Avakʉʉlʉ viitu vʉle vakamwɨtɨkagha ʉNgʉlʉve
11
Vanyalʉkolo vango,
kukwɨtɨka kwe kʉhʉvɨɨla kyangʼhaani sino sikwisa,
kwe kwɨtɨka kyangʼhaani sino nasivoneka.
2 ɄNgʉlʉve alyavaghinisie avakʉʉlʉ viitu vwɨmɨla ʉlwɨtɨko lwave.
3 Ʉlwɨtɨko lʉtʉpeleliile ʉsue tʉkagʉle kuuti,
ʉNgʉlʉve alyapelile ɨɨsi mʉlwa kʉjova ɨlɨsio.
Mʉ ʉluo ifiinu fyoni fino fivoneka filyapelilue kuhʉma mʉ fino nafivoneka.a
4 Ʉlwɨtɨko lʉlyampeleliile ʉAbeli antavʉlɨle ʉNgʉlʉve ɨlɨtekelo ɨlɨnofu kukila ɨlya Kaini.
Ghwope ʉNgʉlʉve alyahʉfisie kuuti,
ʉAbeli muunhu mʉgholofu,
ʉlwakʉva alyʉpiile ɨlɨtekelo lyake.
Nambe ʉAbeli alyafwile,
nʉmʉsyʉghʉ ʉlwɨtɨko lwake kɨhwanɨkɨsio kʉlyʉsue.b
5 Ʉlwɨtɨko lʉlyampeleliile ʉEnoki atolue kulʉta kʉkyanya kɨsila kʉfua,
naalyavoniike kange,
ʉlwakʉva ʉNgʉlʉve alyantolile.
Lʉlyavombiike enendɨɨkɨ,
ʉlwakʉva aMalembe aMɨmɨke ghikwoleka kuuti,
ʉEnoki ye akyale kutolua alyamhovwisie ʉNgʉlʉve.c
6 Nakwale ʉmuunhu jʉno anoghiile kʉkʉmhovosia ʉNgʉlʉve kɨsila lwɨtɨko.
Ʉmuunhu jʉno ikwisa kwa Ngʉlʉve anoghiile kukwɨtɨka kuuti ʉNgʉlʉve kwale,
kange ɨkʉvapeela ʉlʉvonolo vano vikʉmʉlonda.
7 Ʉlwɨtɨko lʉlyampeleliile ʉNwaka kʉkʉmpʉlɨka ʉNgʉlʉve ye apavilue vwɨmɨla sino silyakyale kuvoneka.
Akɨtɨka,
akatenda ɨsafina jɨno jɨkampoka ʉmwene na vaanhu ava mʉ nyumba jaake.
Mʉ ʉluo avaanhu avange mʉ ɨɨsi vakava vahɨghilue,
ʉmwene akɨtɨkɨsɨvua kuuti mʉgholofu vwɨmɨla ʉlwɨtɨko lwake.d
Ʉlwɨtɨko lwa Abulahamu
8 Ʉlwɨtɨko lʉlyampeleliile ʉAbulahamu kukʉnda kulʉta kʉ ɨɨsi jɨno ʉNgʉlʉve alyatiile ɨkʉmpeela.
ɄAbulahamu akavʉʉka ilʉta,
nambe naalyakagwile kʉno ilʉta.e
9 Ʉlwɨtɨko lʉlyampeleliile kukukala hwene mhesia mʉ ɨɨsi jɨno alyalaghilue nʉ Ngʉlʉve.
Akikala ʉkuo mʉ maheema ndavʉle ʉIsaka nʉ Yakovo vʉle vakavomba pambele.
Avaanhu ava,
valyʉpiile ʉlʉfingo lʉno alyalaghilue ʉAbulahamu.
10 Alyavombile enendɨɨkɨ,
ʉlwakʉva alyale ighuula ɨlɨkaaja ɨlɨvaha lɨno ʉlwalo lwake nalunangɨka lʉsiku.
Ɨlio lye lɨkaaja lɨno lɨtavikue na kujengua nʉ Ngʉlʉve jʉjuo.
11 Ʉlwɨtɨko lʉlyampeleliile ʉSala kupaapa ʉmwana napano alyaghosiipe fiijo,
kange alyale mʉghʉmba.
Lʉlyavombiike ʉluo,
ʉlwakʉva alyɨtiike kuuti ʉNgʉlʉve nnofu ivomba sino alaghile.
12 Pe kuhʉma kwa muunhu ʉjuo jʉno alyale mʉghogholo,
kange naakapapagha,
valyahʉmile avaanhu vinga fiijo ndavʉle inhondue kʉkyanya nɨ lɨhanga ɨlya kʉ mwani lɨno nalivalɨka.f
13 Avaanhu vooni ava,
valyafwile mʉ lwɨtɨko kɨsila kwʉpɨla sino valyalaghilue.
Looli valyasaghile kʉ vʉtali kuuti silihʉmɨla,
vakahovoka.
Aveene valyɨtiike kuuti pa ɨɨsi apa valyale vahesia kange vakilasɨla.
14 Avaanhu vano vikwɨtɨka enendɨɨkɨ,
vihʉfia kuuti vilonda ɨɨsi jaave vavuo.
15 Neke vale vasaghaghe vwɨmɨla ɨɨsi jɨno valyahʉmile,
vale vigomoka ʉkuo.
16 Looli aveene valyale vilonda ɨɨsi ɨnofu fiijo,
kwekʉti kʉkyanya.
Fye nambe ʉNgʉlʉve naivona soni,
avaanhu avuo vangankemelaghe kuuti Ngʉlʉve ghwave,
ʉlwakʉva avalɨngʼhanɨkisie ɨlɨkaaja kʉkyanya.
17 ɄAbulahamu ye ighelua nʉ Ngʉlʉve kʉkʉntavʉla ʉmwanaake ʉIsaka aave lɨtekelo,
ʉlwɨtɨko lwake lʉlyampeleliile kuvomba ʉluo.
Ʉmwene ghwe jʉno alyʉpiile sino Ngʉlʉve amʉlaghile vwɨmɨla ʉmwanaake ʉjuo jʉno alɨ jʉmo mwene.g
18 ɄNgʉlʉve alyamʼbʉlile kuuti,
“Ɨkɨsina kyako kihʉma mwa Isaka.”h
19 ɄAbulahamu alyakagwile kuuti,
ʉNgʉlʉve anoghiile kʉkʉnsyʉsia ʉIsaka.
Mʉ ʉluo,
kwekʉti ʉAbulahamu alyamwʉpiile kange ʉIsaka jʉno alyahwene afwile,
neke akava mwʉmi.
20 Ʉlwɨtɨko lʉlyampeleliile ʉIsaka avafuunye avanaake,
ʉYakovo nʉ Esau vwɨmɨla sino silihʉmɨla pambele.i
21 Ʉlwɨtɨko lʉlyampeleliile ʉYakovo ye itapifua,
avafuunye avaana va Yosefu ve vavɨɨlɨ.j
Akamwɨmɨka ʉNgʉlʉve kʉmo eghamiile ʉlʉkongooja lwake.
22 Ʉlwɨtɨko lʉlyampeleliile ʉYosefu ye alɨ piipi pifua,
alyajovile vwɨmɨla aVaisilaeli vʉle vilihʉma mʉ ɨɨsi ɨja Misili,
kange akalaghɨla vwɨmɨla kusyɨla amafupa ghaake viliiva vigomoka kʉ ɨɨsi jaave.k
Ʉlwɨtɨko lwa Moose
23 Ʉlwɨtɨko lʉlyavapeleliile avapaafi va Moose kʉkʉmfisa ʉMoose kuhanga akafika ameesi ghatatu.
Vakamwagha kuuti mwana nnono,
navalyoghwipe kukaana ʉlʉlaghɨlo ʉlwa Falao.l
24 ɄMoose ye akʉlile,
ʉlwɨtɨko lʉlyampeleliile kukaana kutambʉlua mwana ghwa mwalɨve Falao.
25 Ʉmwene alyavwene kʉba kupumuka palɨkɨmo na vaanhu va Ngʉlʉve,
kukila kuuva nʉ lʉkeelo mʉ vʉhosi kʉ nsiki nʼdebe vʉvʉle.
26 Alyavwene kupumusivua vwɨmɨla ʉKɨlɨsite kʉlɨ nʉ lʉvʉmbʉlɨlo ʉlʉvaha,
kukila ʉlʉkeelo nʉ vʉmofu ʉvwa kʉ Misili,
ʉlwakʉva alyale ighuula ʉlʉvonolo ʉlwa pambele.
27 Ʉlwɨtɨko lʉlyampeleliile ʉMoose avʉʉke kʉ Misili kɨsila kwoghopa ʉntwa vʉle kyaikalala.
Aligudile,
ʉlwakʉva alyamwaghile jʉno naivoneka na maaso.
28 Ʉlwɨtɨko lʉlyampeleliile ʉMoose kuvomba ɨkyɨmɨke ɨkya Pasaka,
na kʉkʉvavʉʉla aVaisilaeli kuuti vapake ɨdanda mʉlʉbale mʉ malyango ghaave,
neke ʉnyamhola ʉghwa kʉnangania aleke kubuda avaana vaave avavele.m
29 Ʉlwɨtɨko lʉlyavapeleliile aVaisilaeli valovoke ɨnyanja ɨja Shamu lʉghʉlʉ,
vakaghenda ndavʉle avaanhu vʉle vighenda mʉ vʉlaghafu.
Looli aVamisili ye vilovoka,
vakadwiviila mʉ malenga,
vakafua.n
Avaanhu avange vʉle vakamwɨtɨkagha ʉNgʉlʉve
30 Ʉlwɨtɨko ʉlwa Vaisilaeli lʉlyapeleliile ʉlʉvɨɨka ʉlwa lɨkaaja ɨlya Yeliko kughua,
ye vasyʉtile ifighono lekelalʉbale.o
31 Ʉlwɨtɨko lʉlyampeleliile ʉLahavu ʉmʉghendamwalu,
aleke kubudua palɨkɨmo na vano navalyamwɨtiike ʉNgʉlʉve.
Naalyabudilue,
ʉlwakʉva alyavʉpiile vʉnono aVaisilaeli vano valyasungʼhilue kuposelesia ɨlɨkaaja ɨlya Yeliko.p
32 Vanyalʉkolo vango,
nɨjove kɨki kange?
Ʉnsiki naghukwɨla kʉkʉvapangɨla imhola isa lwɨtɨko ʉlwa Gidioni,
ʉBalaka,
ʉSamsoni,
ʉYefuta,
ʉDavɨdi,
ʉSamueli na vavɨli.
33 Ʉlwɨtɨko lʉlyavapeleliile avaanhu avuo kʉkʉvalema avaanhu ava vʉtwa ʉvʉnge.
Valyale valongosi vagholofu,
valyʉpiile sino ʉNgʉlʉve alyalaghile kuuti ɨkʉvapeela.
Vamonga valyabungile amalomo gha nyalʉpala.
34 Kange,
valyasimisie ʉmwoto ʉnkali,
valyakulwike kubudua nɨ bamba.
Navalyale ni ngʉfu,
ʉlwene ʉNgʉlʉve akavapeela ingʉfu,
vakavatola avalua lɨlʉgʉ kuhʉma kʉ ɨɨsi isingi na kʉkʉvadaga.
35 Avakɨjʉʉva vamonga vakapelua avaanhu vaave vano vasyʉsivue.
Avange valyavwene kʉba vapumusivue kuhanga kufua,
kukila kuuva vavʉke na kʉkʉnkaana ʉNgʉlʉve.
Valyavombile enendɨɨkɨ kuuti pambele vasyʉsɨvue,
vaave nʉ vwʉmi ʉvʉnofu fiijo.
36 Avange valyabenapulue na kukopua ni ngʼhwegho,
valyapinyilue ni nyololo,
na kudindilua mʉ ndinde.
37 Vamonga valyatovilue na mavue,
valyadumulue ni seghe,
valyabudilue ni bamba.
Avange vakava vakotofu,
vighenda vafwalile ingʼhwembe sa ngʼholo ni sa mhene.
Vakava vipumusivua kyongo na kuvombelua fivi.
38 Valyale vighendaghenda kʉ lɨhaka na kʉ fidunda,
valyale vikukala mʉ mhanga na mʉ miina.
Avaanhu ava,
valyale vanofu,
ɨɨsi najɨlyanoghiile kukukala na vaanhu ndavʉle avuo.