Ɨkalata ɨja vʉvɨlɨ ɨja Paulo kwa
Timoti
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Paulo ne jʉno nɨkemelilue kuuva nsungʼhua ghwa Yesu Kɨlɨsite mʉ vughane vwa Ngʉlʉve.
Nɨkemelilue kupʉlɨsia ɨmhola ɨja vwʉmi vʉno vʉlɨ mwa Yesu Kɨlɨsite,
vʉno ʉNgʉlʉve alyalaghile kʉkʉtʉpeela.
2 Nɨkʉkʉlembela ʉve Timoti ghwe jʉno ʉlɨ hwene mwanango mʉghanɨke.
Ʉlʉsʉngʉ nɨ lɨpyana nʉ lʉtengaano,
kuhʉma kwa Ngʉlʉve ʉNhaata na kwa Mʉtwa ʉYesu Kɨlɨsite fivisaghe nuuve.
ɄPaulo ɨkʉmhongesia ʉNgʉlʉve na kʉkʉnkangasia ʉTimoti
3 Nɨkʉmhongesia ʉNgʉlʉve jʉno nɨkʉmʼbombela nʉ mwojo ʉmʼbalafu,
ndavʉle valyamʼbombiile avakʉʉlʉ viitu.
Kange,
nɨkʉmhongesia pano nɨkʉkʉkʉmbʉka mʉ nyifuunyo sango pakɨlo na pamwisi.
4 Pano nikʉmbʉka amasosi ghaako ye tuhwesania,
nisyʉkua kyongo kutangʼhana nuuve,
kuuti nɨɨve nʉ lʉkeelo ʉlʉvaha.
5 Kange,
nikʉmbʉka ʉlwɨtɨko lwako ʉlʉsila vʉkedʉsi.
Ʉlwɨtɨko ʉluo,
alyale nalwo ʉpaapa ghwako ʉLoisi nʉ mama ghwako ʉEunike,
nɨkagwile kuuti na jʉʉve ʉlɨ nalwo.
6 Fye nambe nɨkʉkʉkʉmbʉsia kuuti,
ʉghimbaghe kʉkʉkɨvombela ɨkɨpelua kɨno alyakʉpeliile ʉNgʉlʉve ye nɨkʉkwɨmɨka.
7 Ʉlwakʉva ʉMhepo jʉno ʉNgʉlʉve alyatʉpeliile naghwa kʉtʉvɨɨka tʉvisaghe voghofi,
looli ghwa kʉtʉpeela ingʉfu,
ʉlʉghano na kukulolelela.
8 Lɨno,
nʉngavonaghe soni kukwoleka imhola isa Mʉtwa ghwitu ʉYesu Kɨlɨsite,
nambe kuvona soni ʉlwakʉva ʉne nɨlɨ mʉ ndinde vwɨmɨla ʉmwene.
Ʉlwene ghugudaghe mʉ mhumuko palɨkɨmo nuune,
vwɨmɨla ɨMhola ɨNofu ndavʉle ghupelua ingʉfu nʉ Ngʉlʉve.
9 Ʉmwene akatʉpoka,
akatʉvɨɨka tʉʉve vɨmɨke.
Naalyavombile ʉluo vwɨmɨla imbombo siitu inofu,
looli alyavombile vwɨmɨla ʉvughane vwake nʉ lʉsʉngʉ lwake mwa Yesu Kɨlɨsite kuhʉma ɨɨsi ye jɨkyale kupelua.
10 Lɨno,
ʉNgʉlʉve ahʉfisie ʉlʉsʉngʉ lwake kʉlyʉsue,
mʉlwa kwisa ʉMpoki ghwitu ʉYesu Kɨlɨsite.
Ʉmwene alefisie ingʉfu isa vʉfue,
vwɨmɨla ɨMhola ɨNofu avonisie ʉvwʉmi ʉvwa kʉvʉsila kʉsila.
11 Vwɨmɨla ɨMhola ɨNofu ɨjio,
nɨsalulue kuuva nʼdalɨki,
nsungʼhua,
kange mʼbʉlanɨsi.
12 Mʉ ʉluo nɨlɨ mʉ lʉpumuko,
neke nanivona soni,
ʉlwakʉva nɨnkagwile jʉno nɨmwɨtiike,
kange nɨkagwile kuuti,
ʉvwakyangʼhaani vʉno alyamheliile,a
ɨkʉvʉlolelela vʉnofu kuhanga kufika ɨkɨghono kɨla.
13 Ʉgadɨlɨlaghe vʉnofu imbʉlanɨsio isa kyangʼhaani sino nɨlyakʉvʉlanisie.
Ʉgadɨlɨlaghe isio palɨkɨmo nʉ lwɨtɨko nʉ lʉghano mwa Yesu Kɨlɨsite.
14 Ʉlolelelaghe ɨmhola ɨnofu jɨno ʉlyapelilue.
Ʉlolelelaghe ɨmhola ɨjio mʉ ngʉfu isa Mhepo ʉMwɨmɨke jʉno alɨ nkate mʉlyʉsue.
15 Timoti,
ʉve ʉkagwile kuuti avaanhu vooni ava mʉ kɨghavob ɨkya Asia vandekile.
Nkate mʉ avuo mwale ʉFigelo nʉ Helimogene.
16 Nisʉʉma ʉMʉtwa avasʉngʉkɨle ava mʉ nyumba ɨja Onesifolo,
ʉlwakʉva kekinga ahovosyagha ʉmwojo ghwango.
Kange,
naakavwene soni kukwisa kʉkʉndola,
pano nɨlɨ mʉ ndinde.
17 Ʉlwene ye isile mʉ lɨkaaja ɨlya Looma,
akaghimbile pikʉndonda kuhanga ambona.
18 ɄMʉtwa ʉYesu ampeele ʉOnesifolo ɨlɨpyana,
kuhʉma kwa Mʉtwa ʉNgʉlʉve ɨkɨghono ɨkya vʉhɨghi.
Na jʉʉve ʉkagwile vʉnofu inyinga sino ambombiile kʉ lɨkaaja ɨlya Efeso.