Kukwisa kwa Mʉtwa ʉYesu na kuvoneka ʉMhosi jʉla
2
Lɨno vanyalʉkolo viitu,
tʉkʉvalembela vwɨmɨla ɨmhola ɨja kwisa kwa Mʉtwa ghwitu ʉYesu Kɨlɨsite,
na vʉle tulikongʼhaana kwa mwene.
Tʉkʉvasʉʉma,
2 mʉlekaghe kukenyemʉsɨvua na kuuva ni nganighani,
vwɨmɨla ʉvʉvɨli vʉmonga,
nambe imhola simonga,
nambe kʉ kalata jɨno viiti jɨhʉmile kʉlyʉsue,
kuuti ɨkɨghono ɨkya kwisa ʉMʉtwa kɨfikile.
3 Ʉmuunhu ghweni naangavasyangaghe nambe mʉ lʉmonga,
ʉlwakʉva ɨkɨghono ɨkio nakilikwisa kuhanga vʉhʉmile taasi ʉvʉgalʉsi,
nʉ Mhosi jʉla jʉno ilitipulua lwoni asevelʉke.
4 ɄMhosi ʉjuo isighagha fyoni fino avaanhu vikʉfivona kuuti ghwe ngʉlʉve,
nambe fino avaanhu vikufuunya kʉ ifio,
na kukuvɨɨka kuuti ʉmwene ghwe mʼbaha kʉ fyoni ifio.
Neke ikuvɨkagha mʉ nyumba ɨnyɨmɨke ɨja kufunyila ɨja Ngʉlʉve,
na kukughinia kuuti ʉmwene ghwe Ngʉlʉve.
5 Asi,
namukʉmbʉka kuuti nɨlyale nɨkʉvavʉʉla imhola isi,
ye nɨlɨ palɨkɨmo numue?
6 Ʉmue mʉkagwile kɨno kɨkʉnsigha ʉMhosi ʉjuo,
aleke kuvoneka lɨno,
kuuti ʉNgʉlʉve ansevelʉle mʉ nsiki ghwake.
7 Nambe lɨno ʉMhosi ʉjuo ivomba imbombo saake mʉ vʉsyefu,
neke naifivonekagha kuhanga jʉno ɨkʉnsigha iliiva avʉsivue.
8 Apuo pepano ʉMhosi ʉjuo ilisevelʉka.
Neke ʉMʉtwa ʉYesu ilikʉmʼbuda ʉMhosi ʉjuo nʉ mwʉja kuhʉma mʉ mʉlomo ghwake,
na kʉkʉntipula nʉ vʉvaha vwake vʉno vulivoneka alaava ikwisa.
9 Pano alaava ikwisa ʉMhosi ʉjuo,
ilikwisa mʉ ngʉfu isa Setano,
na kuvomba ifivalɨlo ni fidegho finga ifya vʉdesi,
10 nʉ vʉsyangi vwoni.
Ilivombagha ʉluo kʉ vano visova,
ʉlwakʉva navalyɨtiike kʉkʉvʉghana ʉvwakyangʼhaani kuuti vʉpɨle ʉvʉpoki.
11 Fye nambe ʉNgʉlʉve ɨtɨkisie ingʉfu isio sino sisofia sivateme,
neke vɨtɨkaghe isa vʉdesi.
12 Apuo vooni vano navikwɨtɨka ʉvwakyangʼhaani,
vikeela ʉvʉhosi,
vilihɨghua.
Kukangala na kugadɨlɨla imbʉlanɨsio
13 Neke ʉsue tʉnoghiile kʉkʉmhongesia ʉNgʉlʉve ifighono fyoni,
vwɨmɨla ʉmue mwe vɨtɨki vajiitu,
mwe vano ʉMʉtwa avaghanile.
Tʉkʉmhongesia,
ʉlwakʉva alyavasalwile kuhʉma kʉvʉtengʉlɨlo kuuti mwʉpɨle ʉvʉpoki,
mʉlwa kʉvalasivua nʉ Mhepo ʉMwɨmɨke na kukwɨtɨka ʉvwakyangʼhaani.
14 ɄNgʉlʉve alyavakemelile mwʉpɨle ʉvʉpoki ʉvuo,
vwɨmɨla kupʉlɨka ɨMhola ɨNofu jɨno tʉkapʉlisie kʉlyʉmue,
kuuti mʉʉve mʉ vʉvaha ʉvwa Mʉtwa ghwitu ʉYesu Kɨlɨsite.
15 Lɨno vanyalʉkolo viitu,
mʉkangalaghe na kugadɨlɨla imbʉlanɨsio sino mʉkʉpiile kukilila mʉ masio ghiitu,
nambe sino tʉkavalembiile mʉ kalata.