Ɨkalata ɨja kwanda ɨja Paulo kʉ
Vatesalonike
Ɨmhola ɨndongosi
Ɨkalata ɨjɨ alyalembile ʉnsungʼhua ʉPaulo. Alyavalembiile avɨtɨki ava mʉ lɨkaaja ɨlya Tesalonike. Ɨlɨkaaja ɨlɨ lɨlyale lɨvaha mʉ kɨghavo ɨkya Makedonia mʉ ɨɨsi ɨja Vʉgiliki ʉlʉbale ʉlwa kʉvwehe. Ʉnsungʼhua ʉPaulo ghwe mwene alyatengʉlisie ɨkɨpʉgha kya vɨtɨki mʉ lɨkaaja ɨlio (Mbombo sa Vasungʼhua 17). Neke akavʉʉka ngʼhaningʼhaani mʉ lɨkaaja ɨlio ʉlwakʉva aVayahudi vamonga vakalondagha kʉkʉmʼbuda. Ʉnsiki ye ghʉkilile, ʉntangɨli ghwake ʉTimoti akiisa kʉkʉmʼbʉʉla kuuti, avɨtɨki ava kʉ Tesalonike vajiighe nʉ lwɨtɨko nambe valɨ mʉ mhumuko. Pe ʉPaulo akalemba ɨkalata ɨjɨ kʉkʉvakangasia na kukwamʉla sino vaposisie kwa mwene.
Mʉ kalata ɨjɨ, ʉPaulo ɨkʉmhongesia ʉNgʉlʉve vwɨmɨla ʉlwɨtɨko nʉ lʉghano lʉno valɨ nalwo avɨtɨki kʉ Tesalonike. Kange, ɨkʉvakʉmbʉsia ʉlʉveelo lʉno alyale nalwo, ye ikukala navo kʉ lɨkaaja ɨlio. Palɨkɨmo nisio ɨkʉvoleka vʉle luliiva kʉ vɨtɨki vano vafwile, na kʉkʉvoleka sino silivoneka iliiva ikwisa kange ʉYesu Kɨlɨsite. Kʉvʉsililo ɨkʉvavʉlanɨsia vʉle vilondua kukulolelela ye ghʉkyale kufika ʉnsiki ʉghuo ʉghwa kwisa ʉYesu Kɨlɨsite.