3
Lɨno,
ʉlwakʉva ʉNgʉlʉve avasyʉsisie palɨkɨmo nʉ Kɨlɨsite,
mʉlondaghe sino sili kʉkyanya kʉno ʉKɨlɨsite ikalile,
alɨ nʉ vʉtavʉlɨlua ʉvʉvaha palɨkɨmo nʉ Ngʉlʉve.a
2 Mʉsaghaghe sino sili kʉkyanya,
namʉngasaghaghe isa mʉ ɨɨsi muno.
3 Nijova enendɨɨkɨ,
ʉlwakʉva ʉvwʉmi vwinu ʉvwa lʉtasi vʉfwile,
ʉvwʉmi vwinu ʉvʉpia kwe kukukala palɨkɨmo nʉ Kɨlɨsite mwa Ngʉlʉve,
neke ʉluo naluvoneka na maaso.
4 ɄKɨlɨsite jʉno ghwe vwʉmi vwinu iliiva ivoneka,
pe na jʉmue mulivoneka palɨkɨmo nʉ mwene mʉ vʉvaha vwake.
5 Lɨno,
mʉsilekaghe lwoni isa mʉ ɨɨsi:
ʉvʉghendamwalu,
ʉvʉvwafu,
ʉvʉnoghelua ʉvʉviivi,
amasaaghe amaviivi,
nʉ vʉhojofu.
Kuhojoka kwe kwɨmɨka ifihwani.
6 Vwɨmɨla isio,
ɨngʼhalaasi ja Ngʉlʉve jɨkʉvisila vooni vano vivomba isio.
7 Na jʉmue ʉlʉtasi ye mulongosivua ni sa mʉ ɨɨsi,
mʉlyale muvomba isio.
8 Neke lɨno mʉsileke isi sooni:
ɨngʼhalaasi,
ɨlyojo,
ʉvʉhosi,
amaligho na kujova amasio ghano naghanoghiile.
9 Namʉngavʉlanaghe isa vʉdesi,
ʉlwakʉva mʉlʉlekile ʉlʉveelo lwinu ʉlʉkʉʉlʉ palɨkɨmo na maghendele ghaake,
10 na kuuva nʉ lʉveelo ʉlʉpia.
ɄNgʉlʉve ipela ʉlʉveelo ʉlʉpia nkate mʉlyʉmue,
na kʉkʉvapelela mʉhwanane nʉ mwene jʉno apelile ʉluo,
neke mʉnkagʉle vʉnofu.
11 Apuo nakʉlɨ Mʉyahudi nambe jʉno naMʉyahudi,
nakʉlɨ jʉno avombilue ɨkɨvʉngo nambe jʉno naavombilue ɨkɨvʉngo,
nakʉlɨ mpooma ʉnʼjasu nambe ʉmpooma ʉmʉlʉgʉ,
nakʉlɨ nkami nambe ʉmwavʉke.
Looli ʉKɨlɨsite ghwe fiinu fyoni,
kange alɨ nkate mʉ vooni.
12 Lɨno,
ʉlwakʉva ʉNgʉlʉve avasalwile kuuva vɨmɨke vaghanɨke,
mʉvisaghe nɨ kɨsa,
vakoola,
vanya lujisio,
vahʉʉgʉ na vanya lugudo.
13 Mʉsaghɨlanaghe na kukuguda.
Nave jʉmonga alɨ nɨ lɨsio nʉ nʼjaake,
anoghiile kʉkʉnsaghɨla ndavʉle ʉMʉtwa vʉle avasaghiile ʉmue.
14 Ɨkɨvaha,
mʉghananaghe,
ʉlwakʉva ʉlʉghano lwe lʉno lupelela ʉvʉmo ʉvʉkwɨlanɨfu.
15 Ʉlʉtengaano kuhʉma kwa Kɨlɨsite lʉtemaghe mʉ moojo ghiinu.
Mʉkemelilue kuuva nʉ lʉtengaano ʉluo pakate palyʉmue na kukukala palɨkɨmo ndavʉle ifilʉngo ifya mʼbɨlɨ ghʉmo.
Kange,
mʉmhongesyaghe ʉNgʉlʉve.
16 Mʉgadɨlɨlaghe fiijo ɨlɨsio lya Kɨlɨsite,
mʉvʉlanɨsaniaghe na kupavɨlanɨla vʉnono.
Mwɨmbaghe inyɨmbo isa kʉmpaala ʉNgʉlʉve,b
inyɨmbo isa kʉmwɨmɨka,
ni nyɨmbo isa mʉ moojo ghiinu,
kwekʉti sino mupelua nʉ Mhepo ʉMwɨmɨke.
Mʉmwɨmbɨlaghe ʉNgʉlʉve nʉ lʉhongesio mʉ moojo ghiinu.
17 Sooni sino mujova,
nambe kuvomba,
mʉvombaghe sooni mʉ lɨtavua lya Mʉtwa ʉYesu,
na kʉkʉmhongesia ʉNgʉlʉve ʉNhaata vwɨmɨla ʉYesu ʉjuo.
Ʉvʉtavɨke ʉvwa mikalɨle gha vɨtɨki
18 Ʉmue mwe vadala,
mʉvisaghe vakʉndi kʉ vaghoosi viinu.
Ʉluo lwe lʉno lʉnoghiile kʉ vavɨngɨlɨli va Mʉtwa.
19 Na jʉmue mwe vaghoosi,
mʉvaghanaghe avadala viinu,
namʉngavisaghe vakali kʉ veene.
20 Na jʉmue mwe vaana,
mʉvisaghe vakʉndi kʉ vapaafi viinu mʉ sooni,
ʉlwakʉva ʉluo lʉkʉmhovosia ʉMʉtwa.
21 Na jʉmue mwe vapaafi,
namʉngavakalasyaghe avaana viinu,
kuuti valeke pidenyeka inhumbula.
22 Na jʉmue mwe vakami,
mʉvisaghe vakʉndi kʉ vatwa viinu mʉ sooni.
Namʉngavombaghe ɨlya pamaaso neke mʉvoneke mʉnoghiile,
looli mʉvisaghe vakʉndi kuhʉma nkate mʉ moojo ghiinu,
vwɨmɨla kʉkʉmwoghopa ʉMʉtwa ʉYesu.
23 Sooni sino muvomba,
mʉvombaghe nʉ mwojo ʉmʼbalafu.
Mʉvombaghe mʉlwa kʉmʼbombela ʉMʉtwa,
namʉngavombaghe hwene mʉkʉmʼbombela ʉmuunhu.
24 Mʉkagʉlaghe kuuti ʉMʉtwa ilikʉvapeela ʉlʉvonolo lʉno avavɨkiile mwe vaanhu vaake,
ʉlwakʉva ʉKɨlɨsite ghwe Mʉtwa jʉno mʉkʉmʼbombela.
25 Neke jʉno ivomba ʉvʉhosi,
ilihombua kulɨngʼhana nʉ vʉhosi vʉno avombile,
ʉlwakʉva ʉNgʉlʉve nailola pa maaso.