Namʉngabenapʉlaghe ʉvʉpoki vwa Ngʉlʉve
2
Mʉ ʉluo,
tʉgadɨlɨlaghe fiijo imbʉlanɨsio sino tʉpʉliike,
kuuti tʉleke pisova na kuvɨngɨlɨla isingi.
2 Ɨmhola jɨno avanyamhola valyavavʉlile avakʉʉlʉ viitu jɨlyale ja kyangʼhaani,
ʉmuunhu jʉno naakavɨngɨlɨlagha na kukʉnda ɨmhola ɨjio,
lʉkamwaghagha ʉlʉkwegho lwa Ngʉlʉve.
3 Lɨno,
ʉsue ndepoonu tukuluka ndaani ʉlʉkwegho lwa Ngʉlʉve,
nave natuvɨkɨla mwojo ʉvʉpoki ʉvʉvaha enendɨɨkɨ?
ɄMʉtwa ʉYesu jʉjuo ghwe jʉno alyatalile kupʉlɨsia ɨmhola ɨja vʉpoki ʉvuo,
avaanhu vano valyampʉliike vakatʉvʉʉla kuuti ɨmhola ɨjio ɨja vʉpoki,
ja kyangʼhaani.
4 Ghwope ʉNgʉlʉve akavonia kuuti,
ɨmhola ɨjio ja kyangʼhaani mʉlwa kʉvapeela avaanhu avuo ingʉfu kuvomba ifivalɨlo ni fidegho fino fili papinga,
palɨkɨmo na kʉkʉvapeela ifipelua ifya Mhepo ʉMwɨmɨke mʉ vughane vwake.
Ʉlʉjisio lwa Yesu kʉkʉtʉvanga ʉsue
5 ɄNgʉlʉve naalyavavɨkile avanyamhola kutema ɨɨsi ɨmhia jɨno jikwisa.
Ɨɨsi ɨjio je jɨno tujova imhola saake.
6 Looli pamonga mʉ Malembe aMɨmɨke lɨlembilue kuuti,
“Ʉmuunhu ghwe veeni neke ʉntʉngʉmalɨle?
Ʉmuunhu ghwe veeni neke ʉmʼbɨkɨle ʉmwojo?
7 Ʉkamʼbɨkile ʉmuunhu kuuva nʼdebe kukila avanyamhola
kʉ nsiki nʼdebe.
Ʉkampeela ʉvʉvaha nʉ vwoghopua,
8 ʉkamʼbɨɨka kutema ifiinu fyoni.”a
Pano lijovua kuuti,
ʉmʼbɨkile kutema ifiinu fyoni,
kwekʉti nakwekɨlɨ nambe kɨmo kɨno nakɨlɨ mʉ vʉtavʉlɨlua vwake.
Lijovua ɨlio napano lɨno natʉkagwile kuuti apelilue ʉvʉtavʉlɨlua ʉvwa kʉtema ifiinu fyoni.
9 Neke tuvona ʉYesu kʉ nsiki nʼdebe,
alyavɨkilue kuuva nʼdebe kukila avanyamhola,
kuuti mʉ lʉsʉngʉ lwa Ngʉlʉve afue pa kɨkovekano vwɨmɨla avaanhu vooni.
Lɨno,
vwɨmɨla kufua pa kɨkovekano,
ʉpiile ʉvʉvaha nʉ vwoghopua.
10 ɄNgʉlʉve ʉMpeli ghwa fiinu fyoni,
alyavwene lʉnono amʼbɨɨke ʉYesu,
kuuva nkwɨlanɨfu kukilila imhumuko.
Alyavombile ʉluo kuuti avapoke avaanhu vinga,
neke voope vʉpɨle ʉvʉvaha vwake.
11 ɄYesu jʉno ivalasia avaanhu,
na vaanhu avuo vano vivalasivua,
vooni ʉNhaata ghwave ghwe jʉmo.
Fye nambe ʉYesu naivona soni kʉkʉvatambʉla avaanhu avuo vanyalʉkolo vaake.
12 Ʉmwene iiti,
“Ghwe Ngʉlʉve,
nipʉlɨsyagha ʉvʉvaha vwako
kʉ vanyalʉkolo vango,
nɨkʉkʉghiniagha pakate pa kɨpʉgha
kya vaanhu vaako.”b
13 Kange iiti,
“Nɨkʉmhʉvɨlagha ʉNgʉlʉve.”c
Kange iiti,
“Ʉne nɨlɨ apa palɨkɨmo na vaana
vano amheliile ʉNgʉlʉve.”d
14 Lɨno,
ʉlwakʉva avaana vano alyapelilue valɨ nʉ mʼbɨlɨ,
ghwope ʉYesu alisile nʉ mʼbɨlɨ ndavʉle amavɨlɨ ghaave.
Alyavombile ʉluo kuuti vwɨmɨla kufua kwa mwene,
asileme ingʉfu sa Setano jʉno alyale ni ngʉfu isa kʉleeta ʉvʉfue.
15 Kange,
ʉYesu alyavombile ʉluo,
kʉkʉvavɨɨka vavʉke avaanhu vooni vano valyale vakami mʉ vwʉmi vwave vwoni vwɨmɨla kukwoghopa ʉvʉfue.
16 Ʉluo luvonia kuuti,
ʉYesu naalisile kʉkʉvatanga avanyamhola,
looli alisile kʉkʉvatanga avaanhu ava kɨsina kya Abulahamu.e
17 Mʉ ʉluo akanoghiile ahwanane na vanyalʉkolo vaake mʉ sooni kuuti aave ntekesi mʼbaha,f
nya lʉsʉngʉ,
kange nnofu mʉ mbombo ja Ngʉlʉve,
neke atavʉle ɨlɨtekelo ɨlya kʉpyanɨla avaanhu ʉvʉhosi vwave.
18 Ʉmwene anoghiile kʉkʉvatanga vano vighelua na kupumusivua,
ʉlwakʉva ʉmwene jʉjuo alyaghelilue na kupumusivua.