Kudɨɨma ɨkɨpʉgha kya Ngʉlʉve
5
Ʉne ne ʉmo mʉlyʉmue mwe vagojoa vajango,
ne jʉno nɨlyalolile imhumuko isa Kɨlɨsite,
kange nɨlɨ ʉmo mʉ vano vihʉvɨɨla kukwʉpɨla ʉvʉvaha ʉnsiki ghʉno ghukwisa,
2 nɨkʉvasʉʉma mʉdɨmaghe na kulolelela vʉnono ɨkɨpʉgha kya Ngʉlʉve kɨno mʉlyapelilue.
Nakwekʉti mʉvombaghe ʉluo hwene mukwʉmɨlɨsɨvua na jʉmonga,
looli mʉvombaghe nʉ mwojo ʉmʼbalafu ndavʉle ilonda ʉNgʉlʉve.
Namʉngavombaghe mʉlwa vʉhojofu vwa ndalama,
looli mutavʉlaghe nʉ mwojo ʉmʼbalafu.
3 Namʉngatemaghe kʉ ngʉfu ɨkɨpʉgha kɨno mʉpelilue,
looli mʉvisaghe kɨhwanɨkɨsio kɨnofu mʉ vʉlongosi vwinu.
4 Pepano ʉNʼdɨɨmi ʉMʼbaha iliiva ikwisa,
ilikʉvapeela ɨngeela ɨja vʉvaha,
jɨno najinangɨka.
5 Na jʉmue mwe vasoleka,
mʉvoghopaghe avagoyo viinu.
Nʉjʉnge ijisyaghe kwa nʼjaake.
Ndavʉle lɨlembilue mʉ Malembe aMɨmɨke kuuti,
“ɄNgʉlʉve ɨkʉvakaana vano vikughinia,
looli ɨkʉvasʉngʉkɨla vano vikujisia.”b
6 Lɨno mujisyaghe,
mʉvisaghe mʉ mavoko gha Ngʉlʉve ʉnya ngʉfu,
kuuti avaghinie ʉnsiki ghʉno ghʉnoghiile.
7 Amahangajɨko ghiinu ghooni mʉmʉlekele ʉNgʉlʉve,
ʉlwakʉva ʉmwene ɨkʉvavɨkɨla mwojo.
8 Mulolelelaghe na kuuva maaso,
ʉlwakʉva ʉmʉlʉgʉ ghwinu ʉSetano isyʉtasyʉta hwene nyalʉpala ɨnya njala,
jilonda ʉmuunhu jɨmʉlie.
9 Lɨno,
mʉnsighaghe ʉSetano mʉlwa kʉkangala mʉ lwɨtɨko.
Mʉkagʉlaghe kuuti imhumuko sino sikʉvisila,
se sino sikʉvaagha avɨtɨki avajiinu mʉ ɨɨsi sooni.
10 Neke kyamʉpumwike ʉnsiki nʼdebe,
ʉNgʉlʉve ʉnya lʉsʉngʉ,
jʉno alyavakemelile mwingile mʉ vʉvaha vwake ʉvwa kʉvʉsila kʉsila ʉlwakʉva mʉlɨ mwa Kɨlɨsite,
ghwe mwene ɨkʉvanosia,
ɨkʉvakangasia,
ɨkʉvapeela ingʉfu na kʉkʉvatanga mʉsindamale mʉ lwɨtɨko.
11 ɄNgʉlʉve atemaghe ifighono fyoni.
Ameni.
Amasio agha vʉsililo
12 Nɨvalembiile ɨkalata ɨjɨ kʉkʉvakangasia na kʉkʉvoleka kuuti,
ʉlʉ lwe lʉsʉngʉ lwa kyangʼhaani lwa Ngʉlʉve.
Mʉsindamalaghe mʉ lʉsʉngʉ ʉluo.
ɄSilwano,c
ghwe mwene anhangile kulemba ɨkalata ɨfupi ɨjɨ.
Ʉjuo,
nʼjiitu mʉ lwɨtɨko,
nɨnkagwile,
muunhu nnofu.
13 Ɨkɨpʉgha ɨkya vɨtɨki kɨno kɨsalulue nʉ Ngʉlʉve ndavʉle ʉmue,
kɨno kɨlɨ mʉ lɨkaaja ɨlya Babeli,d
kɨkʉvahʉngɨla.
Ghwope ʉMalɨka ʉmwanango mʉ lwɨtɨko,
ɨkʉvahʉngɨla.
14 Mʉhʉngɨlanaghe nɨ saavo ɨnya lʉghano mwa Yesu Kɨlɨsite.
Nɨkʉvasʉmɨla mweni,
mwe vavɨngɨlɨli va Kɨlɨsite kuuti mʉvisaghe nʉ lʉtengaano.