Ʉvʉfumbue vwa nyifuunyo
3
Lɨno vanyalʉkolo,
mʉtʉsʉmɨlaghe kuuti ɨmhola ja Mʉtwa,
jɨkwɨlaghe ngʼhaningʼhaani na kughinisivua,
ndavʉle lʉlɨvuo kʉlyʉmue.
2 Kange,
mʉnsʉmaghe ʉNgʉlʉve kuuti atʉpoke na vaanhu avahosi.
Ʉlwakʉva avaanhu vinga navikʉjɨtɨka ɨmhola ja Yesu Kɨlɨsite.
3 Looli ʉMʉtwa nnofu,
ilikʉvakangasia ʉmue na kʉkʉvalolelela,
kuuti ʉMhosi aleke kʉkʉvalema.
4 Na jʉsue tʉlɨ nʉ lʉhʉvɨɨlo mwa Mʉtwa kuuti,
muvomba kange mufivombagha sino tʉkavavʉlile.
5 ɄMʉtwa alongosyaghe amoojo ghiinu,
kuuva nʉ lʉghano lwa Ngʉlʉve na kuuva nʉ lugudo lwa Kɨlɨsite.
Ʉlʉpavɨlo vwɨmɨla kukukala kɨsila kʉvomba ɨmbombo
6 Vanyalʉkolo,
tʉkʉvalaghɨla mʉ lɨtavua lya Mʉtwa ʉYesu Kɨlɨsite kuuti,
mʉvisaghe patali na vɨtɨki vooni avoolo,
vano navivɨngɨlɨla imbʉlanɨsio sino tʉkavapeliile.
7 Ʉmue mʉlʉmanyile ndavʉle lʉnoghiile kuvɨngɨlɨla vʉle tʉkikalile kʉlyʉmue,
ʉlwakʉva ʉsue ye tʉlɨ kʉlyʉmue,
natʉlyale voolo.
8 Kange,
natʉlyale tulia ɨkyakʉlia kya muunhu kɨsila kʉhomba.
Looli tʉlyale tuvomba nʉ lʉghimbo pakɨlo na pamwisi,
kuuti tʉleke kuuva nsigho kwa muunhu ghweni ʉghwa kʉlyʉmue.
9 Ye tuvomba ʉluo,
nakwekʉti natʉkanoghiile kukwʉpɨla ʉlʉtango,
looli twavombagha kuuti tʉʉve kɨhwanɨkɨsio kʉlyʉmue.
10 Ʉnsiki ye tʉlɨ palɨkɨmo numue,
tʉlyale tʉkʉvavʉʉla kuuti,
“Ʉmuunhu jʉno nailonda kuvomba ɨmbombo,
naanoghiile kulia.”
11 Tʉjovile amasio aghuo,
ʉlwakʉva tʉpʉliike kuuti,
kwevale vamonga kʉlyʉmue voolo,
navivomba kɨmonga,
looli vaholiholi.
12 Tʉkʉvalaghɨla na kʉkʉvapavɨla avaanhu avuo mʉ lɨtavua lya Mʉtwa ʉYesu Kɨlɨsite,
vatenganaghe,
vavombaghe ɨmbombo,
neke vavisaghe nɨ kyakʉlia.
13 Neke ʉmue mwe vɨtɨki vajiitu,
namʉngavʉhɨlaghe kuvomba inofu.
14 Mʉvisaghe patali nʉ muunhu ghweni jʉno naivɨngɨlɨla amasio ghano tʉvalembiile mʉ kalata ɨjɨ.
Kange,
namʉngahangɨlanɨlaghe naghwo,
kuuti avonaghe soni.
15 Namʉngamʼbɨkaghe hwene mʉlʉgʉ,
looli mʉmpavɨlaghe ndavʉle mʉkʉvapavɨla avɨtɨki avajiinu.
Amasio gha kʉhwesia
16 Lɨno,
ʉMʉtwa ʉYesu ʉmpela lʉtengaano,
avapelaghe ʉlʉtengaano ifighono fyoni,
mʉ sooni.
ɄMʉtwa avisaghe numue mweni.
17 Ʉne ne Paulo nilemba ʉlʉhʉngɨlo ʉlʉ nʉ lʉvoko lwango jʉʉne,
enendɨɨkɨ fye nilemba mʉ kalata sango sooni.
18 Ʉlʉsʉngʉ lwa Mʉtwa ghwitu ʉYesu Kɨlɨsite,
lʉvisaghe numue mweni.