Kʉkʉmhovosia ʉNgʉlʉve
13
Lɨno,
mʉfighananaghe ndavʉle lʉnoghiile kʉ vɨtɨki.
2 Jaatu mʉkʉmbʉkaghe kʉkʉvatengelela avahesia,
ʉlwakʉva avange vano valyavombile ʉluo,
valyavatengeliile avanyamhola kɨsila kʉkagʉla.
3 Mʉvakʉmbʉkaghe vano valɨ mʉ ndinde,
mʉvisaghe hwene mʉdindilue palɨkɨmo na veene.
Kange,
mʉvakʉmbʉkaghe vano vipumusivua,
mʉvisaghe hwene mwemue mupumusivua.
4 Avaanhu vooni valolelelaghe vʉnofu ʉvʉtolani vwave,
valekaghe kuvwafuka,
ʉlwakʉva avavwafu na vaghendamwalu,
ʉNgʉlʉve ilikʉvahɨgha.
5 Mʉlekaghe kuuva vahojofu va ndalama,
ʉlwene mʉkwɨlanaghe na fino mʉlɨ nafyo,
ʉlwakʉva ʉNgʉlʉve jʉjuo iiti,
“Nanɨngakʉsyemue kange nanɨngakʉleke lʉsiku.”a
6 Mʉ ʉluo,
fye nambe tujova kɨsila vwoghofi tuuti,
“ɄMʉtwa ʉNgʉlʉve ghwe jʉno ɨkʉnhanga,
nanikwoghopa kɨɨnu.
Ʉmuunhu ndepoonu ɨkʉmbomba kɨki?”b
7 Mʉvakʉmbʉkaghe avalongosi viinu vano valyapʉlisie ɨlɨsio ɨlya Ngʉlʉve kʉlyʉmue,
mʉlolaghe amaghendele ghaave vʉle ghaale manono,
mʉmwɨtɨkaghe ʉNgʉlʉve ndavʉle valyavombile aveene.
8 ɄYesu Kɨlɨsite ghwe jʉla jʉla kuhʉma kʉvʉtengʉlɨlo,
ʉmʉsyʉghʉ na kʉvʉsila kʉsila.
9 Namʉngasyangwaghe ni mbʉlanɨsio isingi ingeesi.
Ʉlʉsʉngʉ lwa Ngʉlʉve lwe lʉno lʉkʉvapelela kuuva ni ngʉfu mʉ moojo ghiinu,
nakwekʉti indaghɨlo sino sikaana nambe kwɨtɨkɨsia kulia fimonga se sino sikʉvapeela ingʉfu.
Indaghɨlo isio nasintangile nambe muunhu jʉno ɨkʉsivɨngɨlɨla.
10 Ʉsue tʉlɨ nɨ kɨtekelelo kɨno avatekesi vano vitekela mʉ lɨheema ɨlya Vayahudi,
navikwɨtɨkɨsɨvua kulia ɨlɨtekelo lɨno lɨtavʉlilue pa kɨtekelelo ɨkio.
11 Mʉ ndaghɨlo isa Kɨyahudi,
ʉntekesi ʉmʼbaha akatolagha ɨdanda ɨja fidɨmua na kutwala Pavwɨmɨke pa Pavwɨmɨke,
jɨɨve lɨtekelo lya kʉpyanɨla avaanhu ʉvʉhosi vwave.
Neke amavɨlɨ agha fidɨmua fino vatekiile vakanyanyɨlɨlagha kʉnji kʉ lɨkaaja.
12 Fye nambe ghwope ʉYesu alyapumusivue na kubudua kʉnji kʉ lɨkaaja,
kuuti avavalasie avaanhu inyɨvi saave nɨ danda jaake jʉjuo.
13 Lɨno,
tʉhʉme mʉ lɨkaaja,
tʉlʉte kʉnji kwa mwene,
twɨtɨke kubedua ndavʉle alyabedilue ʉmwene.
14 Nijova ʉluo,
ʉlwakʉva pa ɨɨsi apa natʉlɨ nɨ lɨkaaja ɨlya masiki ghooni,
looli tughuula kukwingila kʉ lɨkaaja ɨlya kʉkyanya lɨno likwisa.
15 Lɨno,
tʉmʉghiniaghe ʉNgʉlʉve na kupʉlɨsia ʉvʉvaha vwake mʉ lɨtavua lya Yesu amasiki ghooni,
ʉkuo kwe kʉntavʉlɨla ʉNgʉlʉve ɨlɨtekelo.
16 Namʉngavʉhɨlaghe kuvomba inofu na kutangana,
ʉlwakʉva kuvomba ʉluo,
lye lɨtekelo lɨno lɨkʉmhovosia ʉNgʉlʉve.
17 Mʉvakʉndaghe avalongosi viinu na kuvomba sino vikʉvavʉʉla,
ʉlwakʉva aveene vilolelela ʉvwʉmi vwinu pakɨlo na pamwisi,
kange vilikwoleka pamaaso gha Ngʉlʉve vwɨmɨla ɨmbombo jaave ɨjio.
Mʉvakʉndaghe kuuti vavombaghe ɨmbombo jaave nʉ lʉkeelo.
Nave mʉleke kʉkʉvakʉnda,
vivombagha ɨmbombo jaave nʉ lʉsukunalo,
kange ɨmbombo ɨjio,
jiiva sila lʉvʉmbʉlɨlo kʉlyʉmue.
18 Lɨno,
mʉtʉsʉmɨlaghe kwa Ngʉlʉve.
Ʉsue tʉkagwile kuuti nakʉlɨ lʉmonga ʉlʉviivi lʉno tʉvombile pamaaso gha Ngʉlʉve,
ʉlwakʉva tulonda kuuva na maghendele amanofu mʉ sooni.
19 Nɨkʉvasʉʉma fiijo,
mʉsʉmɨlaghe kwa Ngʉlʉve,
kuuti nɨgomoke kʉlyʉmue ngʼhaningʼhaani.
Amasio agha vʉsililo
20 ɄNgʉlʉve ʉghwa lʉtengaano,
alyansyʉsisie ʉMʉtwa ghwitu ʉYesu Kɨlɨsite,
ʉNʼdɨɨmi ʉMʼbaha ʉghwa ngʼholo vwɨmɨla kukuungʼa ɨdanda jaake pa kɨkovekano.
Ɨdanda ɨjio ja lʉfingo lwa masiki ghooni.
21 Lɨno nisʉʉma kuuti,
ʉNgʉlʉve ʉjuo avatange mʉ sooni inofu sino mulonda,
neke mʉvombe isa vughane vwake.
Ʉmwene ivomba mʉ moojo ghiitu sino ikeela pamaaso ghaake.
Ivomba vwɨmɨla ʉYesu Kɨlɨsite.
Mʉ ʉluo ʉYesu aghinwaghe ifighono fyoni.
Ameni.
22 Vanyalʉkolo vango,
nɨvalembiile amasio amadebe agha kʉvakangasia,
nɨkʉvasʉʉma mʉghagadɨlɨlaghe.
23 Nilonda mʉkagʉle kuuti,
ʉnyalʉkolo ghwitu ʉTimoti adindulilue mʉ ndinde.
Lɨno,
angangʉpe kukwisa,
nikwisa naghwo ʉkuo kʉkʉvahʉngɨla.