Imhavɨlo vwɨmɨla avamofu
5
Lɨno,
mʉmhʉlɨkɨsie vʉnofu ʉmue mwe vamofu!
Mʉlɨlaghe na kujɨjɨvɨla vwɨmɨla ʉlʉpumuko lʉno lʉkʉvisila.
2 Ɨkyʉma kiinu kɨnangiike,
amenda ghiinu ghalɨvilue nʉ mhehe.
3 Isahabu ni ndalama siinu sighwile ɨngʼhusa.a
Ɨngʼhusa ɨjio jivonia vʉle muvombela fivi ʉvʉmofu vwinu.
Mʉ ʉluo ʉNgʉlʉve ilikʉvatipula,
ndavʉle ʉmwoto vʉle ghunyanyɨlɨla ifiinu.
Ʉmue muvuta ifiinu fiinu mʉ fighono ifi ifya vʉsililo!
4 Ʉmue namʉvahombile avavombi viinu,
vano vapetile mʉ maghʉnda ghiinu.
Lɨno pʉlɨkɨsia,
ʉlʉhombo lʉno namʉvapeliile lukuuta pamaaso gha Ngʉlʉve.
Ʉlʉngʼuulo lwa vavombi avuo vano vapetile,
lʉfikile kwa Mʉtwa ʉNgʉlʉve ʉNyangʉfu Sooni.
5 Ʉmue mukunooma mʉ ɨɨsi muno,
muvomba sino mukeela mʉ vʉnoghelua vwinu,
mʉneniipe ndavʉle ingʼombe,
mughuula ʉnsiki ʉghwa kʉhɨnjua.
6 Mʉvahɨghile na kʉkʉvabuda avaanhu avagholofu,
avaanhu vano navakaale vikʉvasigha mʉ sino mʉkʉvavomba.
Kukuguda mʉ mhumuko
7 Lɨno vanyalʉkolo vango,
mugudaghe kuhanga iliiva ikwisa ʉMʉtwa ʉYesu.
Mʉlolaghe ʉnya kʉlɨma vʉle ighuula nʉ lugudo ifiinu fyake mʉ mʉghʉnda,
fikwela vʉnono na kumotoka.
Ighuula kuhʉma ɨfula ɨndongosi kuhanga kufika ɨfula ɨja vʉsililo.
8 Na jʉmue mugudaghe,
mʉlekaghe kudendevʉka mʉ moojo ghiinu,
ʉlwakʉva ʉMʉtwa ʉYesu alɨ piipi kukwisa.
9 Vanyalʉkolo vango,
namʉngapɨkanaghe neke mʉleke kuhɨghua nʉ Ngʉlʉve.
Pʉlɨkɨsia,
ʉMhɨghi alɨ piipi,
alɨ pa mʉlyango!
10 Vanyalʉkolo vango,
mʉkʉmbʉke avavɨli vano vakapʉlɨsyagha ɨmhola kuhʉma kwa Ngʉlʉve!
Nambe valyale vipumuka,
vakigudagha.
Na jʉmue mugudaghe ndavʉle aveene.
11 Avaanhu avuo tʉkʉvatambʉla tuuti vafunyilue ʉlwakʉva valigudile.
Mʉpʉliike imhola isa lugudo lwa Yoobu,
na vʉle ʉMʉtwa ʉNgʉlʉve akantanga pambele.
ɄMʉtwa ʉNgʉlʉve alɨ nɨ kɨsa nɨ lɨpyana.
12 Ɨkɨvaha vanyalʉkolo vango,
namʉngajɨghaghe mʉlwa kʉtambʉla kʉkyanya nambe pa ɨɨsi nambe kutambʉla ɨkɨɨnu ɨkɨngɨ.
Ʉlwene nave mukwɨtɨka mʉtisaghe,
“Eena,”
nave mukaana mʉtisaghe,
“Ndali,”
kuuti mʉleke kuhɨghua.
Kʉkʉnsʉʉma ʉNgʉlʉve mʉ lwɨtɨko
13 Asi,
pakate palyʉmue pwale jʉno ipumuka?
Anoghiile kʉkʉnsʉʉma ʉNgʉlʉve.
Asi,
pwale ʉnya lʉkeelo?
Anoghiile kukwɨmba inyɨmbo isa kʉmpaala ʉNgʉlʉve.
14 Pakate palyʉmue pwale ʉntamu?
Avakemelaghe avaloleleli va kɨpʉgha ɨkya vɨtɨki kuuti vansʉmɨle na kʉkʉmpaka amafutab mʉ lɨtavua lya Mʉtwa.
15 Voope vangansʉʉme ʉNgʉlʉve mʉ lwɨtɨko,
ʉntamu ʉjuo isooka.
ɄMʉtwa ɨkʉnsosia nambe aave akavombile inyɨvi,
ipyanɨlua.
16 Lɨno,
nʉjʉnge alataghe inyɨvi saake kwa nʼjaake na kusʉmɨlanɨla kuuti ʉNgʉlʉve avasosie.
Inyifuunyo isa muunhu ʉmʉgholofu sili ni ngʉfu,
sipelela sino mʉsʉmile kuvombeka.
17 Ʉmʼbɨli ʉEliya alyale muunhu ndavʉle jʉsue,
akifuunya nʉ mwojo ghwoni kuuti ɨfula jɨleke kutoonya,
najɨkatoonya amaaka ghatatu na meesi ntanda.
18 Pambele,
akifuunya kange,
ɨfula jɨkatoonya,
ifiinu fikamela mʉ ɨɨsi.c
19 Vanyalʉkolo vango,
nave jʉmonga pakate palyʉmue asovile,
avʉlekile ʉvwakyangʼhaani,
neke nave ʉnʼjaake anʼgomwisie,
20 mʉkagʉlaghe kuuti ʉmuunhu jʉno ɨkʉnʼgomosia ʉmhosi kuhʉma mʉ sɨla ɨja vʉhosi,
ɨkʉmpoka ʉmhosi ʉjuo kuuti aleke kukwingila kʉvʉfue.
Kange,
ɨkʉmpelela apyanɨlue inyɨvi saake nyinga.