2
Nilonda mʉkagʉle vʉle nighimba fiijo vwɨmɨla kʉkʉvatanga ʉmue na vaanhu ava mʉ lɨkaaja ɨlya Laodikia,
na vange vooni vano navaghelile kutangʼhana nuune.
2 Nivomba ʉluo kʉkʉvakangasia amoojo ghaave na kuuva vʉmo mʉ lʉghano.
Kange,
vavisaghe nʉ vʉkagʉsi vʉno vʉkʉvapeela ʉvwakyangʼhaani.
Pe vakagʉle ʉvʉsyefu vwa Ngʉlʉve,
kwekʉti vankagʉle ʉKɨlɨsite jʉjuo.
3 ɄKɨlɨsite ʉjuo nkate mwa mwene mwe muno mwevʉle ʉvʉmofu vwa lʉhala nʉ vʉkagʉsi.
4 Nɨkʉvavʉʉla ɨlɨsio ɨlɨ kuuti ʉmuunhu naangavasyangaghe na masio agha vʉdesi,
nambe ghivoneka kuuti manono fiijo.
5 Nambe nɨlɨ patali numue kɨmʼbɨlɨ,
ʉmwojo ghwango ghʉlɨ palɨkɨmo numue.
Nihovoka,
ʉlwakʉva mukukala mʉ vʉtavɨke ʉvʉnono na kusindamala mʉ lwɨtɨko lwinu lʉno mʉlɨ nalwo mwa Kɨlɨsite.
Kukukala mwa Kɨlɨsite
6 Lɨno,
ʉlwakʉva mʉmwʉpiile ʉYesu Kɨlɨsite,
kuuva Mʉtwa ghwinu,
mʉjighaghe mukukala mwa mwene.
7 Mʉsindamale nkate mwa mwene,
mwɨmaghe vʉnono mʉ lwɨtɨko ndavʉle mʉlyavʉlanɨsivue.
Kange,
mʉmhongesyaghe fiijo ʉNgʉlʉve.
8 Mʉvisaghe maaso,
ʉmuunhu ghweni naangavasofyaghe nʉ vʉkagʉsi vwake ʉvwa vʉsyangi,
vʉno nyiiho sa vaanhu ni mbʉlanɨsio sa mhepo imbiivi sino sitema ɨɨsi.
Isio nambʉlanɨsio sa Kɨlɨsite.
9 Namʉngasyangwaghe,
ʉlwakʉva ʉvʉkwɨlanɨfu vwoni ʉvwa Ngʉlʉve vʉlɨ mʉ mʼbɨlɨ ghwa Kɨlɨsite.
10 Ʉmue mwʉpiile ʉvwʉmi ʉvʉkwɨlanɨfu mʉlwa kuuva mwa mwene.
ɄKɨlɨsite mʼbaha kukila imhepo isio imbiivi nʉ vʉtavʉlɨlua vwoni.
11 Mwa Kɨlɨsite mʉvombilue ɨkɨvʉngo mʉlwa kʉpokua mʉ vʉnoghelua vwa mʼbɨlɨ,
nalʉlɨ ndavʉle kuvombelua na vaanhu ɨkɨvʉngo ɨkya kʉdumula ɨngola ɨja kɨdɨɨmi.a
12 Ʉlwakʉva ye mwofughue,
mʉlyasyɨlilue palɨkɨmo nʉ mwene,
kange mʉlyasyʉsivue palɨkɨmo nʉ mwene,
mʉlwa kwɨtɨka ingʉfu sa Ngʉlʉve jʉno alyansyʉsisie kuhʉma kʉ vafue.
13 Ʉlʉtasi ʉmue mʉlyale vafue vwɨmɨla ʉvʉhosi vwinu,
na pano namʉlyale mʉ lʉfingo lwa Ngʉlʉve.
Neke lɨno,
ʉNgʉlʉve avapeliile ʉvwʉmi palɨkɨmo nʉ Kɨlɨsite.
Atʉpyaniile inyɨvi siitu sooni,
14 atʉhombiile sino twasighilwagha vwɨmɨla inyɨvi siitu,
mʉlwa kʉkomelelua ʉKɨlɨsite pa kɨkovekano.
15 Pa kɨkovekano apuo ʉKɨlɨsite alyakunyile ʉvʉtwa nʉ vʉtavʉlɨlua vwa mhepo imbiivi.
Akasilefia na kʉkʉsisʉsia imhepo isio pa vʉvalafu.
16 Lɨno,
ʉmuunhu naangavahɨghaghe vwɨmɨla fino mulia,
nambe fino munyua,
nambe kugadɨlɨla ifikulukulu ifya mwesi ʉmpia,
nambe ɨSabati.b
17 Isio sooni mwɨghɨɨghɨ ghwa sino silikwisa.
Neke ʉvwakyangʼhaani ʉvwa sooni ghwe Kɨlɨsite jʉjuo.
18 Namʉngɨtɨkaghe kuhɨghua nʉ muunhu ghweni jʉno ikuvɨɨka nya lujisio kange ɨkʉvɨmɨka avanyamhola.
Ʉmuunhu ndavʉle ʉjuo ikuvona kuuti amasaaghe ghaake manofu,
ikughinia vʉvʉle vwɨmɨla amasaaghe ghaake jʉjuo.
19 Ʉmuunhu ʉjuo iiva ibaghwile jʉjuo kwa Kɨlɨsite jʉno ghwe mutu ghwa mʼbɨlɨ,
kwekʉti ɨkɨpʉgha ɨkya vɨtɨki.
Kuhʉma kwa Kɨlɨsite ɨkɨpʉgha kyoni ɨkya vɨtɨki kikwʉpɨla ɨkyakʉlia na kulʉnganɨsɨvua ingʼhole ni filʉngo ifya mʼbɨlɨ ghwoni,
fikʉla ndavʉle ilonda ʉNgʉlʉve.
20 Ʉmue mʉlyafwile palɨkɨmo nʉ Kɨlɨsite,
mʉlyavangilue kuhʉma mʉ ngʉfu isa mhepo imbiivi sino sitemile mʉ ɨɨsi muno.
Lɨno,
kɨki muvɨkile mʉ vʉtavʉlɨlua vwa mhepo isio hwene vaanhu va mʉ ɨɨsi muno?
21 Ndavʉle,
“Namʉngakolaghe ɨkɨ,
namʉngavonjaghe ɨkɨ,
namʉngabasyaghe ɨkɨ!”
22 Sooni isio ndaghɨlo ni mbʉlanɨsio sa vaanhu,
silʉngɨka vwɨmɨla ifiinu fino fingalɨvue na kunywevua,
finangɨka.
23 Lweli avaanhu vano vivɨngɨlɨla isio vivoneka hwene vanya lʉhala,
mʉlwa kʉvɨɨka ʉvʉtavɨke ʉvwa kʉmwɨmɨka ʉNgʉlʉve mʉ vughane vwave,
kuuva nʉ lujisio ʉlwa vʉkedʉsi,
kʉkʉghahonga amavɨlɨ ghaave kʉ ngʉfu.
Neke inyiiho isio nasitanga lʉmonga kusigha ʉvʉnoghelua vwa mʼbɨlɨ.