Ɨkalata ɨja
Yakovo
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Yakovo,
ne mʼbombi ghwa Ngʉlʉve,
nʉ Mʉtwa ʉYesu Kɨlɨsite.
Nɨkʉvahʉngɨla ʉmue mwe Vayahudi ifisina kɨjigho na fivɨlɨ,a
mwe vano mʉpalasiine mʉ ɨɨsi sooni.
Ʉlugudo nʉ lwɨtɨko
2 Vanyalʉkolo vango,
mʉhovokaghe pano mughelua ni ngelo sino sili papinga,
3 ʉlwakʉva mʉkagwile kuuti pano mughelua mʉ lwɨtɨko lwinu,
kʉkʉvapeela ʉlugudo.
4 Ʉlugudo ʉluo lʉvatangaghe kʉkʉsilema ingelo kuhanga kufika kʉvʉsililo,
neke mʉʉve vakwɨlanɨfu lwoni,
kɨsila kwaghɨlua mʉ lwɨtɨko lwinu.
5 Lɨno,
nave jʉmonga mʉlyʉmue nsila vʉkagʉsi,
ansʉʉme ʉNgʉlʉve jʉno ɨkʉvapeela avaanhu vooni mʉ vʉkoola vwake,
naihɨmba.
6 Neke pano isʉʉma kwa Ngʉlʉve,
alekaghe piiva ni nganighani,
ʉlwene amhʉvɨlaghe ʉNgʉlʉve.
Ʉmuunhu ʉnya nganighani alɨ ndavʉle amavɨngo mʉ nyanja ghano ghitaghua nɨ mhepo kʉno na kʉno.
7 Ʉmuunhu ndavʉle ʉjuo naangahʉvɨlaghe kukwʉpɨla kɨmonga kuhʉma kwa Mʉtwa,
8 ʉlwakʉva akolile amasaaghe ghavɨlɨ ghano naghikwɨtɨngʼhana,
iiva nsila vwɨmo.
Avakotofu na vamofu
9 Ʉmwɨtɨki ʉnkotofu ahovokaghe,
ʉlwakʉva aghinisivue nʉ Ngʉlʉve.b
10 Ghwope ʉmmofu ahovokaghe pano ʉNgʉlʉve amwisisie,
ʉlwakʉva ʉmmofu ilijoghotoka ndavʉle ɨlɨlʉva ɨlya mʉ lɨsoli.
11 Ɨlɨjʉva lidibula,
neke vwɨmɨla ʉlʉjʉva ʉlʉkali,
amamela ghikwʉma,
ʉvʉlʉva vusangʉka,
ʉvʉnono ʉvwa lɨlʉva ɨlio vunangɨka.
Fye enendɨɨkɨ,
ʉmmofu ilitipulua ye ajiighe itiigha ni mbombo saake.
Kukuguda mʉ ngelo
12 Afunyilue ʉmuunhu jʉno ikuguda mʉ ngelo,
ʉlwakʉva angasileme ingelo,
ilikwʉpɨla ɨngeela ɨja vwʉmi jɨno ʉNgʉlʉve alyavalaghile kʉkʉvapeela vano vikʉmʉghana.
13 Ʉmuunhu pano alɨ mʉ ngelo,
alekaghe piiti,
“Nighelua nʉ Ngʉlʉve!”
Ʉlwakʉva ʉNgʉlʉve naighelua nʉ vʉviivi,
kange naɨkʉmʉghela ʉmuunhu ghweni.
14 Looli ʉmuunhu ghweni ighelua nʉ vʉnoghelua vwake jʉjuo,
mʉlwa kʉlongosivua na kusyangua kuvomba inyɨvi.
15 Lɨno,
ʉvʉnoghelua ʉvuo vulongosia kuvomba inyɨvi,
kwope kuvomba inyɨvi kupelela ʉvʉfue.
16 Vanyalʉkolo vango vaghanɨke,
namʉngasyangwaghe.
17 Ifipelua fyoni ifinofu ni fikwɨlanɨfu,
lʉvonolo kuhʉma kʉkyanya kwa Ngʉlʉve ʉNhaata,
ʉmpela fyoni fino fimulika kʉkyanya.
Ʉmwene nansyetʉngʼhani ndavʉle ʉmʉsulua.
18 Mʉ vughane vwake jʉjuo,
alyatʉpeliile ʉsue ʉvwʉmi ʉvʉpia vwɨmɨla ɨlɨsio lyake ɨlya kyangʼhaani,
kuuti tʉʉve vaanhu vaake vasalʉlua va kwanda mʉ fipelua fyoni fino apelile.
Kupʉlɨka ɨlɨsio na kuvomba ndavʉle lilʉngɨka
19 Vanyalʉkolo vango vaghanɨke,
mʉlɨtangʼhaniaghe vʉnono ɨlɨsio ɨlɨ:
Ʉmuunhu ghweni apʉlɨkɨsyaghe taasi,
alekaghe piiva mwangʉfi kujova nambe kukalala,
20 ʉlwakʉva ʉmuunhu angave nɨ ngʼhalaasi naangavombe sino sinoghiile pamaaso gha Ngʉlʉve.
21 Lɨno,
mʉghaleke amaghendele ghiinu amaviivi na masaaghe amaviivi ghano ghamemile mʉ moojo ghiinu.
Mwʉpɨlaghe vʉnono ɨlɨsio lɨno ʉNgʉlʉve avɨkile mʉ moojo ghiinu.
Ɨlɨsio ɨlio lɨlɨ ni ngʉfu isa kʉvapoka.
22 Mʉlekaghe kupʉlɨkɨsia kwene ɨlɨsio lya Ngʉlʉve,
ʉlwene mʉvombaghe sino lilʉngɨka,
nave namuvomba ʉluo mukusyanga mwe veene.
23 Ʉmuunhu jʉno ipʉlɨka lɨ lɨsio kɨsila kʉvomba sino lilʉngɨka,
ʉjuo alɨngʼhiine nʉ muunhu jʉno ikulola mʉ kɨlolelo,
24 neke kyande amalile pikulola,
ivʉʉka,
nakalɨngi ikusyemua vʉle alɨvuo.
25 Looli ʉmuunhu jʉno isaagha vʉnono indaghɨlo sa Ngʉlʉve sino sikʉvapelela avaanhu kuuva vavʉke,
na kʉkʉsivɨkɨla mwojo,
aleke piiva muunhu ghwa kʉpʉlɨka na kusyemua,
ʉlwene avombaghe lʉno silʉngɨka,
ʉmuunhu ʉjuo ʉNgʉlʉve ɨkʉmfuunya mʉ sooni sino ivomba.
26 Nave ʉmuunhu isaagha kuuti ɨkʉmʼbɨngɨlɨla ʉNgʉlʉve,
neke naikulolelela mʉ njovele jaake,
ʉmuunhu ʉjuo ikusyanga mwene,
kuvɨngɨlɨla ʉkuo kʉsila lʉvʉmbʉlɨlo.
27 Kʉkʉmʼbɨngɨlɨla vʉnono ʉNgʉlʉve ʉNhaata,
kʉno nakupelela ʉvʉviivi vʉmonga pamaaso ghaake,
kwe kʉvomba isi:
kʉkʉvatanga avapɨɨna na vafwɨle mʉ vʉkamɨngʼhanɨlua vwave na kukulolelela jʉʉve vwɨmɨla imbombo inyali isa mʉ ɨɨsi ɨjɨ.