Ɨkalata kʉ
Vaebulania
Ɨmhola ɨndongosi
Ʉmuunhu jʉno alyalembile ɨkalata ɨjɨ naakagʉliike. Neke luvoneka kuuti ʉmuunhu ʉjuo alyale mwɨtɨki. Kange, alyale nʉ vʉtavʉlɨlua vʉmonga kʉ fipʉgha ifya vɨtɨki mʉ nsiki ghʉno ʉPaulo ilemba ikalata saake kʉ fipʉgha ifya vɨtɨki. Ɨkalata ɨjɨ jɨlyalembilue kʉ Vayahudi vamonga vano valyale vɨtɨki, neke valyale vighelua kʉkʉlʉleka ʉlwɨtɨko.
Ʉmʉlembi ghwa kalata ɨjɨ ɨkʉmhʉfia ʉYesu Kɨlɨsite vʉle alɨvuo kʉ vɨtɨki vooni. Ihʉfia kuuti, ʉYesu Mwana ghwa Ngʉlʉve, kange mʼbaha kukila avanyamhola vano aVayahudi vikʉvaghinia. Mʼbaha kukila avavɨli ava mʉ Lʉfingo ʉLʉkʉʉlʉ, kange mʼbaha kukila ʉMoose jʉno alyavapeliile aVayahudi indaghɨlo sa Ngʉlʉve. Kange, ʉmʉlembi ijova kuuti ʉYesu avombile ɨmbombo ɨmbaha kukila avatekesi va Vayahudi, ʉlwakʉva naaghelile kuvomba inyɨvi, alitavwile kuuva lɨtekelo lya nyɨvi sa vaanhu vooni.
Mʉ vʉsililo vwa kalata ɨjɨ, ikwoleka imhola isa vakʉʉlʉ va Vayahudi vano valembilue mʉ Lʉfingo ʉLʉkʉʉlʉ. Ikwoleka vʉle valyale vikʉmwɨmɨka ʉNgʉlʉve na kʉkʉmhʉvɨɨla. Lɨno ɨkʉvakʉmbʉsia avɨtɨki kuuti, voope vilondua kujigha vikʉmhʉvɨɨla ʉNgʉlʉve, kange vakʉmbʉkaghe sino ʉYesu akavombagha na kuvʉlanɨsia.