Sino silahʉmɨla ifighono ifya vʉsililo
3
Lɨno,
ʉkagʉlaghe kuuti,
ifighono ifya vʉsililo kweghiliiva amasiki agha mhumuko.
2 Ʉlwakʉva avaanhu vilikughanagha veene,
viliiva vanya vʉnoghelua vwa ndalama,
vanya kupaala,
vanya matuupa,
vanya maligho,
vano navikʉvoghopa avapaafi vaave,
vano navihongesia,
avasila vwɨmɨke.
3 Vano navikʉvaghana ava kʉvanave,
vano navilonda kusambana,
vano navikughela,
vano navighanile inofu,
vadesi,
valeefi,
4 vohesi,
vanya matingo,
vanya lughinio,
vano vikʉvʉghana ʉvʉnoghelua ʉvwa ɨɨsi vileka kʉkʉmʉghana ʉNgʉlʉve.
5 Avaanhu avuo vivoneka mʉ kɨhwani ɨkya vwɨmɨke,
neke mʉ moojo ghaave vikaana ingʉfu isa Ngʉlʉve.
Avuo nʉngavisaghe vʉmo navo.
6 Mʉ avuo mwevale vano vikwevelʉka mʉ nyumba sa vaanhu,
na kʉkʉvasyanga avakɨjʉʉva avajasu vano vadʉjilue na makole.
Kange,
valɨ nʉ vʉnoghelua vʉno vʉlɨ papinga.
7 Avakɨjʉʉva avuo vimanyɨla jaatu,
neke vikunua lwoni kʉkʉvʉkagʉla ʉvwakyangʼhaani.
8 Avaanhu avuo vano vikwevelʉka,
visigha ʉvwakyangʼhaani ndavʉle ʉYaane nʉ Yambʉle,a
vano valyakanɨngʼhiine nʉ Moose.
Avaanhu avuo vasila lʉhala,
valʉlekile ʉlwɨtɨko.
9 Neke navangafike nambe poonu,
ʉlwakʉva ʉvʉjasu vwave vuliiva pa vʉvalafu kʉ vaanhu vooni,
ndavʉle lwale kwa Yaane nʉ Yambʉle.
Ʉlʉlaghɨlo lwa Paulo kwa Timoti
10 Looli ʉve,
ʉvɨngɨliile imbʉlanɨsio sango na maghendele ghango,
nʉ vʉfumbue vwango,
nʉ lwɨtɨko,
nʉ lugudo,
nʉ lʉghano,
nʉ vʉkifu.
11 Ʉkagwile ndavʉle avaanhu valyangasisie na kʉkʉmhumusia ye nɨlɨ kʉ lɨkaaja ɨlya Antiokia,
ɨlya Ikonio nɨ lya Lisitila.
Kange,
ʉkagwile kuuti nikigudile mʉ nhalamu sooni,
najʉ Mʉtwa akamhoka mʉ isio.
12 Eena,
vooni vano vilonda kʉkʉmʼbɨngɨlɨla ʉNgʉlʉve mwa Yesu Kɨlɨsite,
vipumusivwagha.
13 Neke avasyangi na vahosi vifivisagha vahosi kyongo,
visyangagha na kusyangua.
14 Lɨno ʉve,
ʉjighaghe mʉ sino ʉlyavʉlanɨsivue,
kange ʉsɨtiike,
ʉlwakʉva ʉkagwile kʉ vano ʉlyamanyiile.
15 Kuhʉma ʉvwana ʉghakagwile aMalembe aMɨmɨke ghano ghikʉkʉpeela ʉvʉkagʉsi,
kuhanga kukwʉpɨla ʉvʉpoki vwɨmɨla ʉlwɨtɨko mwa Yesu Kɨlɨsite.
16 AMalembe aMɨmɨke ghooni ghalembilue mʉ vʉlongosi vwa Ngʉlʉve.
Aghuo ghanoghiile kuvʉlanɨsia ʉvwakyangʼhaani,
kʉkʉvapavɨla avaanhu ʉvʉhosi vwave,
kʉkʉvalʉngɨka pano vasovile,
na kʉkʉvavʉnga kuuti vavisaghe na maghendele amanofu.
17 Mʉ ʉluo,
ʉmuunhu ghwa Ngʉlʉve iiva akwɨliine na kulɨngʼhanɨsɨvua kuvomba imbombo sooni inofu.