Ɨkalata kʉ
Vaebulania
ɄNgʉlʉve ijova nusue kukilila ʉMwanaake
1
Mʼbʉkʉʉlʉ,
ʉNgʉlʉve akajovagha na vakʉʉlʉ viitu kukilila avavɨli.
Kekinga akavombagha ʉluo,
mʉ sɨla sino sili papinga.
2 Neke amasiki agha,
agha vʉsililo ʉNgʉlʉve ajovile nusue kukilila ʉMwanaakea jʉno alyansalwile kuuva mhaasi ghwa fiinu fyoni,
kange kukilila ʉMwanaake ʉjuo alyapelile fyoni.
3 ɄMwanaake ʉjuo ghwe lʉmuli lʉno luhʉfia ʉvʉvaha vwa Ngʉlʉve,
kange ghwe kɨhwani kya kyangʼhaani kya Ngʉlʉve jʉjuo.
Ʉmwene ghwe jʉno afivɨkile ifiinu fyoni mʉ ngʉfu isa lɨsio lyake fiive ndavʉle filivuo.
Ye avavalisie avaanhu inyɨvi saave,
akalʉta kʉkyanya,
alɨ nʉ vʉtavʉlɨlua palɨkɨmo nʉ Ngʉlʉve ʉMʼbaha.
ɄMwana ghwa Ngʉlʉve mʼbaha kukila avanyamhola
4 ɄNgʉlʉve alyamʼbɨkile ʉMwanaake kuuva mʼbaha kukila avanyamhola,
ndavʉle ɨlɨtavua lɨno alyapelilue vʉle lɨvaha kukila amatavua ghaave.
5 Ʉlwakʉva ʉNgʉlʉve naaghelile kʉkʉmʼbʉʉla ʉnyamhola nambe jʉmo kuuti,
“Ʉve ʉlɨ Mwanango,
ʉne ʉmʉsyʉghʉ nɨlɨ Vaaso.”b
Nambe kʉkʉmʼbʉʉla kuuti,
“Ʉne niiva Vaaso,
na jʉʉve ghuuva Mwanango.”c
6 ɄNgʉlʉve ye ansungʼhile mʉ ɨɨsi ʉMwanaake jʉno alɨ jʉmo mwene alyatiile,
“Avanyamhola vooni vamwɨmɨkaghe.”d
7 Kange,
ye ijova isa vanyamhola,
alyatiile,
“Avavɨkile avanyamhola vaake kuuva hwene mhepo,e
avavombi vaake kuuva hwene ndape sa mwoto.”f
8 Neke vwɨmɨla ʉMwanaake,
lijovua kuuti,
“ɄVʉtwa vwako Ngʉlʉve,
vwa fighono fyoni,
ghutemagha avaanhu vaako mʉ vʉgholofu.
9 Ʉvʉghanile ʉvwakyangʼhaani na kukalalɨla ʉvʉhosi,
fye nambe ʉNgʉlʉve,
ʉNgʉlʉve ghwako,
akwɨmiike,
na kʉkʉkʉpeela ʉlʉkeelo kukila avajaako vooni.”g
10 Kange lijovua kuuti,
“Ʉve Mʉtwa kʉvʉtengʉlɨlo ʉlyapelile ɨɨsi,
kange veeve ʉlyapelile ʉvʉlanga.
11 Ifio fyoni filanangɨka,
filasakala hwene mwenda,
looli ʉve ghujigha ifighono fyoni.
12 Ghulighunjania ɨɨsi nʉ vʉlanga hwene sopeka,
ghulikwandʉla hwene mwenda.
Looli ʉve ghujigha vʉle ʉlɨvuo,
ʉvwʉmi vwako vʉsila vʉsililo.”h
13 ɄNgʉlʉve naaghelile kʉkʉmʼbʉʉla nambe jʉmo mʉ vanyamhola vaake kuuti,
“Ʉʉve nʉ vʉtavʉlɨlua palɨkɨmo nuune,
kuhanga nɨkʉtange ʉvaleme avalʉgʉ vaako,
ʉvateme.”ij
14 Lɨno,
avanyamhola ve vaveeni?
Isio se mhepo sino sikʉmʼbombela ʉNgʉlʉve,
ɨkʉsisuungʼha kʉkʉvatanga vano vilikwʉpɨla ʉvʉpoki.