Kukukala ndavʉle ilonda ʉNgʉlʉve
4
Lɨno,
ʉlwakʉva ʉKɨlɨsite alyapumusivue mʉ ɨɨsi muno,
na jʉmue pano mupumusivua,
mugudaghe mʉ vʉfumbue vʉno alyale navwo ʉmwene.
Ʉlwakʉva ʉmuunhu jʉno ikuguda vwɨmɨla imhumuko isa pa ɨɨsi apa,
asilekile inyɨvi.
2 Mʉ ʉluo,
ʉnsiki ghwinu ghʉno ghʉsighiile kukukala pa ɨɨsi apa,
mʉlekaghe kuvɨngɨlɨla ʉvʉnoghelua ʉvwa mʉ ɨɨsi,
looli mʉvɨngɨlɨlaghe isa vughane vwa Ngʉlʉve.
3 Nijova ʉluo,
ʉlwakʉva ʉlʉtasi,
ifighono finga mwavombagha sino vivomba vano navikʉmwɨtɨka ʉNgʉlʉve:
ʉvʉvwafu,
ʉvʉnoghelua vwa mʼbɨlɨ,
ʉvʉghaasi,
kuuva ni fikulukulu ifya kʉlia na kunyua kyongo na kukwɨmɨka ifihwani.
4 Vano navɨtɨki vikʉvadegha,
pano vivona namuuva kange palɨkɨmo na veene kuvomba ʉvʉhosi,
mʉ ʉluo vikʉvaligha.
5 Avaanhu avuo,
vilikujoleka vwɨmɨla ʉvʉhosi vwave pamaaso gha Ngʉlʉve jʉno ilɨngʼhanisie kuhɨgha avaanhu vooni,
avʉʉmi na vafue.
6 Fye nambe ɨMhola ɨNofu jɨkapʉlɨsivue na kʉ vafue,
ʉlwakʉva nambe valyahɨghilue kufua kɨmʼbɨlɨ ndavʉle avange,
mʉ ngʉfu isa Mhepo ʉMwɨmɨke,
vʉʉmi ndavʉle alɨvuo ʉNgʉlʉve.
7 Ʉvʉsililo ʉvwa fiinu fyoni vʉlɨ piipi,
lɨno mulolelelaghe na kuuva maaso,
kuuti mufunyaghe ndavʉle lʉnoghiile.
8 Ɨkɨvaha,
kughanana nʉ mwojo ghwoni,
ʉlwakʉva nave mughanana,
kɨhʉʉgʉ kʉkʉnsaghɨla ʉnnino nambe akʉhokile kinga.a
9 Nʉjʉnge avisaghe nkoola kʉkʉmwʉpɨla ʉnnine.
Amwʉpɨlaghe nʉ mwojo ʉmʼbalafu.
10 ɄNgʉlʉve avapeliile nʉjʉnge ɨkɨpelua kyake.
Lɨno,
nʉjʉnge avombelaghe ɨkɨpelua ɨkio mʉlwa kʉvatanga avange.
Mʉ ʉluo muuva valoleleli vanofu va fipelua ifio fino fili papinga.
11 Ʉmuunhu jʉno ipʉlɨsia,
amasio ghaake ghavisaghe ndavʉle agha Ngʉlʉve.
Ghwope jʉno itanga avaanhu,
avatangaghe mʉ ngʉfu sino apelilue nʉ Ngʉlʉve,
kuuti ʉNgʉlʉve aghinwaghe mʉ sooni vwɨmɨla ʉYesu Kɨlɨsite,
jʉno alɨ nʉ vʉvaha ni ngʉfu ifighono fyoni.
Ameni.
Kupumuka vwɨmɨla ʉKɨlɨsite
12 Vaghanɨke vango,
ingelo imbaha sikʉvaagha vwɨmɨla imhumuko.
Namʉngakenyemʉkaghe isio hwene kɨɨnu kɨhesia kʉlyʉmue.
13 Looli mʉhovokaghe,
ʉlwakʉva mupumuka ndavʉle alyapumwike ʉKɨlɨsite.
Mʉ ʉluo muliiva nʉ lʉkeelo ʉlʉvaha fiijo,
alaava ivoneka ʉKɨlɨsite mʉ vʉvaha vwake.
14 Nave avaanhu vikʉvaligha vwɨmɨla kʉkʉmʼbɨngɨlɨla ʉKɨlɨsite,
mʉfunyilue,
ʉluo luhʉfia kuuti ʉMhepo ʉnya vʉvaha,
kwekʉti ʉMhepo ghwa Ngʉlʉve,
alɨ palɨkɨmo numue.
15 Pakate palyʉmue napeangavisaghe nambe muunhu jʉno ipumusivua mʉlwa kuuva mʼbudi,
mhɨɨji,
nya mabaatu,
nambe ʉmhomengʼhani.
16 Neke nave jʉmonga ipumusivua ʉlwakʉva Nkɨlɨsite,
naangavonaghe soni,
looli amʉghiniaghe ʉNgʉlʉve,
ʉlwakʉva itambʉlua ɨlɨtavua lya Kɨlɨsite.
17 Ʉnsiki ʉghwa kʉhɨghua ghʉfikile.
ɄNgʉlʉve itengʉla pikʉtʉhɨgha taasi ʉsue twe vaanhu vaake.
Lɨno,
nave itengʉla pikʉtʉhɨgha taasi twe vaanhu vaake,
ʉvʉsililo vwa vano navikwɨtɨka ɨMhola ɨNofu ɨja Ngʉlʉve vuuva ndaani?
18 Ndavʉle lɨlembilue mʉ Malembe aMɨmɨke kuuti,
“Nave lʉtalamu kwa muunhu ʉmʉgholofu kupokua,
pe luliiva ndaani kwa muunhu jʉno mhosi,
jʉno naɨkʉmwɨtɨka ʉNgʉlʉve?”b
19 Lɨno,
vano vipumuka vwɨmɨla kuvomba isa vughane vwa Ngʉlʉve,
vafivombaghe inofu,
vivɨɨke mʉ vʉloleleli vwa Ngʉlʉve ghwave ʉnnofu,
jʉno avapelile.