Imbombo isa lʉmili
3
Vanyalʉkolo vango,
namʉngalondaghe mweni piiva vavʉlanɨsi va lɨsio lya Ngʉlʉve,
ndavʉle mʉkagwile kuuti ʉsue twe vavʉlanɨsi tulihɨghua kukila avange.
2 Ʉsue tweni tusova mʉ nyinga.
Nave ʉmuunhu naisova mʉ sino ijova,
ʉjuo mʉgholofu,
alɨ ni ngʉfu isa kʉghʉlongosia vʉnono ʉmʼbɨlɨ ghwake ghwoni.
3 Pano tukʉnga ɨkyʉma ɨkɨgonde mʉ mʉlomo ghwa falaasi tulonda kuuti jɨtʉkʉndaghe,
mʉ ʉluo pe tʉkʉjɨlongosia kwoni kʉno tughanile.
4 Nambe ingalavaa ingʼhome fiijo,
sighendesivua nɨ mhepo ɨmbaha,
soope silongosivua nʉ vʉsukaani ʉvʉdebe,
kulʉta kwoni kʉno ilonda jʉno ilongosia.
5 Fye lʉlɨvuo nalʉ lʉmili,
nambe kɨlʉngo kɨdebe fiijo mʉ mʼbɨlɨ,
lujova amasio agha kughinia fiijo.
Lolagha,
akajejelʉfu aka mwoto vʉle kinyaanya ʉnsitu ʉnkome fiijo.
6 Ʉlʉmili lʉlɨngʼhiine na kajejelʉfu aka mwoto,
lʉmemile ʉvʉviivi vʉno vʉlɨ papinga.
Ʉlʉmili kɨlʉngo kɨmo mʉ filʉngo fyoni ifya mʼbɨlɨ,
neke lupelela ʉmuunhu ghwoni kuuva mhosi.
Lunangania ʉvwʉmi vwoni ʉvwa muunhu na kunyaanya nʉ mwoto ghʉno naghusima lʉsiku.
7 Ifikanu fyoni,
fidɨmɨka.
Avaanhu ndepoonu vidɨɨma ifikanu ifya mʉ lɨsoli,
ifikanu fino fikwafula,
fino fili mʉ nyanja ni njuni.
8 Neke nakwale ʉmuunhu jʉno ndepoonu idɨɨma ʉlʉmili lʉleke kujova imbiivi.
Ʉlʉmili naludɨmɨka,
lʉpɨndile ʉvʉhosi,
lubuda avaanhu ndavʉle ɨsumu ja njoka.
9 Ʉlʉmili tʉkʉmʉghinikisia ʉNgʉlʉve ʉNhaata ghwitu.
Kange,
ʉlʉmili lʉlʉluo tughunila avaanhu vano ʉNgʉlʉve alyavapelile mʉ kɨhwani kyake.
10 Mʉ mʉlomo ghʉmo ghihʉma amasio agha kughinia na masio agha kʉghuna.
Vanyalʉkolo vango,
nalʉnoghiile kuvomba ʉluo!
11 Ndepoonu ɨkɨnʼdwivu kɨmo kihʉmia amalenga amanono na maviivi?
12 Vanyalʉkolo vango,
ʉmpiki ʉntini ndepoonu ghukoma amandɨma,
nambe ʉmfyʉlɨsi ndepoonu ghukoma amagʉhʉ?
Jeeje,
nambe ɨkɨnʼdwivu nakɨngahʉmie amalenga amaviivi na manono.
Ʉlʉhala nʉ vʉkagʉsi
13 Ghwe veeni pakate palyʉmue,
ʉnya vʉkagʉsi nʉ lʉhala?
Avonie ʉluo mʉ maghendele ghaake amanofu ni mbombo saake inofu sino sivombeka nʉ vʉkoola vʉno vuhʉma mʉ lʉhala lwake.
14 Neke nave mʉmemile ɨkɨvini na kukwilana mʉ moojo ghiinu,
mʉlekaghe kukughinia nambe kukwandʉla ʉvwakyangʼhaani kuuva vʉdesi.
15 Ʉvʉkagʉsi ndavʉle ʉvuo navuhʉma kwa Ngʉlʉve,
looli vwa mʉ ɨɨsi,
vʉkagʉsi vwa vaanhu,
kange vuhʉma kwa Setano.
16 Ʉlwakʉva pano avaanhu valɨ nɨ kɨvini na kukwilana,
pepano pweghale amabaatu nʉ vʉhosi vʉno vʉlɨ papinga.