Imhavɨlo kwa mʉghoosi nʉ nʼdala
3
1-2 Na jʉmue mwe vadala,
mʉvisaghe vakʉndi kʉ vaghoosi viinu.
Mʉ ʉluo,
nave kwevale avaghoosi vano navikwɨtɨka ɨlɨsio lya Ngʉlʉve,
pano vikʉghaagha amaghendele ghiinu amanono,
nʉ vwɨmɨke vwinu,
ghikʉvapelela kuuva vɨtɨki kɨsila kʉvavʉʉla ɨlɨsio.
3 Mʉlekaghe kutoga amavɨlɨ ghiinu kʉnji,
ndavʉle kutiva ɨlɨnyele,
kufwala ifiinu ifya ndalama nyinga na menda agha lʉtogo.a
4 Looli kutoga kwinu kʉvisaghe mʉ moojo ghiinu muno namuvoneka.
Ʉkuo kwe kʉno fihʉma ifiinu ifya kʉtoga fino nafinangɨka ndavʉle ʉvʉkoola nʉ lujisio.
Ʉvuo vwe vʉnono vʉno vʉnoghiile pamaaso gha Ngʉlʉve.
5 Enendɨɨkɨ fye valitogile avakɨjʉʉva avɨmɨke ava pakali,
vano valyale vikʉmhʉvɨɨla ʉNgʉlʉve na kuuva vakʉndi kʉ vaghoosi vaave.
6 Lolagha,
ʉSala vʉle alyale nkʉndi kwa mʉghoosi ghwake ʉAbulahamu,
alyale ɨkʉntambʉla ʉmʉghoosi ghwake iiti,
“Ntwa ghwango.”b
Ʉmue muuva vaana va Sala nave muvomba inofu kɨsila kwoghopa avaghoosi viinu mʉ sino ndepoonu vikʉvavomba.
7 Na jʉmue mwe vaghoosi mukalaghe vʉnono na vadala viinu.
Mʉkagʉlaghe kuuti aveene vasila ngʉfu.
Mʉ ʉluo mʉvisaghe vakoola kʉ veene,
ʉlwakʉva voope vilikwʉpɨla palɨkɨmo numue ʉlʉvonolo ʉlwa vwʉmi.
Mʉvombaghe ʉluo kuuti,
nakwekɨngavisaghe ɨkya kʉsigha inyifuunyo siinu kwa Ngʉlʉve.
Kupumuka vwɨmɨla kuvomba inofu
8 Ɨlɨsio ɨlya vʉsililo lye ɨlɨ:
mʉvisaghe nʉ mwojo ghʉmo,
mʉsʉngʉkɨlanɨlaghe,
mʉghananaghe hwene vanamuunhu,
mʉvisaghe vakoola na kuuva vaanhu vanya lujisio.
9 Namʉngavangɨlaghe vano vavavombiile ʉvʉviivi,
nambe kuvangɨla amaligho ghano vavalighile,
looli mʉvavombelaghe inofu,
ʉlwakʉva ʉNgʉlʉve alyavakemeliile kuvomba isio.
Mʉ ʉluo ʉNgʉlʉve ɨkʉvafuunya.
10 Ndavʉle lɨlembilue mʉ Malembe aMɨmɨke kuuti,
“Ʉmuunhu ghweni jʉno ilonda kukukala vʉnofu
mʉ vwʉmi vwake,
na kukunooma ifighono fyoni,
avʉhɨlaghe kujova amasio amaviivi,
alekaghe kujova ʉvʉdesi.
11 Avʉlekaghe ʉvʉhosi,
avombaghe inofu.
Alondaghe kuuva nʉ lʉtengaano na vange,
avɨngɨlɨlaghe fiijo ʉluo.
12 Ʉlwakʉva ʉMʉtwa ʉNgʉlʉve ɨkʉvalola
nʉ vʉkoola avagholofu,
ɨkʉvapʉlɨka mʉ sino vikʉnsʉʉma.
Neke avaanhu vano vivomba inyɨvi,
naɨkʉvapʉlɨkɨsia.”c
13 Nave mughimba kuvomba inofu,
ghwe veeni jʉno ndepoonu ɨkʉvalemasia?
14 Neke nambe mupumusivua vwɨmɨla kuvomba isa vʉgholofu,
ʉmue mʉfunyilue.
Namʉngamwoghopaghe ʉmuunhu ghweni nambe kupumuka mʉ moojo ghiinu,
15 looli mʉmʉghiniaghe ʉKɨlɨsite kuhʉma nkate mʉ moojo ghiinu.
Ʉnsiki ghwoni mʉvisaghe mulɨngʼhanisie kʉkʉmwamʉla ʉmuunhu ghweni jʉno ɨkʉvaposia vwɨmɨla ʉlʉhʉvɨɨlo lwinu.
16 Mʉvombaghe ʉluo mʉ vʉkoola nʉ vwoghofi.
Mʉvisaghe nʉ mwojo ʉnnofu,
kuuti avaanhu vano vikʉvadesela,
na kʉkʉvaligha vwɨmɨla amaghendele ghiinu amanono mʉlwa kʉmʼbɨngɨlɨla ʉKɨlɨsite,
vajejevʉkaghe.
17 Nijova ʉluo,
ʉlwakʉva yekʉba kupumusivua vwɨmɨla kuvomba inofu nave ʉNgʉlʉve ikeela,
kukila kupumusivua vwɨmɨla kuvomba ʉvʉhosi.
18 Ghwope ʉKɨlɨsite alyafwile kamo keene vwɨmɨla inyɨvi siinu.
Ʉmwene alyale mʉgholofu,
alyafwile vwɨmɨla avahosi kuuti avaleete kwa Ngʉlʉve.
Alyabudilue kɨmʼbɨlɨ,
neke mʉ ngʉfu sa Mhepo ʉMwɨmɨke akava mwʉmi.
19 Mʉ ngʉfu sa Mhepo ʉjuo alyalʉtile kʉ vafue vano valyadindilue,
vighuula kuhɨghua,
akapʉlɨsia ɨmhola ja Ngʉlʉve kʉ veene.
20 Avafue avuo ve vano mʼbʉkʉʉlʉ,
ʉnsiki ghʉno ʉNwaka alyale itenda ɨsafina,
valyakanile kʉkʉmwɨtɨka ʉNgʉlʉve.
ɄNgʉlʉve aligudile vwɨmɨla inyɨvi saave kuhanga ʉnsiki ghʉno ɨsafina jitendua.
Mʉ safina ʉmuo vakingila avaanhu lekelakwoni veene vano ʉNgʉlʉve alyavapokile kufua na malenga.
21 Amalenga aghuo kɨhwanɨkɨsio kya lwofugho lʉno lʉkʉvapoka amasiki agha.
Ʉlwofugho ʉluo naluvalasia ʉvʉnyali vwa mʼbɨlɨ,
looli lʉfingo nʉ Ngʉlʉve lʉno luvombeka nʉ mwojo ʉmʼbalafu.
Lʉkʉvapoka ʉmue vwɨmɨla kusyʉka kwa Yesu Kɨlɨsite.
22 Ʉmwene ghwe jʉno alyalʉtile kʉkyanya,
alɨ nʉ vʉtavʉlɨlua palɨkɨmo nʉ Ngʉlʉve.
Atemile kʉ vanyamhola na kʉ fipelua ifinya vʉtavʉlɨlua ni finya ngʉfu fyoni kʉkyanya.