Kuuva nʉ lugudo mʉ mbombo ja Ngʉlʉve
2
Lɨno ʉve mwanango,
ʉvisaghe ni ngʉfu vwɨmɨla ʉlʉsʉngʉ lwa Yesu Kɨlɨsite.
2 Ʉpʉliike sino navʉlanɨsyagha pamaaso gha volesi vinga,
lɨno isio ʉvapeele avaanhu avahʉvɨlua vano vanoghiile kʉkʉvavʉlanɨsia avange.
3 Ghugudaghe mʉ mhumuko palɨkɨmo nuune,
ʉkuo kwe kuuva nsikali nnofu ghwa Yesu Kɨlɨsite.
4 Ʉnsikali ikusigha kuvomba imbombo sino nasakɨsikali,
kuuti amhovosie ʉmʼbaha ghwake.
5 Nambe ʉnya kʉghelana mʉ lʉneeno,
angakile,
naangapelue ʉlʉvonolo nave nagheliine mʉ vʉtavɨke vwa lʉneeno.
6 Ʉmuunhu jʉno ilɨma nʉ lʉghimbo,
ʉjuo anoghiile kuuva mʉlongosi kukwʉpɨla ifipeke.
7 Timoti,
ʉsivɨkaghe mʉ mwojo sino nɨkʉkʉvʉʉla,
ʉlwakʉva ʉMʉtwa ɨkʉkʉpeela ʉlʉhala ʉlwa kʉkagʉla sooni.
8 Jaatu ʉnkʉmbʉkaghe ʉYesu Kɨlɨsite ʉghwa kɨsina kya ntwa ʉDavɨdi,ab
jʉno ʉNgʉlʉve alyansyʉsisie kuhʉma kʉ vafue,
ndavʉle jiiti ɨMhola ɨNofu jɨno nipʉlɨsia.
9 Vwɨmɨla ɨMhola ɨjio,
ʉne nipumuka kuhanga kukʉngua ni nyololo hwene nɨlɨ mhosi.
Looli ɨlɨsio lya Ngʉlʉve nalikʉngua.
10 Lɨno,
ʉne nikuguda mʉ sooni vwɨmɨla avasalʉlua va Ngʉlʉve,
kuuti voope vʉpɨle ʉvʉpoki,
vʉno vʉlɨ mwa Yesu Kɨlɨsite,
na kuuva nʉ mwene mʉ vʉvaha vwake ʉvwa kʉvʉsila kʉsila.
11 Ɨlɨsio ɨlɨ lya kyangʼhaani kuuti,
“Nave tʉfwile palɨkɨmo nʉ Kɨlɨsite,
tʉlaava vʉʉmi palɨkɨmo nʉ mwene.
12 Nave tukuguda,
tʉlatema palɨkɨmo nʉ mwene.
Nave tʉkʉnkaana ʉmwene,
ghwope alatʉkaana ʉsue.
13 Nave ʉsue natʉkʉmhʉvɨɨla,
ʉmwene ijigha mhʉvɨlua ifighono fyoni,
ʉlwakʉva ʉmwene jaatu ghwa kyangʼhaani.”
Ʉmʼbomba mbombo ʉnnofu
14 Ʉvakʉmbʉsyaghe isio na kʉkʉvapavɨla pamaaso gha Ngʉlʉve,
valekaghe kukanɨngʼhana vwɨmɨla ʉtʉsio ʉtʉdebe.
Amakanɨngʼhano aghuo masila lʉvʉmbʉlɨlo,
looli ghikʉvanangania vano vipʉlɨka.
15 Ʉghimbaghe kuvomba vʉnofu ɨmbombo pamaaso gha Ngʉlʉve.
Ʉʉve mʼbomba mbombo jʉno ɨtɨkɨsivue nʉ mwene,
ʉmʼbomba mbombo ʉnsila soni vwɨmɨla ɨmbombo jaake,
jʉno ipʉlɨsia mʉ vʉgholofu ɨlɨsio ɨlya kyangʼhaani.
16 Ʉsilekaghe imbʉlanɨsio isa vaanhu isila lʉvʉmbʉlɨlo,
isa kɨjasu,
ʉlwakʉva isio sikʉvavɨɨka avaanhu patali kyongo nʉ Ngʉlʉve.
17 Imbʉlanɨsio saave sihwene kɨgoha kɨno kilia ʉmʼbɨlɨ.
Mʉnkate mʉ avuo mwale ʉHimenaayo nʉ Fileto,
18 avuo vasovile kyongo,
vavʉlekile ʉvwakyangʼhaani.
Vinangania ʉlwɨtɨko ʉlwa vaanhu avange pano viiti,
ʉlʉsyʉko lwa vafue lʉkilile.
19 Neke ʉlwalo lʉno lʉvɨkilue nʉ Ngʉlʉve lʉkangafu,
lʉlɨ na masio agha,
“ɄMʉtwa ʉNgʉlʉve avakagwile avaanhu vaake,”c
kange,
“Ʉmuunhu ghweni jʉno ikutambʉla
kuuti ʉmwene ghwa Mʉtwa ʉNgʉlʉve,
avʉlekaghe ʉvʉhosi.”
20 Mʉ nyumba ɨja mmofu mwefili ifikongʼholo ifya lʉtogo ifya kyʉma,
kange mwefili ni fya nhapo ni fya mapiki.
Fimonga fya kʉvombela ɨmbombo ɨnyoghopua,
ifingi fya kʉvombela ɨmbombo ɨja jaatu.
21 Lɨno,
ʉmuunhu angivalasie mʉlwa kʉvʉleka ʉvʉhosi ʉvuo,
iiva kɨkongʼholo ɨkɨsalʉlua kɨno kɨvalasivue,
kange iiva anoghiile kwa Mʼbaha ghwake,
ɨmikue mʉ mbombo sooni inofu.
22 Ʉvisaghe patali nʉ vʉnoghelua ʉvwa mʉ vʉjeleela,
ʉvɨngɨlɨlaghe ʉvʉgholofu,
nʉ lwɨtɨko,
nʉ lʉghano nʉ lʉtengaano.
Ʉvisaghe mʉ ʉluo palɨkɨmo na vano vikufuunya kwa Mʉtwa nʉ mwojo ʉmʼbalafu.
23 Ʉvisaghe patali nʉ lʉkaani ʉlwa kɨjasu ʉlʉsila lʉvʉmbʉlɨlo,
ʉlwakʉva ʉkagwile kuuti ʉluo lupela amabaatu.
24 Kange,
nalʉnoghiile ʉmʼbombi ghwa Mʉtwa kuuva nya mabaatu.
Looli,
avisaghe mhʉʉgʉ kʉ vaanhu vooni,
nya lugudo,
jʉno akagwile kuvʉlanɨsia.
25 Kange,
avapavɨlaghe mʉ vʉhʉʉgʉ vano vikanɨngʼhana nʉ mwene,
kuuti nave lʉnoghiile,
ʉNgʉlʉve avapeele kulaata na kukagʉla ʉvwakyangʼhaani.
26 Neke,
ʉlʉhala lwave lʉvagomokele,
vakuluke mʉ lʉtegho lwa Setano,
jʉno avakolile kuuti vavombaghe isa vughane vwake.