ɄNgʉlʉve ɨkʉtʉvʉnga twe vanaake
12
Lɨno,
na jʉsue ʉlwakʉva tʉlɨ pakate pa volesi vinga,
vano vahʉfisie vʉnono ʉlwɨtɨko lwave,
tʉfileke fyoni fino fikʉtʉsigha,
palɨkɨmo nʉ vʉhosi vʉno vʉtʉkoleliile.
Kange,
tʉghimbaghe nʉ lugudo kuvomba sino ʉNgʉlʉve atʉlaghiile,
ndavʉle ʉmuunhu jʉno ighelana ʉlʉvɨlo.
2 Tʉmʉlolaghe ʉYesu jʉno atengʉlisie ʉlwɨtɨko nkate mʉlyʉsue na kʉkʉtʉlongosia mʉ lwɨtɨko ʉluo kuhanga tʉfike kʉvʉsililo.
Ʉlwakʉva alyakagwile ʉlʉkeelo lʉno iliiva nalwo pambele,
aligudile na kufua pa kɨkovekano kɨsila kʉvona soni.
Lɨno,
alɨ nʉ vʉtavʉlɨlua palɨkɨmo nʉ Ngʉlʉve.
3 Mʉkʉmbʉkaghe ʉYesu vʉle aligudile ye ipumusivua na vahosi,
kuuti na jʉmue mʉleke kudendevʉka nambe kufua ʉmwojo.
4 Nijova ʉluo,
ʉlwakʉva vʉle mughimba kʉkʉvʉlema ʉvʉhosi,
namʉfikile mʉ kɨghelelo ɨkya kʉsofia ʉvwʉmi vwinu.
5 Asi,
mʉsyemilue amasio ghala ghano ghikʉvapavɨla ʉmue,
ndavʉle ʉmpaafi vʉle ipavɨla ʉmwanaake?
Amasio aghuo ghiiti,
“Mwanango,
ʉMʉtwa ʉNgʉlʉve pano ɨkʉkʉkopa
kʉkʉkʉvʉnga,
nʉngapuniaghe.
Nambe pano ɨkʉkʉdalɨkɨla,
nʉngadendevʉkaghe.
6 Ʉlwakʉva ʉMʉtwa ʉNgʉlʉve ɨkʉmʼbʉnga
jʉno amʉghanile,
ɨkʉnkopa ʉmuunhu ghweni
jʉno amwʉpiile kuuva mwanaake.”a
7 Lɨno,
pano muvʉngua mugudaghe,
ʉNgʉlʉve ivomba enendɨɨkɨ,
ʉlwakʉva mʉlɨ vanaake.
Asi,
ghwe mwana alɨku jʉno naivʉngua nʉ viise?
8 Nave ʉNgʉlʉve naɨkʉvavʉnga ʉmue ndavʉle ivʉnga avanaake avange,
kwekʉti ʉmue namʉlɨ vanaake.
9 Ʉsue tweni tʉlɨ na vanhaata mʉ ɨɨsi muno,
pano vikʉtʉvʉnga,
tʉkʉvapʉlɨka.
Lɨno,
tʉnoghiile kʉkʉmpʉlɨka fiijo ʉNhaata ghwitu ʉghwa kʉkyanya,
neke tʉʉve nʉ vwʉmi.
10 Avanhaata viitu mʉ ɨɨsi vikʉtʉvʉnga mʉ nsiki nʼdebe,
muno vilolela aveene kuuti lʉnoghiile.
Neke ʉNgʉlʉve ɨkʉtʉvʉnga kuuti tʉʉve nʉ lʉvʉmbʉlɨlo,
tʉʉve mʉ vwɨmɨke vwake.
11 Ʉlʉvʉngo pano luvombeka nalʉkʉmhovosia ʉmuunhu jʉno ivʉngua,
looli lʉkʉmpelela ʉlʉsukunalo.
Neke pambele ʉlʉvʉngo ʉluo,
lʉkʉmpelela kuuva mʉgholofu na kuuva nʉ lʉtengaano.
12 Lɨno mʉkangalaghe,
namʉngadendevʉkaghe nambe kufua ʉmwojo.b
13 Mʉvisaghe vagholofu,
kuuti avaanhu vano videndevʉka na kufua ʉmwojo valeke pisova,
looli vasindamale mʉ lwɨtɨko.c
Ʉlʉpavɨlo vwɨmɨla kʉkʉnkaana ʉNgʉlʉve
14 Vanyalʉkolo vango,
mʉlondaghe fiijo kuuva nʉ lʉtengaano na vaanhu vooni kange mʉvisaghe vɨmɨke,
ʉlwakʉva nakwale jʉno ndepoonu ɨkʉmwagha ʉNgʉlʉve kɨsila kuuva enendɨɨkɨ.
15 Mulolelelaghe vʉnono kuuti,
pakate palyʉmue napeangavisaghe nambe jʉmo jʉno ikunua kukwʉpɨla ʉlʉsʉngʉ lwa Ngʉlʉve.
Mulolelelaghe kuuti,
napeangavisaghe ʉmuunhu jʉno ɨkʉvapelela kuuva nʉ vʉvafi vʉno vunangania amoojo gha vaanhu vinga.
16 Pakate palyʉmue napeangavisaghe ʉmʉghendamwalu,
nambe jʉno naɨkʉmwɨmɨka ʉNgʉlʉve,
ndavʉle ʉEsau jʉno alyaghʉsisie ʉvʉhaasi vwake vwɨmɨla ʉlʉlio ʉlwa kamo keene.
17 Ʉmue mʉkagwile kuuti,
ʉEsau ye ilonda kange inyifuunyo isio isa vʉhaasi,
akakanua ʉlwakʉva naalyalatile.
Nambe alyalɨlile fiijo kulonda inyifuunyo sila,
naakapelua.
18 Ʉmue namʉfikile kʉ kɨdunda kɨno ndepoonu ghukwabasia,
ndavʉle lʉlyale kʉ vano valyale kʉ kɨdunda ɨkya Sinai.
Namʉfikile kʉ kɨdunda ndavʉle ɨkio kɨno kɨkava kiviika ʉmwoto,
najɨ ngʼhiisi jɨkakɨkupikila,
najɨ mhepo ɨmbaha jɨkagugula.
19 Kange,
namʉpʉliike ndavʉle valyapʉliike avaanhu vala ʉlʉkelemo,
nɨ lɨsio ɨlɨvaha ɨlya kwoghofia kuhʉma kwa Ngʉlʉve kuhanga vakasʉʉma aleke pijova navo kange,
20 ʉlwakʉva navaale vikiva ʉlʉlaghɨlo lwa Ngʉlʉve lʉno alyajovile kuuti,
“Nambe ɨkɨdɨmua kɨngabasie ɨkɨdunda ɨkio,
kitovua na mavue kuhanga kɨfue.”d
21 Sino silyahʉmiile pala,
silyale sa kwoghofia kyongo,
najʉ Moose akati,
“Nikwoghopa na kutetema.”e
22 Neke ʉmue mʉfikile pa kɨdunda ɨkya Syoni,
ɨYelusalemu ɨja kʉkyanya,
ɨlɨkaaja lya Ngʉlʉve ʉmwʉmi.
Mʉ lɨkaaja ɨlio mwevale avanyamhola imbilima ni mbilima,
vakongʼhanile nʉ lʉkeelo.
23 Mʉfikile mʉ lɨpʉgha ɨlya vaanhu va Ngʉlʉve,
kange vahaasi ndavʉle avaana avavele,
amatavua ghaave ghalembilue kʉkyanya.
Mʉfikile kwa Ngʉlʉve ʉMhɨghi ghwa vaanhu vooni.
Mʉfikile kʉkyanya kʉno kwevale avaanhu avagholofu vano vavalasivue.
24 Mʉfikile kwa Yesu jʉno avɨkile ʉlʉfingo ʉlʉpia,
isambania avaanhu nʉ Ngʉlʉve.
Ɨdanda jaake jɨlyakungʼiike kupyanɨla inyɨvi sa vaanhu,
nakwekʉti kuvangɨla ndavʉle ɨdanda ɨja Abeli.f
25 Mʉlolaghe vʉnofu,
namʉngakanaghe kʉkʉmpʉlɨkɨsia jʉno ijova numue.
Nave avakʉʉlʉ viinu valyakanile kʉkʉmpʉlɨkɨsia ʉMoose jʉno alyavapaviile pa ɨɨsi apa,
lʉkavaagha ʉlʉkwegho lwa Ngʉlʉve;
lɨno ʉsue kyatupʉnga ndaani ʉlʉkwegho lwa Ngʉlʉve,
nave tukaana kʉkʉmpʉlɨka jʉno ijova nusue kuhʉma kʉkyanya?
26 Ʉnsiki ghʉla ʉNgʉlʉve ye ijova,
ɨlɨsio lyake lɨkasukania ɨɨsi.
Neke lɨno alaghiile kuuti,
“Nilisukania ɨɨsi kange,
nakwekʉti jɨ ɨɨsi jeene,
looli navʉ vʉlanga.”g
27 Ɨlɨsio ɨlɨ,
“kange” livonia kuuti ifiinu fyoni fino ʉNgʉlʉve alyapelile mʉ ɨɨsi muno,
filisukanɨsɨvua na kuvʉsɨvua,
kuuti fijighe fino nafisukanɨka.
28 Lɨno,
tʉmhongesyaghe ʉNgʉlʉve,
ʉlwakʉva atʉpeliile ʉvʉtwa vʉno navusukanɨka.
Tʉmwɨmɨkaghe ndavʉle ikeela ʉmwene,
kange tʉmwoghopaghe,
29 ʉlwakʉva ʉNgʉlʉve ghwitu,
mwoto ghʉno ghunyanyɨlɨla lwoni!