ɄKɨlɨsite ghwe lɨtekelo ɨlɨkwɨlanɨfu
10
Indaghɨlo sa Moose mwɨghɨɨghɨ ghwa nofu sino sikwisa.
Ʉmwɨghɨɨghɨ ʉghuo nakwekʉti ghuhʉfia lwoni inofu isio,
ʉlwakʉva naghʉkʉvavɨɨka kuuva vakwɨlanɨfu vwɨmɨla ɨlɨtekelo lɨno litavʉlua kɨla mwaka.
2 Ɨlɨtekelo ɨlio lyale lɨvavalasyaghe lwoni avanya kʉmwɨmɨka ʉNgʉlʉve,
ngale navifitavʉla,
ʉlwakʉva vavalasivue kamo keene,
navaale vikuvona kange kuuti vahosi.
3 Looli ɨlɨtekelo ɨlio lɨkavombekagha kɨla mwaka,
kʉkʉvakʉmbʉsia ʉvʉhosi vwave,
4 ʉlwakʉva ɨdanda ɨja ngʼhambako nɨ ja mhene najɨngamʼbalasie ʉmuunhu ʉvʉhosi vwake.
5 Fye nambe,
ʉKɨlɨsite ye isile pa ɨɨsi,
alyamʼbʉlile ʉNgʉlʉve akati,
“Naghulonda ɨlɨtekelo ɨlya fidɨmua,
nambe ɨlɨtekelo ɨlya fiinu ifingi.
Looli ʉlyandɨngʼhanɨkisie ʉmʼbɨlɨ ghwango kuuva lɨtekelo.
6 Naghukeela ɨlɨtekelo ɨlya fidɨmua,
nɨ lɨtekelo ɨlya kʉvapyanɨla avaanhu ʉvʉhosi.
7 Pe nɨkajova nɨkati,
‘Ghwe Ngʉlʉve nisile,
nisile kuvomba isa vughane vwako,
ndavʉle lɨlembilue mʉ Malembe aMɨmɨke vwɨmɨla ʉne.’ ”a
8 Amasio amalongosi aghuo ʉKɨlɨsite atiile,
“Ʉve naghukeela ɨlɨtekelo ɨlya fidɨmua nɨ lɨtekelo ɨlya fiinu ifingi,
nambe ɨlya kʉpyanɨla avaanhu ʉvʉhosi vwave.”
Alyajovile ʉluo napano ifiinu fyoni ifya kʉtekela fikatavʉlwagha vwɨmɨla indaghɨlo isa Moose.
9 Akajova kange akati,
“Ghwe Ngʉlʉve,
nisile kuvomba isa vughane vwako.”
Mʉ ʉluo,
ʉNgʉlʉve akavʉsia ɨlɨtekelo ɨlya lʉfingo ʉlwa kwanda na kuvɨɨka ɨlɨtekelo ɨlya Yesu.
10 Lɨno,
ʉlwakʉva ʉYesu Kɨlɨsite alyavombile isa vughane vwa Ngʉlʉve,
ʉsue tuvalasivua ʉvʉhosi vwitu vwɨmɨla ɨlɨtekelo ɨlya mʼbɨlɨ ghwake lɨno alyatavwile kamo keene.
11 Mʉ lʉfingo ʉlwa kwanda,
avatekesi vakavombagha kinga ɨmbombo ɨja kʉhʉmia ɨlɨtekelo ɨlio lɨno nalivalasia ʉvʉhosi nambe padebe.b
12 Neke ʉKɨlɨsite alitavwile kamo keene kuuva lɨtekelo,
kuvalasia ʉvʉhosi amasiki ghooni.
Lɨno,
alɨ nʉ vʉtavʉlɨlua palɨkɨmo nʉ Ngʉlʉve,c
13 ighuula kuhanga avaleme avalʉgʉ vaake,
avateme.
14 Vwɨmɨla ʉKɨlɨsite kukutavʉla kuuva lɨtekelo kamo keene,
avavɨkile vano avavalisie kuuva vakwɨlanɨfu amasiki ghooni.
15 Najʉ Mhepo ʉMwɨmɨke ɨkʉtwoleka kuuti,
imhola isi sa kyangʼhaani.
Alyatalile pijova piiti,
16 “ɄMʉtwa ʉNgʉlʉve iiti,
‘Ʉlʉ lwe lʉfingo ʉlʉpia
lʉno nitapivɨɨka na vaanhu ava Isilaeli
ifighono fino fikwisa.
Nilivɨɨka indaghɨlo sango mʉ moojo ghaave,
na kʉkʉsilemba mʉ nhumbula saave.’ ”d
17 Pambele akajova akati,
“Nanilikʉmbʉka kange ʉvʉhosi vwave,
nambe imbombo saave imbiivi.”e
18 Lɨno,
ʉmuunhu angapyanɨlue ʉvʉhosi vwake,
nakʉlɨ vʉfumbue ʉvwa kʉhʉmia kange ɨlɨtekelo.
Kupavɨlanɨla na kukangasania mʉ lwɨtɨko
19 Vanyalʉkolo vango,
ɨdanda ɨja Yesu jɨkʉtʉpelela kukwingila kɨsila vwoghofi Pavwɨmɨke pa Pavwɨmɨke.
20 Vwɨmɨla kufua kwa mwene,
atʉdinduliile ɨsɨla ɨmhia ɨja vwʉmi jɨno jikila pa mwenda ghʉno ghʉsighile Pavwɨmɨke pa Pavwɨmɨke,
ʉmwenda ʉghuo ghwe mʼbɨlɨ ghwake.
21 Lɨno,
ʉlwakʉva tʉlɨ nʉ ntekesi ʉmʼbaha fiijo jʉno ilongosia mʉ nyumba ɨnyɨmɨke ɨja Ngʉlʉve,
kwekʉti avaanhu va Ngʉlʉve,
22 tʉvelaghe pamaaso gha Ngʉlʉve nʉ mwojo ʉmʼbavalafu nʉ lwɨtɨko ʉlwa kyangʼhaani,
ʉlwakʉva tʉvalasivue amasaaghe amaviivi nɨ danda ja Yesu,
kange amavɨlɨ ghiitu ghavalasivue na malenga amavalafu.
23 Tʉgadɨlɨlaghe fiijo ʉlʉhʉvɨɨlo lwitu mʉ lwɨtɨko,
ʉlwakʉva ʉNgʉlʉve jʉno atʉlaghile,
ghwa kyangʼhaani.
24 Tʉtanganaghe na kukangasania mʉ lʉghano na kuvomba ɨmbombo ɨnofu.
25 Natʉngalʉlekaghe ʉlwiho ʉlwa kʉkongʼhaana palɨkɨmo ndavʉle valʉlekile avange.
Looli tʉkangasaniaghe,
tʉghimbaghe kuvomba ʉluo,
ʉlwakʉva ɨkɨghono ɨkya kʉgomoka ʉMʉtwa ʉYesu kɨlɨ piipi.
26 Nave tufivombela giila ʉvʉhosi,
napano tʉkagwile ʉvwakyangʼhaani vwa Ngʉlʉve,
apuo nakwelɨlɨ ɨlɨtekelo ɨlɨngɨ ɨlya kʉtʉvalasia ʉvʉhosi.
27 Looli kɨno kɨsighiile kwe kʉghuula ʉvʉhɨghi vwa Ngʉlʉve vʉno vukwoghofia,
palɨkɨmo nʉ mwoto ʉnkali ghʉno ghulitipula avalʉgʉ vaake.
28 Ʉmuunhu jʉno naalyakʉndile kuvɨngɨlɨla indaghɨlo sa Moose,
neke avaanhu vavɨlɨ nambe vatatu vajovile kuuti avombile ʉluo,
ʉmuunhu ʉjuo akabudwagha kɨsila kʉvonelua ɨkɨsa.
29 Lɨno,
ndepoonu ʉlʉpumuko luuva ndaani kwa muunhu jʉno ɨkʉmʼbenapʉla ʉMwana ghwa Ngʉlʉve,
nɨ danda ɨja lʉfingo jɨno jɨmʼbalisie?
Kange,
luuva ndaani kwa muunhu jʉno iligha ʉMhepo ghwa Ngʉlʉve jʉno ɨkʉvasʉngʉkɨla avaanhu?
Kyangʼhaani ʉlʉpumuko lwake luuva lʉkome kyongo.
30 Tʉkagwile lɨlembilue kuuti,
“Kuvangɨla mbombo jango,
ʉne nivangɨla.”f
Kange lɨlembilue kuuti,
“ɄMʉtwa ʉNgʉlʉve ilikʉvahɨgha avaanhu vaake.”g
31 Kyangʼhaani kuvɨkua mʉ vʉhɨghi vwa Ngʉlʉve jʉno mwʉmi,
kukwoghofia kyongo.
32 Mʉkʉmbʉkaghe ifighono ifya kwanda ye mukagʉla ʉvwakyangʼhaani vwa mhola ja Kɨlɨsite.
Mʉlyapumwike mʉ nyinga,
neke mʉligudile.
33 Pamonga mʉlyale mupumusivua na kulighua pa mapʉgha gha vaanhu.
Pamonga mʉkapumukagha palɨkɨmo na vajiinu vano vakapumusivwagha na kulighua ndavʉle jʉmue.
34 Mʉlyale mʉkʉvavonela ɨkɨsa avajiinu vano vakadindilwagha mʉ ndinde.
Kange,
pano mʉkakunywagha ifiinu fiinu,
mʉlyale nʉ lʉkeelo,
ʉlwakʉva mʉlyakagwile kuuti mʉlɨ nɨ kyʉma ɨkɨnofu fiijo ɨkya masiki ghooni.
35 Lɨno,
mʉlekaghe kudendevʉka,
ʉlwakʉva kughimba kwinu kulikʉvapelela kukwʉpɨla ʉlʉvonolo ʉlʉvaha.
36 Mʉnoghiile kukuguda kuuti mʉvombe isa vughane vwa Ngʉlʉve,
neke mwʉpɨle kɨno ʉNgʉlʉve alyavalaghile.
37 AMalembe aMɨmɨke ghiiti,
“Ʉnsiki ghʉsighiile nʼdebe,
ʉjuo jʉno ikwisa,
alɨ piipi,
naidɨɨla.
38 Avaanhu vango avagholofu vikukalagha
vwɨmɨla kʉkʉnyɨtɨka ʉne.
Neke ʉmuunhu jʉno idendevʉka,
nanɨkʉnkeela nambe padebe.”h
39 Ʉsue natʉlɨ ndavʉle avaanhu avuo vano videndevʉka na kutipulua,
looli tʉlɨ ndavʉle vano vikʉmwɨtɨka ʉNgʉlʉve,
mʉ ʉluo ʉNgʉlʉve ɨkʉtʉpoka.