Kʉkʉvaghana avaanhu vooni
2
Vanyalʉkolo vango,
ʉlwakʉva mʉkʉmwɨtɨka ʉMʉtwa ghwitu ʉYesu Kɨlɨsite ʉnya vʉvaha vwoni,
mʉvaghanaghe avaanhu vooni,
namʉngasalʉlaghe.
2 Tʉʉti ndavʉle mʉ kɨpʉgha kiinu ingiile ʉmuunhu ʉmmofu afwalɨliile,
kange ingiile ʉmuunhu ʉnkotofu afwalile amenda ghano ghasakiile,
3 pe mʉntengelele vʉnono jʉno afwalɨliile mʉʉti,
“Ʉve ghukale apa pa vʉnofu.”
Neke mʉmʼbʉʉle ʉnkotofu jʉla mʉʉti,
“Ʉve,
ɨma pala,
nambe ghukale paasi pa maghʉlʉ ghango.”
4 Asi,
ʉluo naluvonia kuuti musalʉla avaanhu,
navʉ vʉlamʉsi vwinu ʉvwa kuuti ʉjʉ anoghiile,
ʉjʉ naanoghiile,
vulongosivua na masaaghe ghiinu amaviivi?
5 Vanyalʉkolo vango vaghanɨke,
mʉmhʉlɨkɨsie vʉnono.
ɄNgʉlʉve avasalwile avakotofu mʉ ɨɨsi,
vaave vamofu mʉ lwɨtɨko na kuuva vahaasi va Vʉtwa vʉno alyavalaghile vano vamʉghanile.
6 Neke ʉmue mʉkʉvabenapʉla avakotofu.
Asi,
avamofu nave vano vikʉvapumusia ʉmue na kʉkʉvatwala pa vʉhɨghi?
7 Asi,
avuo nave vano vibenapʉla ɨlɨtavua ɨlɨnofu ɨlya Yesu,
jʉno ʉmue mʉlɨ vaanhu vaake?
8 Nave muvɨngɨlɨla ʉlʉlaghɨlo lwa Kɨlɨsite ʉNtwa ghwitu ndavʉle lɨlembilue mʉ Malembe aMɨmɨke kuuti,
“Ʉmʉghanaghe ʉnnino ndavʉle ghukughana jʉʉve,”a
muvomba vʉnofu.
9 Looli,
nave musalʉla ava kʉvaghana,
muvomba inyɨvi,
nalʉ lʉlaghɨlo lʉkʉvahɨgha kuuti mʉlɨ vahosi.
10 Nave ʉmuunhu ivɨngɨlɨla indaghɨlo sooni,
neke ideenya ʉlʉlaghɨlo lʉmo,
ʉjuo iiva adenyile indaghɨlo sooni.
11 Ʉlwakʉva ʉNgʉlʉve jʉno avɨkile ʉlʉlaghɨlo lʉno lwiti,
“Nʉngavwafukaghe,”b
ghwe jʉno avɨkile ʉlʉlaghɨlo lʉno lwiti,
“Nʉngabudaghe.”c
Kwekʉti,
nambe nʉvwafwike,
neke ʉbudile,
ghuuva ʉdenyile indaghɨlo.
12 Lɨno,
pano mujova na kuvomba,
mʉkagʉlaghe kuuti,
ʉNgʉlʉve ilikʉvahɨgha kulɨngʼhana nʉ lʉlaghɨlo lʉno lʉkʉtʉpelela kuuva vavʉke.
13 Ɨkɨghono ɨkya vʉhɨghi,
avaanhu vano navikʉvasʉngʉkɨla avange,
ghwope ʉNgʉlʉve nailikʉvasʉngʉkɨla.
Ʉmuunhu jʉno ɨkʉvavonela ɨkɨsa avange,
ʉNgʉlʉve ilikʉmʼbonela ɨkɨsa ɨkɨghono ɨkya vʉhɨghi.
Ʉlwɨtɨko na maghendele
14 Vanyalʉkolo vango,
nave ʉmuunhu iiti alɨ nʉ lwɨtɨko,
neke naihʉfia mʉ maghendele ghaake,
ʉlwɨtɨko lwake lʉlɨ nʉ lʉvʉmbʉlɨlo lʉki?
Asi,
ʉlwɨtɨko ndavʉle ʉluo ndepoonu lʉkʉmpoka?
15 Tʉʉti nave ʉmwɨtɨki ʉnʼjaako,
ʉmʉkɨnhaata nambe ʉmʉkɨjʉʉva,
aghajile nambe aghilue ɨkyakʉlia,
16 pe jʉmonga mʉlyʉmue amʼbʉʉle ati,
“Lʉtagha nʉ lʉtengaano,
ʉNgʉlʉve akʉpelaghe amenda ni fyakʉlia,”
neke aleke kʉkʉntanga fino aghilue,
ʉluo luvʉmbʉlɨla kɨki?
17 Fye lʉlɨvuo,
ʉlwɨtɨko lʉno naluhʉfia amaghendele amanofu,
lʉfwile.
18 Lɨno,
ʉmuunhu jʉmonga ndepoonu iiti,
“Avaanhu vamonga valɨ nʉ lwɨtɨko,
avange valɨ na maghendele amanofu.”
Ʉne nɨkʉmwamʉla niiti,
“Ʉhʉfie ʉlwɨtɨko lwako ʉlʉsila maghendele,
na jʉʉne nɨkʉkʉhʉfia ʉlwɨtɨko lwango mʉ maghendele ghango amanofu.”
19 Ʉve ghukwɨtɨka kuuti kwale ʉNgʉlʉve jʉmo mwene,
se seene.
Neke ʉluo nalukwɨla,
ʉlwakʉva ghoope amapepo ghikwɨtɨka vʉle vʉle kʉmo ghitetema nʉ lʉdwesi.
20 Ghwe nʼjasu ʉve!
Ghulonda kukagʉla vʉle ʉlwɨtɨko kɨsila maghendele amanofu,
lʉsila lʉvʉmbʉlɨlo?
21 ɄNgʉlʉve alyamʼbaliile ʉnkʉʉlʉ ghwitu ʉAbulahamu kuuva mʉgholofu pamaaso ghaake,
vwɨmɨla amaghendele ghaake amanofu pano alyantavwile ʉnswambe ʉIsaka kuuti aave lɨtekelo!d
22 Lɨno ʉlolile ʉlwɨtɨko ʉlwa Abulahamu,
vʉle lʉlyavoniike mʉ maghendele ghaake.
Mʉ ʉluo,
ʉlwɨtɨko lwake lʉkakwɨlana vwɨmɨla amaghendele ghaake.
23 Ʉluo lʉkakwɨlanɨsia aMalembe aMɨmɨke ghano ghiiti,
“ɄAbulahamu alyamwɨtiike ʉNgʉlʉve,
mʉ ʉluo akavalɨlua kuuva mʉgholofu.”e
Pe ʉNgʉlʉve akantambʉla ʉAbulahamu kuuti mmanyaani ghwake.
24 Lɨno mʉ kɨhwanɨkɨsio ɨkɨ,
mʉlolile vʉle ʉmuunhu ivalɨlua kuuva mʉgholofu vwɨmɨla amaghendele ghaake amanofu,
nakwekʉti vwɨmɨla ʉlwɨtɨko lwene.
25 Fye lʉlyale najʉ Lahavu ʉmʉghendamwalu,
ʉNgʉlʉve alyamʼbaliile kuuva mʉgholofu vwɨmɨla amaghendele ghaake amanofu,
pano alyavʉpiile avaanhu vano valyasungʼhilue kuposelesia ɨlɨkaaja ɨlya Yeliko.
Pambele akavasoona vakile ɨsɨla ɨjɨnge kuuti valeke pikolua.f
26 Lɨno,
ʉlwɨtɨko kɨsila maghendele amanofu,
lʉfwile.
Luuva ndavʉle ʉmfimba.