ɄYesu mʼbaha kukila ʉMoose
3
Lɨno,
vanyalʉkolo vango,
ʉmue mwe vɨmɨke,
mwe vano mʉkemelilue nʉ Ngʉlʉve ndavʉle ʉsue,
mʉnkagʉlaghe vʉnofu ʉYesu ʉnsungʼhua,
ʉntekesi ʉmʼbaha jʉno tʉkʉmwɨtɨka.
2 Ʉmwene alyale nnofu pamaaso gha Ngʉlʉve jʉno alyansalwile,
ndavʉle ʉMoose vʉle alyale mʼbombi nnofu kulongosia avaanhu vooni ava Ngʉlʉve,
aVaisilaeli.a
3 Neke ʉYesu anoghiile kughinisivua kukila ʉMoose,
ndavʉle ʉnʼjenga nyumba vʉle ighinisivua kukila ɨnyumba jɨno ajengile.
4 Ʉlwakʉva kɨla nyumba jijengua nʉ nʼjengi jʉmonga,
neke ʉMpeli ghwa fyoni ghwe Ngʉlʉve.
5 ɄMoose alyale mʼbombi nnofu kulongosia avaanhu va Ngʉlʉve,
aVaisilaeli.
Ɨmbombo jaake jɨlyale ja kʉvavʉʉla sino ʉNgʉlʉve ilijova pambele.
6 Neke ʉKɨlɨsite Mwana nnofu,
mwɨmɨlɨli ghwa vaanhu va Ngʉlʉve.
Na jʉsue tʉlɨ vaanhu va Ngʉlʉve,
nave tugadɨlɨla vʉnofu na kukangala mʉ lʉhʉvɨɨlo lʉno tʉlɨ nalwo.
Ʉlʉpavɨlo kʉ vano navikʉnkʉnda ʉNgʉlʉve
7 Lɨno,
ndavʉle ijova ʉMhepo ʉMwɨmɨke,
“Ʉmʉsyʉghʉ,
nave mupʉlɨka sino ijova ʉNgʉlʉve,
8 mʉlekaghe kuuva vasiiti,
ndavʉle avakʉʉlʉ viinu ye vikʉngʼhaana,
amasiki ghala ye vikʉngela kʉ lʉkʉve.
9 Ʉkuo avakʉʉlʉ viinu vakava vikʉngela,
napano valyasivwene sooni
sino nɨlyavombile amaaka fijigho fine.
10 Mʉ ʉluo nɨkavakalalɨla avaanhu avuo,
nɨkati,
‘Avaanhu ava,
vahosi ifighono fyoni,
navilonda kʉkʉmbɨngɨlɨla.’
11 Mʉ ʉluo nɨkakalala,
nɨkajɨɨgha,
nɨkati,
‘Kyangʼhaani navikwingila
kʉ vʉpʉʉmo kʉno nɨvalɨngʼhanɨkisie.’ ”b
12 Vanyalʉkolo vango,
mulolelelaghe,
pakate palyʉmue napeangavisaghe ʉnya nhumbula ɨmbiivi,
jʉno naikwɨtɨka na kukubaghʉla kwa Ngʉlʉve jʉno mwʉmi.
13 Ʉlwene mʉkangasaniaghe ifighono fyoni,
namʉngavʉhɨlaghe nambe kɨghono kɨmo.
Mʉvombaghe ʉluo kuuti,
ʉmuunhu ghweni pakate palyʉmue naangavisaghe nsiiti kʉkʉnkʉnda ʉNgʉlʉve,
vwɨmɨla kusyangua nʉ vʉhosi.
14 Tʉlɨ vʉhangɨlanɨsi nʉ Kɨlɨsite nave tugadɨlɨla vʉnofu ʉlʉhʉvɨɨlo lwitu lʉno tʉlyʉpiile kuhʉma ye tukwɨtɨka kuhanga kufika kʉvʉsililo.
15 Ndavʉle lɨlembilue mʉ Malembe aMɨmɨke kuuti,
“Ʉmʉsyʉghʉ,
nave mupʉlɨka sino ijova ʉNgʉlʉve,
mʉlekaghe kuuva vasiiti,
ndavʉle avakʉʉlʉ viinu ye vikʉngʼhaana.”c
16 Lɨno,
ve vaveeni vano valyapʉliike sino ijova ʉNgʉlʉve,
vakakaana?
Asi,
nave vano valyalongosivue nʉ Moose kuhʉma mʉ ɨɨsi ɨja Misili!
17 Ve vaveeni vano valyankalisie ʉNgʉlʉve amaaka fijigho fine?
Nave vano valyavombile inyɨvi,
vakafua kʉ lʉkʉve!
18 Kange,
ve vaveeni vano ʉNgʉlʉve alyajɨghile kuuti navalingila kʉno avalɨngʼhanɨkisie kʉ vʉpʉʉmo?
Nave vano valyasitile kʉkʉnkʉnda ʉNgʉlʉve!
19 Lɨno,
tʉkagwile kuuti navalingiile,
ʉlwakʉva valyakanile kʉkʉmwɨtɨka ʉNgʉlʉve.