4
Na jʉmue mwe vatwa,
mʉvavombelaghe inofu na kʉkʉvavombela sino sinoghiile avakami viinu,
mʉkagʉlaghe kuuti na jʉmue mʉlɨ nʉ Ntwa kʉkyanya.
Ʉlʉlaghɨlo vwɨmɨla kukufuunya
2 Mufunyaghe kwa Ngʉlʉve ifighono fyoni.
Pano mukufuunya mulolelelaghe vʉnofu,
kange mʉmhongesyaghe ʉNgʉlʉve.
3 Mʉtʉsʉmɨlaghe na jʉsue kuuti,
ʉNgʉlʉve atʉdindulile ʉmʉlyango ʉghwa kʉpʉlɨsia ɨlɨsio lyake lɨno je mhola ja Kɨlɨsite,
jɨno najɨkagʉliike kʉ vaanhu.
Vwɨmɨla ɨmhola ɨjio,
ʉne nɨdindilue mʉ ndinde.
4 Nisʉʉma mʉsʉmɨlaghe kuuti nɨpʉlɨsie jɨkagʉlɨke vʉnofu ndavʉle lʉnoghiile.
5 Mʉhʉfyaghe ʉlʉveelo ʉlʉnono kʉ vano navɨtɨki.
Mʉvombaghe ʉluo ʉnsiki ghwoni ghʉno mʉlɨ naghwo.
6 Amasio ghiinu ghavisaghe manofu ifighono fyoni.
Mʉjovaghe amasio ghano ghanoghiile.
Mʉkagʉlaghe vʉle lʉnoghiile kʉkʉmwamʉla ʉmuunhu ghweni.
Ʉlʉhʉngɨlo ʉlwa vʉsililo
7 ɄTikiko ʉnyalʉkolo ghwitu ʉmʉghanɨke,
ikwisa kʉkʉvavʉʉla imhola sango sooni.
Ʉjuo mʼbombi nnofu,
kange mʼbombi nʼjango mʉ mbombo ja Mʉtwa.
8 Fye nambe nɨnsungʼhile kʉlyʉmue kuuti iise avavʉʉle imhola siitu na kʉkʉvakangasia amoojo ghiinu.
9 Ikwisa palɨkɨmo nʉ Onesimo,
ʉnyalʉkolo ghwitu ʉmʉghanɨke,
muunhu nnofu,
kange muunhu ghwa kʉlyʉmue.
Avuo vikʉvavʉʉla sooni sino sivombeka palyʉsue apa.
10 ɄAlisitaliko jʉno adindilue mʉ ndinde palɨkɨmo nuune ɨkʉvahʉngɨla.
Ghwope ʉMalɨka,
ʉmfyalave ghwa Balinaba jʉno nɨkavalaghiile vʉle lʉnoghiile kʉkʉmwʉpɨla,
ɨkʉvahʉngɨla.
Angafike kʉlyʉmue mʉmwʉpɨlaghe vʉnofu.
11 Najʉ Yesu jʉno itambʉlua Yusito,
ɨkʉvahʉngɨla.
Mʉ Vayahudi vano vamwɨtiike ʉYesu Kɨlɨsite,
avuo veene,
ve vano vivomba ɨmbombo ɨja Vʉtwa vwa Ngʉlʉve palɨkɨmo nuune.
Avaanhu avuo vikʉngʼhangasia fiijo.
12 ɄEpafula,
ʉmhʉma kʉlyʉmue,
ʉmʼbombi ghwa Yesu Kɨlɨsite,
ɨkʉvahʉngɨla.
Ifighono fyoni ighimba kʉkʉvasʉmɨla ʉmue kuuti mʉsindamale na kukangala na kuuva ni ngʉfu mʉ sooni sino ilonda ʉNgʉlʉve.
13 Nijova ʉluo,
ʉlwakʉva nɨkʉmwagha vʉle ighimba kuvomba ɨmbombo vwɨmɨla ʉmue na vano valɨ mʉ lɨkaaja ɨlya Laodikia nɨ lya Helapoli.
14 ɄLʉʉka ʉmʉghanga ghwitu ʉmʉghanɨke,
nʉ Dema voope vikʉvahʉngɨla.
15 Mʉvahʉngɨlaghe avɨtɨki avajiitu vano valɨ kʉ Laodikia.
Mʉmhʉngɨlaghe ʉNimfa palɨkɨmo nɨ kɨpʉgha ɨkya vɨtɨki kɨno kikongʼhaana kukufuunya mʉ nyumba jaake.
16 Mʉngɨmbe ɨkalata ɨjɨ,
namʉngajighaghe najo,
mʉtwalaghe kʉ kɨpʉgha ɨkya vɨtɨki ava kʉ Laodikia voope vɨmbe,
na jʉmue mwɨmbe ɨkalata jɨno nɨvalembiile aveene.
17 Kange,
mʉmʼbʉlaghe ʉAlikipo kuuti ɨmbombo jɨla jɨno apelilue nʉ Mʉtwa avombaghe na kumala vʉnofu.
18 Ʉne ne Paulo nilemba ʉlʉhʉngɨlo ʉlʉ nʉ lʉvoko lwango jʉʉne.
Mʉkʉmbʉkaghe kuuti nɨlɨ mʉ ndinde.
Ʉlʉsʉngʉ lwa Ngʉlʉve lʉvisaghe palɨkɨmo numue.