Ɨkalata ɨja vʉvɨlɨ ɨja
Peteli
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Simoni Peteli,
ne mʼbombi kange ne nsungʼhua ghwa Yesu Kɨlɨsite.
Nɨkʉvalembela ʉmue mwe vano mwʉpiile ʉlwɨtɨko lʉla lʉla lʉno na jʉsue twʉpiile.
Ʉlwɨtɨko ʉluo mwʉpiile vwɨmɨla ʉvʉkoola vwa Ngʉlʉve nʉ Mpoki ghwitu,
ʉYesu Kɨlɨsite.
2 Nɨkʉvasʉmɨla kwa Ngʉlʉve kuuti avongelesyaghe ʉlʉsʉngʉ nʉ lʉtengaano,
vwɨmɨla kʉkʉnkagʉla ʉmwene nʉ Mʉtwa ghwitu ʉYesu.
Kukemelua na kusalʉlua
3 ɄNgʉlʉve mʉ ngʉfu saake,
atʉpeliile ifiinu fyoni fino tulonda mʉ vwʉmi vwitu kuuti tukalaghe mʉ vughane vwake.
Avombile ʉluo vwɨmɨla kʉkʉnkagʉla ʉmwene jʉno atʉkemelile kukwʉpɨla ʉvʉvaha nʉ vʉkoola vwake.
4 Mʉ ʉluo,
atʉlaghile kʉkʉtʉpeela si nyinga imbaha,
inofu fiijo.
Isio se sino sikʉtʉpelela kuuti mʉpokue mʉ vʉsovi ʉvwa mʉ ɨɨsi vʉno vuhʉma mʉ vʉnoghelua ʉvʉviivi,
neke muuva ndavʉle alɨvuo ʉNgʉlʉve.
5 Lɨno,
ʉlwakʉva ʉNgʉlʉve ivomba isi sooni,
mʉghimbaghe kuuva vakoola mʉ lwɨtɨko lwinu;
kange mʉ vʉkoola vwinu,
mʉvisaghe vakagʉsi.
6 Mʉ vʉkagʉsi vwinu,
mʉvisaghe vaanhu va kulolelela;
kukulolelela ʉkuo,
kʉvisaghe nʉ lugudo;
mʉ lugudo lwinu,
mʉvisaghe vagholofu;
7 mʉ vʉgholofu vwinu,
mʉghananaghe hwene vanamuunhu;
mʉlwa kʉghanana hwene vanamuunhu,
mʉvaghanaghe avaanhu vooni.
8 Nɨvavʉlile isio,
ʉlwakʉva nave mughina kuuva nʉ lʉveelo ndavʉle ʉluo na kukila,
lʉkʉvatanga kʉkʉmʼbombela ʉMʉtwa ghwitu,
ʉYesu Kɨlɨsite.
Kange,
lʉkʉvatanga kuuva nʉ lʉvʉmbʉlɨlo mʉlwa kʉnkagʉla ʉmwene.
9 Neke ʉmuunhu jʉno naalɨ nʉ lʉveelo ndavʉle ʉluo,
nailola vʉnono,
mʼbofu amaaso,
asyemilue kuuti ʉNgʉlʉve amʼbalisie inyɨvi saake isa mʼbʉkʉʉlʉ.
10 Lɨno vanyalʉkolo vango,
mʉghimbaghe fiijo kuhʉfia kuuti mʉkemelilue na kusalʉlua nʉ Ngʉlʉve.
Mʉngavombe ʉluo,
namʉngalʉleke ʉlwɨtɨko lwinu nambe padebe.
11 Mʉ ʉluo ʉNgʉlʉve ilikʉvasʉngʉkɨla kukwingila mʉ Vʉtwa ʉvwa kʉvʉsila kʉsila ʉvwa Mʉtwa,
ʉMpoki ghwitu ʉYesu Kɨlɨsite.
12 Lɨno,
nambe mʉkagwile na kukangala mʉ vwakyangʼhaani vʉno mʉlyʉpiile,
nifikʉvakʉmbʉsyagha isio,
ifighono fyoni.
13 Nivona lʉnofu kʉkʉvakʉmbʉsia isio ʉnsiki ghwoni ghʉno nɨlɨ mwʉmi.
14 Nijova enendɨɨkɨ,
ʉlwakʉva nɨkagwile kuuti ʉnsiki ghwango ʉghwa kʉfua ghʉlɨ piipi,
ndavʉle ahʉfisie ʉne ʉMʉtwa ghwitu ʉYesu Kɨlɨsite.
15 Nighimba kʉkʉvavʉʉla lɨno kuuti,
kyanɨfwile mʉkʉmbʉkaghe isio ʉnsiki ghwoni.
Ʉvʉvaha vwa Kɨlɨsite
16 Pano twavavʉlagha ingʉfu isa Mʉtwa ghwitu ʉYesu Kɨlɨsite na kukwisa kwa mwene,
natwavavʉlagha ifipango ifya vʉdesi fino filembilue na vaanhu mʉ vʉkagʉsi vwave,
looli twavavʉlagha ʉvʉvaha vwake vʉno tʉlyavʉvwene jʉsue.
17-18 Ʉsue tʉlyale palɨkɨmo nʉ Yesu kʉ kɨdunda kɨla ɨkyɨmɨke ye ikwʉpɨla ʉvwoghopua nʉ vʉvaha kuhʉma kwa Ngʉlʉve ʉNhaata.
Na jʉsue tʉlyapʉliike ɨlɨsio kuhʉma kʉkyanya kwa Ngʉlʉve jʉjuo mʉ vʉvaha vwake liiti,
“Ʉjʉ ghwe Mwanangoa ʉmʉghanɨke,
jʉno nɨnkeliile.”b
19 Mʉ ʉluo tuhʉvɨɨla fiijo amasio ghano valyavɨlile avavɨli,
kange na jʉmue muuva muvomba vʉnofu nave mʉkʉghagadɨlɨla.
Amasio aghuo ghahwene taala jɨno jimulika pano pwejɨlɨ ɨngʼhiisi,
kuhanga pano kukia.
Kwekʉti,
ʉKɨlɨsite ɨkʉvamulika mʉ moojo ghiinu ndavʉle ɨnhondue ɨja vʉkie.
20 Ɨkɨvaha,
mʉkagʉlaghe kuuti amasio agha vavɨli ghano ghalɨ mʉ Malembe aMɨmɨke,
naghalyalembilue kuhʉma mʉ masaaghe ghaave.
21 Nijova ʉluo,
ʉlwakʉva nakwale ʉmʼbɨli jʉno alyale ivɨla mʉ vughane vwa vaanhu,
looli valyale vivɨla sino sihʉma kwa Ngʉlʉve mʉlwa kʉlongosivua ni ngʉfu isa Mhepo ʉMwɨmɨke.