Ɨkalata ɨja vʉvɨlɨ ɨja
Peteli
Ɨmhola ɨndongosi
Ɨkalata ɨjɨ alyalembile ʉPeteli, ʉmʼbʉlanɨsɨvua ghwa Yesu Kɨlɨsite. Alyavalembiile avɨtɨki vamonga ye akagwile kuuti ilʉta pibudua. Ʉvʉfumbue vwake vwale vwa kʉvakʉmbʉsia avɨtɨki kuuti, ʉnsiki ghwoni mʉ vwʉmi vwave vavisaghe nʉ lʉveelo lʉno lʉkʉmhovosia ʉNgʉlʉve. Mʉ kalata ɨjɨ ɨkʉvavʉʉla avɨtɨki kuuti, navangavʉhɨlaghe kuvɨngɨlɨla imbʉlanɨsio sa Ngʉlʉve ni sa Yesu Kɨlɨsite, sino valyʉpiile kuhʉma kwa mwene na kʉ vange vano valyamwaghile ʉYesu jʉjuo na kʉkʉmpʉlɨkɨsia. Ɨkʉvapavɨla vwɨmɨla avavʉlanɨsi va vʉdesi mʉ fipʉgha ifya vɨtɨki. Avavʉlanɨsi avuo vivʉlanɨsyagha isa kʉvasofia avɨtɨki, vivʉlanɨsyagha kukukala mʉ lʉveelo ʉlʉviivi, kange vitisagha ʉKɨlɨsite nailigomoka. Neke ʉmwene ʉPeteli isimilisia kuuti kyangʼhaani ʉKɨlɨsite iligomoka. Pepano ʉNgʉlʉve ilitipula ɨɨsi ɨjɨ jooni neke ipela ɨɨsi ɨmhia. Mʉ ɨɨsi ɨjio vilikukala avaanhu avagholofu.