4
Nɨkʉkʉlaghɨla isi,
pamaaso gha Ngʉlʉve na pamaaso gha Yesu Kɨlɨsite,
jʉno ilikʉvahɨgha avʉʉmi na vafue,
kange ikwisa kutema,
ʉlwakʉva ghwe Ntwa.
2 Ʉpʉlɨsyaghe ɨlɨsio lya Ngʉlʉve,
ʉvombaghe ʉluo ʉnsiki ghʉno ghʉnoghiile na ghʉno naghʉnoghiile.
Ʉvapavɨlaghe,
ʉvadalɨkɨlaghe,
ʉvakangasyaghe avaanhu na kuvʉlanɨsia nʉ lugudo lwoni.
3 Ʉlwakʉva ghʉliisa ʉnsiki,
ghʉno avaanhu navilipʉlɨkɨsyagha imbʉlanɨsio isa kyangʼhaani.
Looli,
vilondagha kupʉlɨka si sino vikeela,
neke vilondagha avavʉlanɨsi fipʉgha fipʉgha ava kʉvavʉlanɨsia isa vughane vwave.
4 Vivʉhɨlagha kupʉlɨkɨsia ʉvwakyangʼhaani,
neke vivɨngɨlɨlagha ifipango ifya vʉdesi.
5 Lɨno ʉve,
ʉvisaghe maaso mʉ sooni,
ghugudaghe mʉ nhalamu,
vombagha ɨmbombo ɨja kʉpʉlɨsia ɨMhola ɨNofu ɨja Ngʉlʉve,
ʉvombaghe vʉnofu mʉ vʉvombi vwako vwoni.
6 Nɨkʉkʉvʉʉla isi,
ʉlwakʉva vita pikʉhʉmia ʉne hwene lɨtekelo ɨlya lʉhʉʉje,
lɨno vipeela pa kɨtekelelo.a
Kwekʉti,
ʉnsiki ghwango ʉghwa kʉfua ghʉfikile.
7 Nɨtengile vʉnono ɨlɨlʉgʉ,
ʉlʉghendo nɨmalile,
kange nɨgadɨliile ʉlwɨtɨko.
8 Lɨno,
kʉsighiile kupelua ɨngeela ɨja vʉgholofu,
jɨno ʉMʉtwa ʉMhɨghi ʉghwa kyangʼhaani ilikʉmheela ɨkɨghono kɨla,
nakwekʉti jʉʉne ne mwene,
looli na vange vooni vano vihʉvɨɨla kukwisa kwa mwene.
Ʉlʉsʉʉmo lwa Paulo
9 Timoti,
ghwangʉpaghe kukwisa kʉlyʉne.
10 ɄDema akandekile,
ʉlwakʉva akavʉghanile ʉvʉnoghelua ʉvwa mʉ ɨɨsi,
akalamʉla kulʉta kʉ lɨkaaja ɨlya Tesalonike.
ɄKilesike alʉtile kʉ Galatia,
ʉTiito alʉtile kʉ Dalimatia.
11 ɄLʉʉka mwene ghwe jʉno pwale apa palɨkɨmo nuune.
Lɨno,
ghwisaghe nʉ Malɨka,
ʉlwakʉva anoghiile kuuva ntangɨli ghwango mʉ mbombo ja Ngʉlʉve.
12 Nɨkansʉngʼhile ʉTikiko kʉ Efeso.
13 Pano ghuliiva ghukwisa,
ghwisaghe nɨ lɨkooti lyango lɨno nɨkalɨlekile kwa Kalipo kʉ Tuloa,
kange ghwisaghe ni fitabu,
kyongo fila ifya ngʼhwembe.
14 ɄAlekisanda ʉmponda fyʉma,
ambombiile ʉvʉviivi kyongo.
ɄMʉtwa ilikʉmhɨgha vwɨmɨla ʉvʉviivi vwake.
15 Na jʉʉve ghulolelelaghe nʉ muunhu ʉjuo,
ʉlwakʉva asighagha kyongo sino tupʉlɨsia.
16 Ʉlwa kwanda ye nikujoleka pa vʉhɨghi,
nakweakaale nambe jʉmo ʉnya kʉnhanga,
vooni vakandekile.
Nisʉʉma ʉNgʉlʉve aleke kʉkʉvavalɨla ʉvʉhosi mʉ ʉluo.
17 Neke ʉMʉtwa akaale palɨkɨmo nuune,
akamheela ingʉfu kupʉlɨsia ɨlɨsio lyake mʉ vwakyangʼhaani vwoni,
kuuti avaanhu vooni vano naVayahudi vapʉlɨke.
ɄMʉtwa akamhoka mʉ vʉfue,
ʉlwakʉva nɨkahwene nɨlɨ mʉ mʉlomo ghwa nyalʉpala.
18 ɄMʉtwa ilikʉmhoka mʉ mbiivi sooni na kʉkʉndɨɨma,
kuhanga kufika kʉ Vʉtwa vwake ʉvwa kʉkyanya.
ɄMʉtwa aghinwaghe ifighono fyoni.
Ameni.
Amasio gha vʉsililo
19 Ʉmhʉngɨlaghe ʉPilisika nʉ Akila na vano valɨ mʉ nyumba ɨja Onesifolo.
20 ɄElasito akajiighe kʉ lɨkaaja ɨlya Kolinto.
ɄTulofimo nɨkamʉlekile kʉ Mileto,
akaale ntamu.
21 Lɨno,
ghwangʉpaghe kukwisa pano ghʉkyale kufika ʉnsiki ʉghwa mhepo.
ɄEbulo nʉ Puude,
nʉ Linosi,
nʉ Kilaudia,
palɨkɨmo na vɨtɨki vooni,
vikʉkʉhʉngɨla.
22 ɄMʉtwa avisaghe palɨkɨmo nuuve.
Ʉlʉsʉngʉ lwake lʉvisaghe numue mweni.