Ʉlʉpʉʉmo ʉlwa vaanhu va Ngʉlʉve
4
Ʉlʉfingo lwa Ngʉlʉve kuuti avaanhu vilikwingila kʉ vʉpʉʉmo,
lʉjiighe pwelʉle.
Lɨno,
mulolelelaghe kuuti pakate palyʉmue napeangavisaghe jʉno nailikwingila.
2 Ʉsue tʉpʉliike ɨMhola ɨNofu ndavʉle valyapʉliike avakʉʉlʉ viitu.
Avakʉʉlʉ avuo valyapʉliike ɨMhola ɨjio,
neke najɨlyavatangile kɨmonga,
ʉlwakʉva navalyɨtiike.
3 Looli ʉsue twe vano tʉmwɨtiike ʉNgʉlʉve,
tulikwingila kʉ vʉpʉʉmo vʉno alyalaghile.
Neke vwɨmɨla avakʉʉlʉ viitu ʉNgʉlʉve alyajovile kuuti,
“Nɨlyakaliile,
nɨkajɨɨgha nɨkati,
‘Kyangʼhaani navikwingila
kʉ vʉpʉʉmo kʉno nɨvalɨngʼhanɨkisie.’ ”a
Ʉmwene alyajovile enendɨɨkɨ napano alyamalile ɨmbombo jaake kuhʉma ye ipela ɨɨsi.
4 Ʉlwakʉva pamonga mʉ Malembe aMɨmɨke vwɨmɨla ɨkɨghono ɨkya lekelalʉbale lɨlembilue kuuti,
“Ɨkɨghono ɨkya lekelalʉbale ʉNgʉlʉve ye amalile ɨmbombo jaake ɨja kʉpela ɨɨsi,
akapʉʉma.”b
5 Kange lɨlembilue kuuti,
“Kyangʼhaani navikwingila kʉ vʉpʉʉmo kʉno nɨvalɨngʼhanɨkisie.”c
6 Avakʉʉlʉ viitu vala valyale ve vatasi kupʉlɨka ɨMhola ɨNofu.
Neke navalingiile kʉ vʉpʉʉmo ʉkuo,
ʉlwakʉva valyakanile kʉkʉmwɨtɨka ʉNgʉlʉve.
Lɨno,
ʉmʉlyango ghʉjiighe nʼdindule avaanhu avange kukwingila kʉ vʉpʉʉmo ʉkuo.
7 ɄNgʉlʉve alyataviike ɨkɨghono ɨkɨngɨ kɨno akakɨtambʉla,
“Ʉmʉsyʉghʉ.”
Tʉkagwile ʉluo,
ʉlwakʉva amaaka minga ye ghakilile,
ʉNgʉlʉve kukilila ʉntwa ʉDavɨdid alyajovile kange kuuti,
“Ʉmʉsyʉghʉ,
nave mupʉlɨka sino ijova ʉNgʉlʉve,
mʉlekaghe kuuva vasiiti.”e
8 ɄYoshua ale avingisie avaanhu kʉ vʉpʉʉmo kʉno valɨngʼhanɨsivue,f
ʉNgʉlʉve naale ijova pambele vwɨmɨla ʉnsiki ʉghʉnge ʉghwa kʉpʉʉma.
9 Lɨno,
ʉvʉpʉʉmo vʉjiighe pwevʉle vʉno ʉNgʉlʉve avalɨngʼhanɨkisie avaanhu vaake.
10 Ʉmuunhu jʉno ingiile kʉ vʉpʉʉmo ʉvuo,
ipʉʉma kuvomba imbombo saake sooni,
ndavʉle ʉNgʉlʉve vʉle alyapʉmile ye amalile ɨmbombo jaake ɨja kʉpela ifiinu fyoni.
11 Lɨno,
tʉghimbaghe kukwingila kʉ vʉpʉʉmo ʉvuo,
kuuti nambe jʉmo pakate palyʉsue naangakunwaghe kukwingila mʉlwa kʉsiita kʉkʉnkʉnda ʉNgʉlʉve ndavʉle avakʉʉlʉ viitu.
12 Ɨlɨsio lya Ngʉlʉve lyʉmi,
kange lɨlɨ ni ngʉfu.
Ɨlɨsio ɨlio litema kukila ɨbamba jɨno jitema kwoni.
Likwingila mʉ mʼbɨlɨ ghwoni:
mʉ nhumbula na mʉ mwojo,
mʉ mafupa ʉmpaka mʉ mwɨndɨ.
Ɨlɨsio lya Ngʉlʉve likagʉla ʉvʉfumbue na masaaghe gha vaanhu.
13 Nakwekɨlɨ kɨno kɨfisiime kwa Ngʉlʉve.
Ifipelua fyoni fili pa vʉvalafu pamaaso ghaake.
Na jʉsue,
nʉjʉnge ilikwoleka lwake vwɨmɨla sino avombile.
ɄYesu ghwe ntekesi ʉmʼbaha
14 Lɨno,
ʉlwakʉva tʉlɨ nʉ ntekesi ʉmʼbaha jʉno alingiile kʉkyanya kwa Ngʉlʉve,
ʉYesu ʉMwana ghwa Ngʉlʉve,
tʉgadɨlɨlaghe vʉnofu ʉlwɨtɨko lwitu.
15 Ʉntekesi ghwitu ʉjuo akagwile kukunua kwitu,
ʉlwakʉva ghwope alyaghelilue nʉ Setano mʉ nyinga ndavʉle ʉsue vʉle tughelua.
Neke ʉmwene naalyavombile inyɨvi.
16 Mʉ ʉluo,
tʉvelaghe pamaaso gha Ngʉlʉve ʉnya lʉsʉngʉ kɨsila vwoghofi,
kuuti atʉpyanɨle na kʉkʉtʉsʉngʉkɨla mʉ vʉkamɨngʼhanɨlua.