5
Ʉntekesi ʉmʼbaha asalulue kuhʉma mʉ kɨpʉgha ɨkya vaanhu,
kuuti avombaghe ɨmbombo ja Ngʉlʉve vwɨmɨla avange.
Ʉmwene ihʉmia ɨlɨtekelo kwa Ngʉlʉve kuuti avaanhu vapyanɨlwaghe inyɨvi saave.
2 Ʉlwakʉva ʉntekesi nankwɨlanɨfu,
ɨkʉvavombelagha nʉ vʉkoola vano vivomba ʉvʉhosi kɨsila kʉkagʉla.
3 Fye nambe ghwope ilondua kuhʉmia ɨlɨtekelo vwɨmɨla inyɨvi saake,
ndavʉle ihʉmia ɨlɨtekelo vwɨmɨla inyɨvi isa vange.
4 Nakwale ʉmuunhu jʉno ikuvɨɨka jʉjuo kuuva ntekesi mʼbaha,
looli ʉNgʉlʉve ghwe jʉno ɨkʉnsalʉla,
ndavʉle alyansalwile ʉAloni.a
5 Enendɨɨkɨ ghwope ʉKɨlɨsite naalipeliile ʉvwoghopua ʉvwa kuuva ntekesi mʼbaha,
looli ʉNgʉlʉve ghwe jʉno alyansalwile na kʉkʉmʼbʉʉla kuuti,
“Ʉve ʉlɨ Mwanango,
ʉne ʉmʉsyʉghʉ nɨlɨ Vaaso.”b
6 Kange,
pamonga mʉ Malembe aMɨmɨke,
alyatiile,
“Ʉve ʉlɨ ntekesi ghwa masiki ghooni,
ndavʉle alyale ʉMelekisedeki.”c
7 ɄYesu ye alɨ pa ɨɨsi apa,
alyalɨlile na kʉkʉnsʉʉma fiijo ʉNgʉlʉve ʉnya ngʉfu isa kʉmpoka kʉvʉfue.d
ɄNgʉlʉve akampʉlɨka,
ʉlwakʉva alyale nkʉndi kwa mwene.
8 Napano alyale Mwana ghwa Ngʉlʉve,
alyamanyiile kuuva nkʉndi kwa Ngʉlʉve kukilila imhumuko sino alyʉpiile.
9 ɄNgʉlʉve akamʼbɨɨka kuuva nkwɨlanɨfu,
akava kɨvʉmbʉko kya vʉpoki ʉvwa kʉvʉsila kʉsila kʉ vaanhu vooni vano vikʉnkʉnda.
10 Akamʼbɨɨka kuuva ntekesi mʼbaha ndavʉle alyale ʉMelekisedeki.
Kukʉla mʉ lwɨtɨko
11 Tʉlɨ ni nyinga isa kʉjova vwɨmɨla imhola isa Yesu kuuva ntekesi mʼbaha,
neke tukunua kʉkʉvavʉʉla,
ʉlwakʉva namʉlɨ vangʉfi kʉkʉsitangʼhania imhola.
12 Mwale mʉleke kuuva enendɨɨkɨ,
ʉnsiki ʉghʉ ngale mʉlɨ vavʉlanɨsi va lɨsio lya Ngʉlʉve.
Neke lɨno mʉjiighe mulondua kuvʉlanɨsɨvua imbʉlanɨsio isa kwanda isa lɨsio lya Ngʉlʉve.
Ʉmue mʉlɨ ndavʉle avaana avafyele vano vikwongʼha,
navanoghiile kulia ɨkyakʉlia ɨkyʉmu.
13 Ʉlwakʉva ʉmuunhu jʉno ikwongʼha,
mwana mfyele,
naakagwile ʉvʉgholofu kye kɨɨnu kɨki.
14 Looli ɨkyakʉlia ɨkyʉmu kya vaanhu vano vakangiile,
avuo ve vano vamanyiile kulʉvʉlania inofu ni mbiivi.