Avasalʉlua va Ngʉlʉve
2
Lɨno,
mʉvʉleke ʉvʉhosi vwoni nʉ vʉsyangi nʉ vʉkedʉsi nɨ kɨvini na maligho ghooni.
2 Ndavʉle avaana avafyele vʉle vinoghelua fiijo ɨlɨveele,
enendɨɨkɨ na jʉmue fye mʉlondaghe fiijo kunyua ʉtʉsiva ʉtʉnono tʉno lye lɨsio lya Ngʉlʉve,
neke mʉkʉlaghe mʉ vʉpoki.
3 Ndavʉle lɨlembilue mʉ Malembe aMɨmɨke kuuti,
“Mʉkagwile kuuti ʉMʉtwa ʉNgʉlʉve nnofu.”a
4 Mʉlʉtaghe kwa Mʉtwa ʉYesu,
ʉmwene ghwe lɨvue ɨlyʉmi ɨlya kʉjengela.
Ɨlɨvue ɨlio lɨlyakanilue na vaanhu,
neke pamaaso gha Ngʉlʉve,
lɨsalʉlua,
kange lɨnoghiile fiijo.
5 Na jʉmue mʉlɨ ndavʉle amavue amʉʉmi.
Mʉjengilue kuuva nyumba ja Mhepo ʉMwɨmɨke,
muno ʉmue mʉlɨ vatekesi vɨmɨke,
vano vitavʉla ɨlɨtekelo mʉ ngʉfu isa Mhepo ʉMwɨmɨke.
Ɨlɨtekelo ɨlio lɨkʉmhovosia ʉNgʉlʉve vwɨmɨla ʉYesu Kɨlɨsite.
6 Ndavʉle lɨlembilue mʉ Malembe aMɨmɨke kuuti,
“Lolagha,
mʉ lɨkaaja ɨlya Syoni,b
nivɨɨka ɨlɨvue ɨlɨvaha ɨlya pa nguto,c
ɨlɨvue lɨno nɨsalwile,
lya ndalama nyinga.
Ʉmuunhu ghweni jʉno ɨkʉmwɨtɨka,
naangasʉʉke!”d
7 Ɨlɨvue ɨlio kʉlyʉmue mwe vano mʉkʉmwɨtɨka,
lya ndalama nyinga.
Looli kʉ vano navikʉmwɨtɨka:
“Ɨlɨvue lɨno avajengi valyalɨkanile,
lye lɨvue ɨlɨvaha ɨlya pa nguto.”e
8 Kange lɨlembilue kuuti,
“Ɨlɨvue ɨlio,
lɨvue lya kʉkʉvala,
lɨnhalavue lya kʉghwɨsia avaanhu.”f
Avaanhu vikʉvala,
ʉlwakʉva navikʉlyɨtɨka ɨlɨsio lya Ngʉlʉve.
Ʉluo lwe lʉno ʉNgʉlʉve alyataviike vwɨmɨla aveene.
9 Looli ʉmue mʉsalulue nʉ Ngʉlʉve,
mʉlɨ vatekesi va kɨtwa.
Mʉlɨ kɨsina kyɨmɨke,
vaanhu va Ngʉlʉve jʉjuo.
Mʉsalulue kupʉlɨsia imbombo isa Ngʉlʉve,
jʉno alyavakemelile kuhʉma mʉ ngʼhiisi na kʉkʉvingisia mʉ lʉmuli lwake ʉlʉvaha ʉlwa kʉdegha.g
10 Ʉmue ʉlʉtasi namʉlyale vaanhu va Ngʉlʉve,
looli lɨno mʉlɨ vaanhu vaake;
naalyavahʉfisie ʉlʉsʉngʉ lwake,
looli lɨno avahʉfisie.
Avavombi va Ngʉlʉve
11 Vaghanɨke vango,
ʉlwakʉva mʉlɨ vahesia kange mʉlɨ vakilasɨla pa ɨɨsi apa,
nɨkʉvasʉʉma mʉvʉleke ʉvʉnoghelua ʉvwa mʼbɨlɨ ʉlwakʉva vunangania amoojo ghiinu.
12 Mʉvisaghe na maghendele amanono pakate pa vano navɨtɨki.
Nijova ʉluo,
ʉlwakʉva nave vikʉvadesela kuuti muvomba inyɨvi,
pano vikʉghaagha amaghendele ghiinu amanono,
vamʉghiniaghe ʉNgʉlʉve ɨkɨghono kɨno ilikwisa kuhɨgha avaanhu vooni.
13 Lɨno,
ʉlwakʉva ʉmue mʉlɨ mwa Mʉtwa ʉYesu,
mʉkʉndaghe kuvɨngɨlɨla ʉvʉtavʉlɨlua vwa ɨɨsi,
aave ghwe ntwa ghwa ɨɨsi,
ʉmwene ghwe mʼbaha ghwa fyoni,
14 nambe vaave ve vanjagɨla,
ʉlwakʉva vasalulue nʉ mwene kʉkʉvakopa avahosi na kʉkʉvaghinia vano vivomba inofu.
15 Nijova enendɨɨkɨ,
ʉlwakʉva ʉNgʉlʉve ilonda mʉvombaghe inofu,
kuuti avaanhu avajasu vano navankagwile ʉmwene,
vakunwaghe ɨkya kʉvapɨɨka ʉmue.
16 Ʉmue namʉlɨ vakami va muunhu,
mʉlɨ vavʉke.
Neke namʉngavombaghe ʉvʉhosi mʉ kɨteghe ɨkya vwavʉke,
looli mukalaghe ndavʉle lulondua kʉ vavombi va Ngʉlʉve.
17 Mʉvoghopaghe avaanhu vooni.
Mʉvaghanaghe avɨtɨki avajiinu.
Mʉmwoghopaghe ʉNgʉlʉve.
Mʉmwoghopaghe ʉntwa.
Kukuguda mʉ mhumuko
18 Ʉmue mwe vavombi mʉ nyumba sa vaanhu,
mʉvisaghe vakʉndi kʉ vavaha viinu na kʉkʉvoghopa fiijo.
Nakwekʉti mʉvoghopaghe avavaha avanofu na vakoola veene,
looli nava vakali.
19 Ʉlwakʉva mʉkʉmhovosia ʉNgʉlʉve pano mukuguda mʉ mhumuko sino namʉnoghiile mʉlwa kʉmʼbɨngɨlɨla ʉmwene.
20 Ʉlwakʉva kʉlɨ lʉvʉmbʉlɨlo lʉki nave mukuguda pano mutovua vwɨmɨla ʉvʉhosi vʉno mʉvombile?
Looli nave mukuguda imhumuko vwɨmɨla inofu sino mʉvombile,
mʉkʉmhovosia ʉNgʉlʉve.
21 ɄNgʉlʉve alyavakemeliile isio,
ʉlwakʉva ʉKɨlɨsite jʉjuo alyapumwike vwɨmɨla ʉmue,
akavalekela ɨkɨhwanɨkɨsio kuuti mʉvɨngɨlɨlaghe amaghendele ghaake.
22 “Ʉmwene naalyavombile inyɨvi,
nambe kujova ɨlɨsio lɨmonga ɨlya vʉsyangi.”h
23 Ʉmwene ye ilighua naalyagomwisie amaligho,
ye ipumusivua naalyavoghwifie,
looli alyamʉlekiile sooni ʉNgʉlʉve jʉno ihɨgha mʉ vwakyangʼhaani.
24 ɄKɨlɨsite jʉjuo alyapɨndile inyɨvi siitu mʉ mʼbɨlɨ ghwake mʉlwa kʉfua pa kɨkovekano.
Alyavombile ʉluo kuuti tʉleke kulongosivua nʉ vʉhosi,
looli tʉlongosivwaghe nʉ vʉgholofu.
Vwɨmɨla kulemasivua kwa mwene,
ʉmue mʉponile.
25 Ʉlwakʉva ʉmue mʉlyale hwene ngʼholo sino sisova,
looli lɨno mʉnʼgomokiile ʉNʼdɨɨmi,
ʉMʉloleleli ghwa moojo ghiinu.