Kukuvɨɨka mʉ mavoko gha Ngʉlʉve
4
Amabaatu na kukanɨngʼhana pakate palyʉmue fihʉma kʉʉghi?
Asi,
nafihʉma mʉ vʉnoghelua vwinu vʉno navukwɨtɨngʼhana lwoni na moojo ghiinu?
2 Munoghelua ifiinu neke namukava.
Mʉ ʉluo ndepoonu mulamʉla kubuda.
Munoghelua kuuva ni fiinu,
neke namukava.
Mʉ ʉluo,
muuva na mabaatu na kulua.
Namukava fino mulonda,
ʉlwakʉva namusʉʉma kwa Ngʉlʉve.
3 Nambe musʉʉma,
ʉNgʉlʉve naɨkʉvapeela,
ʉlwakʉva musʉʉma fivi,
musʉʉma fino mulonda mʉ vʉnoghelua vwinu ʉvʉviivi.
4 Ʉmue mwe vano mʉlɨ ndavʉle avaghendamwalu,
namukagʉla kuuti kʉkʉjɨghana ɨɨsi kupelela kuuva mʉlʉgʉ ghwa Ngʉlʉve?
Ʉmuunhu ghweni jʉno ajɨghanile ɨɨsi iiva mʉlʉgʉ ghwa Ngʉlʉve.
5 Pamo musaagha kuuti aMalembe aMɨmɨke ghijova vʉvʉle pano ghiiti,
“ɄNgʉlʉve ipumuka fiijo vwɨmɨla ʉMhepo ghwake jʉno amʼbɨkile mʉ moojo ghiitu pano ivona tuvʉhɨɨla kʉkʉmʉghana ʉmwene.”
6 Palɨkɨmo nʉluo,
ɨkʉtʉpeela ʉlʉsʉngʉ ʉlʉvaha kukila,
ndavʉle lɨlembilue mʉ Malembe aMɨmɨke kuuti,
“ɄNgʉlʉve ɨkʉvakaana vano vikughinia,
looli ɨkʉvasʉngʉkɨla vano vikujisia.”a
7 Lɨno,
mʉnkʉndaghe ʉNgʉlʉve kuuva Mʉtwa ghwinu.
Mʉnkanaghe ʉSetano pe ɨkʉvakɨmbɨla.
8 Mʉvisaghe piipi nʉ Ngʉlʉve,
ghwope iiva piipi numue.
Mʉlekaghe kuvomba inyɨvi mwe vahosi ʉmue,
muvalasie amoojo ghiinu mwe vakedʉsi ʉmue.
9 Mʉsukunalaghe na kulɨla na kujɨjɨvɨla vwɨmɨla ʉvʉhosi vwinu.
Mʉlekaghe kuseka looli mʉjɨjɨvɨlaghe,
mʉlekaghe kuuva nʉ lʉkeelo,
looli mʉsukunalaghe.
10 Mujisyaghe pamaaso gha Mʉtwa,
ghwope kyaɨkʉvaghinia.
Mʉlekaghe kuhɨghana
11 Vanyalʉkolo vango,
mʉlekaghe kujovana fivi.
Jʉno ɨkʉnʼjova fivi ʉmwɨtɨki ʉnʼjaake nambe kʉkʉmhɨgha,
ʉjuo iiva ibenapʉla na kʉkʉsivona indaghɨlo sa Ngʉlʉve mbiivi.
Nave ghuvona indaghɨlo mbiivi,
apuo pe ghuuva naghʉkʉsivɨngɨlɨla,
looli ghuvɨkile kuuva mʉlamʉsi ghwa ndaghɨlo.
12 ɄNgʉlʉve mwene ghwe jʉno avɨkile indaghɨlo,
kange ghwe jʉno ihɨgha.
Ʉjuo ghwe mwene alɨ ni ngʉfu isa kʉpoka na kutipula.
Lɨno,
ʉve veeve veeni ghwe jʉno ʉkʉmhɨgha ʉnʼjaako?
Ʉlʉpavɨlo vwɨmɨla ʉlughinio
13 Lɨno,
mʉmhʉlɨkɨsie vʉnofu,
ʉmue mwe vano mwiti,
“Ʉmʉsyʉghʉ nambe pakɨlaavo,
tulʉta mʉ lɨkaaja lɨmonga.
Ʉkuo tukukala ʉmwaka ghwoni tughʉlagha na kughʉsia ifiinu na kukava indalama nyinga.”
14 Ʉmue namʉkagwile vwɨmɨla ʉvwʉmi vwinu mʉ kɨghono ɨkya pakɨlaavo,
mʉlɨ ndavʉle ʉmwʉja ghʉno ghuvoneka ʉnsiki nʼdebe vʉvʉle na kusovanɨka.
15 Mʉveele mʉnoghiile mʉʉti,
“Nave ʉMʉtwa akeele tʉjighe vʉʉmi,
tuvomba ɨkɨ nambe kɨla.”
16 Neke ʉmue mukughinia na kukudadimba mʉ sino musaagha kuvomba.
Kukughinia ndavʉle ʉkuo kʉviivi.
17 Lɨno,
ʉmuunhu ghweni jʉno asikagwile inofu,
neke naivomba,
iiva ivomba inyɨvi.