʉkʉmbʉkaghe kuuti ʉMʉtwa ikuguda,
ʉlwakʉva ilonda mʉpokue.
Enendɨɨkɨ,
najʉ nyalʉkolo ghwitu ʉmʉghanɨke ʉPaulo fye alyavalembiile mʉlwa kʉlongosivua nʉ vʉkagʉsi vʉno alyapelilue nʉ Ngʉlʉve.
16 Isio se sino alembile mʉ kalata saake sooni.
Mʉ kalata saake isio mweghale amasio ghamonga matalamu kʉkʉghatangʼhania.
Amasio aghuo,
avaanhu avasila vʉkagʉsi,
vano navasindamiile mʉ lwɨtɨko,
vikwandʉla ʉmʉlʉvo ghwa masio aghuo ndavʉle vikwandʉla amasio aghange mʉ Malembe aMɨmɨke.
Mʉ ʉluo,
vikujavɨlɨla vavuo kutipulua.
Amasio agha vʉsililo
17 Lɨno vaghanɨke vango,
ʉlwakʉva mʉsikagwile isi,
mulolelelaghe vʉnofu,
kuuti mʉleke kusyangua na vahosi.
Nave mʉkʉvapʉlɨkɨsia,
ndepoonu mʉkʉlʉleka ʉlwɨtɨko lwinu ʉlwa kyangʼhaani.
18 Looli mʉjighaghe mukukala mʉ lʉsʉngʉ na kʉkʉnkagʉla ʉMʉtwa,
ʉMpoki ghwitu ʉYesu Kɨlɨsite.
Ʉvʉvaha vʉlɨ nʉ mwene,
lɨno ni fighono fyoni!
Ameni.