Ɨkalata ɨja kwanda ɨja
Peteli
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Peteli,
ne nsungʼhua ghwa Yesu Kɨlɨsite.
Nɨkʉvalembela ʉmue mwe vasalʉlua va Ngʉlʉve,
mwe vano mʉpalasiine na kukukala mʉ ɨɨsi isa vʉhesia:
mʉ kɨghavoa ɨkya Ponto,
ɨkya Galatia,
ɨkya Kapadokia,
ɨkya Asia nɨ kya Bitinia.
2 ɄNgʉlʉve ʉNhaata alyavasalwile ʉmue kuhʉma mʼbʉkʉʉlʉ mʉlwa kʉvavɨɨka kuuva vɨmɨke kukilila ʉMhepo ghwake.
Alyavombile ʉluo kuuti,
mʉmwoghopaghe ʉYesu Kɨlɨsite na kʉkʉvavalasia kuuva vɨmɨke vwɨmɨla ɨdanda jaake.
ɄNgʉlʉve avongelesyaghe ʉlʉsʉngʉ nʉ lʉtengaano.
Ʉlʉhʉvɨɨlo ʉlwa vʉpoki
3 Aghinwaghe ʉNgʉlʉve ʉNhaata ghwa Mʉtwa ghwitu ʉYesu Kɨlɨsite,
ʉlwakʉva mʉ lʉsʉngʉ lwake ʉlʉvaha alyatʉholile vʉpia vwɨmɨla kʉkʉnsyʉsia ʉYesu Kɨlɨsite kuhʉma kʉ vafue.
Mʉ ʉluo atʉpeleliile kuuva nʉ lʉhʉvɨɨlo ʉlwa vwʉmi,
4 kuuti twʉpɨle sino ʉNgʉlʉve alyalaghile kʉkʉtʉpeela twe vaanhu vaake.
Atʉvɨkiile isio kʉkyanya kʉno nasivola,
nambe kunangɨka,
nambe kusakala.
5 ɄNgʉlʉve avavɨkiile isio,
ʉmue mwe vano ɨkʉvalolelela vʉnofu mʉ ngʉfu saake vwɨmɨla ʉlwɨtɨko lwinu,
kuuti akalivapeele ʉvʉpoki vʉno alɨngʼhanisie kʉkʉvahʉfia ɨkɨghono ɨkya vʉsililo.
6 Mʉhovokaghe vwɨmɨla isio sino ʉNgʉlʉve ilikʉvavombela,
napano lɨno mʉnoghiile kusukunala kʉ nsiki nʼdebe vwɨmɨla ingelo sino sili papinga.
7 Ingelo isio sipelela kuhʉfia ʉlwɨtɨko lwinu ʉlwa kyangʼhaani.
Jɨ sahabu jɨjio jɨno jinangɨka,
vighela mʉlwa kʉnyaanya pa mwoto,
neke jɨvoneke ɨsahabu ɨnono.
Lɨno,
ʉlwɨtɨko lwinu lʉno lʉnoghiile kukila ɨsahabu,
lʉnoghiile kughelua,
neke lʉvoneke kuuti lwa kyangʼhaani.
Apuo ʉNgʉlʉve ilikʉvapaala na kʉkʉvaghinia ɨkɨghono kɨno iligomoka ʉYesu Kɨlɨsite.
8 Ʉmue mʉmʉghanile ʉYesu napano namʉmwaghile,
mʉkʉmwɨtɨka napano lɨno namʉkʉmwagha.
Palɨkɨmo nʉluo,
mʉlɨ nʉ lʉkeelo ʉlʉvaha lʉno nalujoveka,
9 ʉlwakʉva mukwʉpɨla ʉvʉpoki.
Ʉvʉpoki ʉvuo vwe vʉfumbue vwa lwɨtɨko lwinu kwa Kɨlɨsite.
10 Avavɨli vano valyavɨlile imhola isa lʉsʉngʉ lwa Ngʉlʉve lʉno lukwisa,
vakalolesyagha fiijo na kuposelesia kuuti vakagʉle vʉle ʉNgʉlʉve ilikʉvapoka.
11 Ʉlwakʉva ʉMhepo ghwa Kɨlɨsite jʉno alyale nkate mʉ veene,
alyavavʉlile kuuti ʉYesu Kɨlɨsite ilipumuka,
neke pambele iiva nʉ vʉvaha.
Avavɨli avuo vakalolesyagha fiijo na kuposelesia kuuti vakagʉle imhola isio silihʉmɨla lɨɨghi,
kange silihʉmɨla ndaani.
12 ɄNgʉlʉve akavahʉfia kuuti,
ɨmbombo jaave ɨja kʉvɨla najɨlyale vwɨmɨla aveene,
looli jɨlyale vwɨmɨla ʉmue.
Imhola isio mʉsipʉliike kuhʉma kʉ vaanhu vano vipʉlɨsia ɨMhola ɨNofu mʉ ngʉfu isa Mhepo ʉMwɨmɨke jʉno alyasungʼhilue kuhʉma kʉkyanya.
Imhola isio,
avanyamhola vinoghelua kʉkʉsikagʉla.
Kuuva vɨmɨke
13 Lɨno,
mulɨngʼhaniaghe na kukulolelela,
mʉhʉvɨlaghe fiijo ʉlʉsʉngʉ lʉno mulipelua ɨkɨghono kɨno iligomoka ʉYesu Kɨlɨsite.
14 Mʉvisaghe vakʉndi kwa Ngʉlʉve ndavʉle avaana avakʉndi,
mʉlekaghe kulongosivua nʉ vʉnoghelua vwinu vʉno mʉlyale navwo ye mʉkyale kʉkʉnkagʉla ʉNgʉlʉve.
15 Looli,
mʉvisaghe vɨmɨke mʉ mikalɨle ghiinu ndavʉle ʉNgʉlʉve jʉno avakemelile vʉle mwɨmɨke.
16 Ʉlwakʉva lɨlembilue mʉ Malembe aMɨmɨke kuuti,
“Mʉvisaghe vɨmɨke,
ʉlwakʉva ʉne nɨlɨ mwɨmɨke.”b
17 ɄNgʉlʉve jʉno mʉkʉntambʉla Nhaata mʉ nyifuunyo siinu,
ghwe jʉno ɨkʉvahɨgha avaanhu vooni kulɨngʼhana na maghendele ghaave,
naisalʉla muunhu.
Lɨno,
mʉmwoghopaghe fiijo ʉnsiki ʉghʉ ghʉno mukukala hwene vahesia mʉ ɨɨsi muno.
18 Nijova enendɨɨkɨ,
ʉlwakʉva mʉkagwile vʉle ʉNgʉlʉve alyavavangile kuhʉma mʉ maghendele ghiinu,
ghano naghanoghiile ghano mʉlyʉpiile kʉ vakʉʉlʉ viinu.
ɄNgʉlʉve naalyavavangile ni fiinu fino finangɨka ndavʉle indalama nambe isahabu,
19 looli alyavavangile nɨ danda ɨnhalamu ɨja Yesu Kɨlɨsite,
jʉno alyale hwene nyanangʼholoc ɨja lɨtekelo,
ɨsila vʉlema nambe lɨdeeha.
20 Ʉmwene alyasalulue nʉ Ngʉlʉve kuhʉma mʼbʉkʉʉlʉ,
ye jɨkyale kupelua ɨɨsi,
neke mʉ masiki agha,
agha vʉsililo ʉNgʉlʉve akamhʉfia vwɨmɨla ʉmue.
21 Vwɨmɨla ʉKɨlɨsite ʉjuo,
ʉmue mʉkʉmwɨtɨka ʉNgʉlʉve,
jʉno alyansyʉsisie kuhʉma kʉ vafue na kʉkʉmpeela ʉvʉvaha.
Mʉ ʉluo mʉkʉmwɨtɨka ʉNgʉlʉve na kʉkʉmhʉvɨɨla.
22 Ʉmue muvalisie amoojo ghiinu vwɨmɨla kukʉnda ʉvwakyangʼhaani,
na kʉkʉvaghana avajiinu kɨsila vʉkedʉsi,
lɨno mʉghananaghe nʉ mwojo ghwoni.
23 Nijova ʉluo ʉlwakʉva mʉholilue vʉpia.
Nakwekʉti mʉholilue kɨmʼbɨlɨ,
ʉlwakʉva kuholua kɨmʼbɨlɨ ʉvʉsililo vwake vwe vʉfue.
Ʉlwene mʉholilue kuuva nʉ vwʉmi ʉvwa kʉvʉsila kʉsila,
ʉvwʉmi vʉno vuhʉma mʉ ngʉfu isa lɨsio lya Ngʉlʉve.
Ɨlɨsio ɨlio lɨnya vwʉmi kange lya fighono fyoni.
24 Ndavʉle lɨlembilue mʉ Malembe aMɨmɨke kuuti,
“Avaanhu vooni valɨ ndavʉle ɨlɨsoli.
Ʉlʉtogo lwave lwa nsiki nʼdebe ndavʉle amalʉva.
Ɨlɨsoli likwʉma,
amalʉva ghijoghotoka,
ghisangʉka.
25 Looli ɨlɨsio lya Mʉtwa ʉNgʉlʉve lya fighono fyoni.”d
Ɨlɨsio ɨlio je Mhola ɨNofu jɨno jɨpʉlɨsivue kʉlyʉmue.