Ʉvʉtavɨke ʉvwa kʉmwɨmɨka ʉNgʉlʉve mʉ lʉfingo ʉlwa kwanda
9
Ʉlʉfingo ʉlwa kwanda lʉlyale nʉ vʉtavɨke vwake ʉvwa kufuunya na pamonga pavwɨmɨke pa ɨɨsi,
pano avaanhu vakalʉtagha kʉkʉmwɨmɨka ʉNgʉlʉve.
2 Mʉ ʉluo lɨlyajengilue ɨlɨheema ʉmwa kʉmwɨmɨka ʉNgʉlʉve.
Ɨlɨheema ɨlio lɨlyale nʉ mwenda ʉnkome ghʉno ghʉlyaghavile kuuva fyumba fivɨlɨ.
Mʉ kyʉmba ɨkya kwanda mʉlyale nɨ kyɨmɨlo ɨkya taala nɨ meesa jɨno jɨlyavɨkilue amakate ghano ghavɨkilue kʉ mbombo ɨnyɨmɨke.
Ɨkyʉmba ɨkio kɨkatambʉlwagha Pavwɨmɨke.
3 Kukila ʉmwenda ʉghuo,
kwekʉti mʉ kyʉmba ɨkya vʉvɨlɨ pakatambʉlwagha Pavwɨmɨke pa Pavwɨmɨke.
4 Mʉ kyʉmba ɨkio mwekɨlyale ɨkɨtekelelo ɨkya sahabu ɨkya kʉnyanyɨla ʉvʉfumba,
nɨ lɨvokosi ɨlya lʉfingoa lɨno lɨlyamatilue ni sahabu imbale sooni.
Mʉnkate mʉ lɨvokosi ɨlio,
mʉlyale nɨ kɨvɨgha ɨkya sahabu kɨno kɨlyale nɨ Manab nʉ lʉkwegho ʉlwa Aloni lʉno lʉlyalembile amatʉndʉ.
Kange,
mʉlyale ni fiseghu fivɨlɨ fino filyalembilue indaghɨlo kɨjigho isa lʉfingo lwa Ngʉlʉve.
5 Pakyanya pa lɨvokosi ɨlio,
pwefilyale ifihwani fivɨlɨ ifya makelubi ifipelua ifinya mapɨga.
Ifihwani ifio fikahʉfyagha ʉvʉvaha vwa Ngʉlʉve.
Amapɨga ghaake ghalyakupikiile pakyanya pa lɨvokosi apa kʉpyanɨla inyɨvi sa vaanhu.
Neke lɨno,
natʉlɨ nʉ nsiki kukwoleka kɨmo kɨmo mʉ mhola ɨjɨ.
6 Lɨno,
ifiinu ifi fyoni ye fivɨkilue nɨkɨngɨ pano kɨnoghiile,
avatekesi vakingilagha ifighono fyoni mʉ kyʉmba ɨkya kwanda kuvomba ɨmbombo jaave ɨja kʉmwɨmɨka ʉNgʉlʉve.
7 Looli mʉ kyʉmba ɨkya vʉvɨlɨ,
alyale ikwingila jʉ ntekesi ʉmʼbaha kamo keene kʉ mwaka.
Akingilagha nɨ danda ɨja kʉtavʉla kwa Ngʉlʉve vwɨmɨla kuvalasivua inyɨvi saake ni nyɨvi sa vange vooni sino vavombile kɨsila kʉkagʉla.
8 Lɨno,
mʉ vʉtavɨke ʉvuo ʉMhepo ʉMwɨmɨke ɨkʉtʉhʉfia kuuti,
ɨsɨla ɨja vaanhu kukwingila Pavwɨmɨke pa Pavwɨmɨke,
ʉNgʉlʉve naalyahʉfisie,
ʉlwakʉva ɨlɨheema ɨlya mʼbʉkʉʉlʉ lɨlyajiighe pwelɨlɨ.
9 Ɨmbombo jɨno vakavombagha mʉ lɨheema,
kɨhwanɨkɨsio kya masiki agha,
ʉlwakʉva ɨlɨtekelo lɨno lɨkatavʉlwagha kwa Ngʉlʉve,
nalɨkavalasyagha amoojo gha vano vikʉmwɨmɨka.
10 Ʉvʉtavɨke vwake vʉkalʉngɨkagha isa mʼbɨlɨ.
Vʉkalʉngɨkagha vwɨmɨla ifiinu ifya kʉlia,
ni fya kʉnyua,
palɨkɨmo nʉ vʉtavɨke vʉno vʉlɨ papinga ʉvwa kuvalasia.
Inyiiho sooni isio silisila pano ʉNgʉlʉve itavɨka vʉpia ifiinu fyoni.
ɄYesu ghwe lɨtekelo ɨlɨkwɨlanɨfu
11 Lɨno,
ʉKɨlɨsite alisile,
ghwe ntekesi ʉmʼbaha mʉ sooni inofu sino sisile.
Ʉmwene ivomba ɨmbombo jaake mʉ lɨheema ɨlɨnono,
kange lɨkwɨlanɨfu lɨno nalɨjengilue na vaanhu,
kwekʉti nalya mʉ ɨɨsi muno.
12 Alingiile Pavwɨmɨke pa Pavwɨmɨke kamo keene,
naalingiile nɨ danda ɨja mhene nɨ ja ndama,
looli alingiile nɨ danda jaake jʉjuo.
Mʉ ʉluo atʉpeliile ʉvʉvangi ʉvwa kʉvʉsila kʉsila.
13 Mʉ lʉfingo ʉlʉkʉʉlʉ ɨdanda ɨja mhene nɨ ja ngʼhambako nɨ lɨpembo ɨlya ndama fino avatekesi vakavamisilagha avalamafu,
fikavavalasyagha amavɨlɨ ghaave.
14 Neke ɨdanda ɨja Kɨlɨsite jɨlɨ ni ngʉfu kukila ifio,
ʉlwakʉva ʉKɨlɨsite mʉ ngʉfu isa Mhepo ʉghwa kʉvʉsila kʉsila,
alitavwile jʉjuo kuuva lɨtekelo lɨkwɨlanɨfu.
Ɨdanda jaake jivalasia amoojo ghiitu,
vwɨmɨla amaghendele amaviivi ghano ghipelela ʉvʉfue,
neke tʉmʼbombelaghe ʉNgʉlʉve jʉno mwʉmi.
15 Mʉ ʉluo,
ʉKɨlɨsite ghwe nya kʉsambania avaanhu nʉ Ngʉlʉve mʉ lʉfingo ʉlʉpia,
kuuti vano vasalulue,
vʉpɨle ʉvwʉmi ʉvwa kʉvʉsila kʉsila vʉno ʉNgʉlʉve alyalaghile kʉkʉvapeela.
Isio sivombeka,
ʉlwakʉva ʉKɨlɨsite alyafwile pa kɨkovekano,
kuuti avapoke kuhʉma mʉ nyɨvi saave sino valyavombile ye valɨ mʉ lʉfingo ʉlʉkʉʉlʉ.
16 Lʉkagʉliike kuuti,
ʉmuunhu angavɨɨke ʉlʉlaghɨlo vwɨmɨla ʉvʉhaasi vwake,
ʉlʉlaghɨlo ʉluo lukwʉpɨlua nave jʉno alaghile afwile.
17 Ʉlʉlaghɨlo vwɨmɨla ʉvʉhaasi lʉlɨ ni ngʉfu nave jʉno alaghile afwile.
Neke ʉlʉlaghɨlo ʉluo lʉsila ngʉfu nave jʉno alaghile ajiighe mwʉmi.
18 Fye nambe ʉlʉfingo ʉlʉkʉʉlʉ nalʉlyavɨkilue kɨsila kʉkungʼika ɨdanda ɨja fidɨmua.
19 ɄMoose ye amalile kʉkʉvɨmbɨla aVaisilaeli indaghɨlo sooni isa Ngʉlʉve,
akatoola ɨdanda ɨja ndama nɨ ja mhene,
palɨkɨmo na malenga,
nɨ hamba ɨndangali,
na matʉndʉ agha mpiki ʉmʉhisopo,
akamisila ɨkɨtabu ɨkya Ndaghɨlo sa Ngʉlʉve palɨkɨmo na vaanhu vooni.
20 Neke akati,
“Ɨjio je danda jɨno jihʉfia ʉlʉfingo lwa Ngʉlʉve lʉno alyavavʉlile kuuti mʉvɨngɨlɨlaghe.”c
21 Kange,
ɨdanda jɨla akamisila ɨlɨheema ɨlya Ngʉlʉve ni fiinu fyoni fino valyale vivombela kʉkʉmwɨmɨka ʉNgʉlʉve.
22 Kulɨngʼhana ni ndaghɨlo,
ifiinu fyoni fivalasivua nɨ danda,
kɨsila kʉkungʼika ɨdanda inyɨvi nasipyanɨlua.
ɄKɨlɨsite alitavwile kamo keene vwɨmɨla inyɨvi sa vaanhu
23 Ɨlɨheemad ɨlya pa ɨɨsi apa ni fiinu fino mwefilyale fino vakatavʉlɨlagha ɨlɨtekelo,
filyale kɨhwanɨkɨsio kya fiinu ifya kʉkyanya.
Ifiinu ifya pa ɨɨsi filyale fivalasivua nɨ danda ɨja fidɨmua.
Neke ifiinu fifio ifya kʉkyanya,
finoghiile kuvalasivua nɨ lɨtekelo ɨlɨnofu kukila ɨdanda ɨja fidɨmua.
24 Ʉlwakʉva ʉKɨlɨsite naalingiile Pavwɨmɨke pa Pavwɨmɨke pano palyajengilue na vaanhu,
pano paale kɨhwanɨkɨsio kya Pavwɨmɨke pa Pavwɨmɨke kʉkyanya.
Looli alingiile kʉkyanya kʉkuo,
ʉkuo alɨ pamaaso gha Ngʉlʉve vwɨmɨla kʉkʉtʉsʉmɨla ʉsue.
25 ɄKɨlɨsite naalingiile kʉkyanya kukutavʉla kɨla mwaka kuuva lɨtekelo,
ndavʉle ʉntekesi ʉmʼbaha vʉle akingilagha Pavwɨmɨke pa Pavwɨmɨke kɨla mwaka nɨ danda ɨja fidɨmua.
26 Lwale lʉʉve enendɨɨkɨ,
ʉKɨlɨsite ngale apʉmusivue kinga kuhʉma ɨɨsi jipelua.
Neke lɨno nafye lʉlɨvuo!
Ʉmwene alisile kamo keene amasiki agha,
agha vʉsililo,
kuuti itavʉle jʉjuo kuuva lɨtekelo vwɨmɨla kʉkʉtʉpyanɨla inyɨvi siitu.
27 Kange,
ndavʉle ʉmuunhu vʉle ifua kamo keene,
neke pambele ihɨghua nʉ Ngʉlʉve,
28 fye enendɨɨkɨ,
ʉKɨlɨsite alitavwile kuuva lɨtekelo kamo keene,
kuuti avaanhu vinga vapyanɨlue inyɨvi saave.
Kange ilikwisa ʉlwa vʉvɨlɨ,
nakwekʉti ilikwisa kupyanɨla inyɨvi,
looli kʉkʉvapoka vano vikʉmʉghuula nʉ vʉsyʉkue.