Ɨkalata ɨja Paulo kʉ
Vakolosai
Ʉlʉhʉngɨlo
1
Ʉne ne Paulo,
ne nsungʼhua ghwa Yesu Kɨlɨsite mʉ vughane vwa Ngʉlʉve,
palɨkɨmo nʉ mwɨtɨki ʉnʼjiitu ʉTimoti,
2 tʉkʉvalembela ʉmue mwe vɨtɨki vajiitu,
mwe vɨmɨke,
mwe vano mʉkʉmwɨtɨka vʉnofu ʉYesu Kɨlɨsite,
mwe vano mukukala mʉ lɨkaaja ɨlya Kolosai.
Ʉlʉsʉngʉ nʉ lʉtengaano kuhʉma kwa Ngʉlʉve ʉNhaata ghwitu,
fivisaghe numue.
Ʉlʉhongesio ni nyifuunyo isa Paulo
3 Ifighono fyoni pano tʉkʉvasʉmɨla ʉmue,
tʉkʉmhongesia ʉNgʉlʉve,
ʉNhaata ghwa Mʉtwa ghwitu ʉYesu Kɨlɨsite.
4 Tuvomba ʉluo,
ʉlwakʉva tʉpʉliike imhola siinu vwɨmɨla ʉlwɨtɨko lwinu mwa Yesu Kɨlɨsite nʉ lʉghano lwinu kʉ vɨmɨke vooni.
5 Ʉlwɨtɨko nʉ lʉghano lwinu fihʉmile mʉ lʉhʉvɨɨlo ʉlwa vwʉmi lʉno ʉNgʉlʉve avavɨkiile kʉkyanya.
Ɨmhola ɨja lʉhʉvɨɨlo ʉluo mʉlyapʉliike kuhʉma ʉlʉtasi ye mupʉlɨsɨvua ɨmhola ɨja kyangʼhaani,
kwekʉti ɨMhola ɨNofu.
6 ƗMhola ɨNofu ɨjio,
jɨno jɨlyapʉlɨsivue kʉlyʉmue,
jɨkwɨliine mʉ ɨɨsi sooni.
ƗMhola ɨjio jɨvavangile avaanhu ndavʉle jɨlyavavangile ʉmue,
kuhʉma ɨkɨghono kɨno mʉlyapʉliike ɨMhola ɨjio,
na kukagʉla ʉvwakyangʼhaani ʉvwa lʉsʉngʉ lwa Ngʉlʉve.
7 ƗMhola ɨjio mʉlyavʉlanɨsivue nʉ Epafula,
ʉmʼbombi ʉnʼjiitu ʉmʉghanɨke,
mʼbombi nnofu ghwa Kɨlɨsite,
kange ɨkʉtʉtanga ʉsue mʉlwa kʉvavʉlanɨsia ʉmue.
8 Ʉmwene ghwe jʉno atʉvʉlile imhola isa lʉghano lwinu,
lʉno mʉpelilue nʉ Mhepo ʉMwɨmɨke.
9 Mʉ ʉluo,
na jʉsue kuhʉma ɨkɨghono ye tupʉlɨka imhola siinu,
natukatala kʉkʉvasʉmɨla kwa Ngʉlʉve.
Tʉkʉvasʉmɨla kuuti,
avatange kukagʉla ʉvughane vwake na kʉkʉvapeela ʉvʉkagʉsi nʉ lʉhala lʉno luhʉma kwa Mhepo ghwake.
10 Tʉkʉvasʉmɨla ʉluo,
kuuti mʉvisaghe nʉ lʉveelo lʉno lʉnoghiile pamaaso gha Mʉtwa ʉYesu na kʉkʉmhovosia mʉ sooni.
Apuo pe muvombagha imbombo inofu si nyinga na kughendelela kʉkʉnkagʉla ʉNgʉlʉve.
11 Tʉkʉvasʉmɨla kuuti,
ʉNgʉlʉve avatangaghe mʉ ngʉfu saake inya vʉvaha,
neke mʉʉve nʉ lugudo palɨkɨmo nʉ vʉkifu mʉ mhumuko siinu sooni,
kange mʉvisaghe nʉ lʉkeelo.
12 Kange,
mʉmhongesyaghe ʉNhaata,
jʉno avavɨkile mʉnoghele kukwʉpɨla sino alyavalaghile avɨtɨki,
kwekʉti vano vikukala mʉ lʉmuli.
13 Ʉmwene alyatʉpokile kuhʉma mʉ ngʉfu sa ngʼhiisi,
akatʉhamia na kʉkʉtwingisia mʉ Vʉtwa vwa Mwanaake ʉmʉghanɨke.
14 Mwa Mwanaake ʉjuo,
tʉvangilue,
kwekʉti tʉpyanilue inyɨvi siitu.
Ʉvʉvaha ʉvwa Mwana ghwa Ngʉlʉve
15 ɄMwanaake kɨhwani kya Ngʉlʉve jʉno naivoneka,
ʉmwene ghwe nya vʉtavʉlɨlua
kʉ fiinu fyoni fino fipelilue.a
16 Kukilila ʉmwene,
ʉNgʉlʉve alyapelile ifiinu fyoni,
fino fili kʉkyanya na fino fili pa ɨɨsi.
Alyapelile ifiinu fino fivoneka na fino nafivoneka,
vʉʉve vwe vʉtwa nambe ʉvʉvaha,
vaave vano vitema nambe avanya vʉtavʉlɨlua.
ɄNgʉlʉve alyapelile ifiinu fyoni kukilila ʉmwene,
kange vwɨmɨla ʉmwene.
17 ɄMwanaake ʉjuo kwealyale ifiinu fyoni ye fikyale kupelua,
kange ifiinu fyoni fili mʉ vʉtavɨke mʉ ngʉfu saake.
18 Ʉmwene ghwe mʼbaha,
ilongosia ɨkɨpʉgha ɨkya vɨtɨki,
ndavʉle ʉmutu vʉle ghulongosia ʉmʼbɨlɨ.
Ʉmwene ghwe kɨvʉmbʉko kya vwʉmi,
ghwe ghwa kwanda kusyʉka kuhʉma kʉ vafue,
kuuti aave mʼbaha ghwa fyoni.
19 Ʉlwakʉva ʉNgʉlʉve alyakeliile kuuti,
ʉvʉkwɨlanɨfu vwake vwoni vʉʉve mwa Mwanaake.
20 Kange,
vwɨmɨla ʉmwene,
ʉNgʉlʉve alisambinie ni fiinu fyoni,
alyavɨkile ʉlʉtengaano ni fiinu fino fili kʉkyanya
na fino fili pa ɨɨsi,
vwɨmɨla ɨdanda ɨja Mwanaake
jɨno jɨlyakungʼiike pa kɨkovekano.
21 Na jʉmue ʉlʉtasi mʉlyale patali nʉ Ngʉlʉve,
kange mʉlyale valʉgʉ vaake,
vwɨmɨla amasaaghe ni mbombo siinu imbiivi.
22 Neke lɨno ʉNgʉlʉve avasambinie nʉ mwene jʉjuo vwɨmɨla ʉmʼbɨlɨ ʉghwa Mwanaake,
kwekʉti kufua pa kɨkovekano.
Avombile ʉluo kuuti avavɨɨke vagholofu,
vasila nkole nambe kupɨkua mʉ lʉmonga pamaaso ghaake.
23 Luuva enendɨɨkɨ nave mufikangala na kujigha kuuva ni ngʉfu mʉ lwɨtɨko.
Mʉlekaghe kukwɨtɨka kʉkʉlʉleka ʉlʉhʉvɨɨlo lʉno mʉlyʉpiile ye mʉpʉliike ɨMhola ɨNofu.
ƗMhola ɨNofu ɨjio,
jɨpʉlɨsivue kʉ vaanhu vooni ava mʉ ɨɨsi,
na jʉʉne ne Paulo nɨlɨ mʼbombi ghwa kʉpʉlɨsia ɨMhola ɨjio.
Ɨmbombo ɨja Paulo mʉ fipʉgha ifya vɨtɨki
24 Lɨno,
nihovoka vʉle nipumuka pa ɨɨsi apa vwɨmɨla ʉmue,
ʉlwakʉva pano nipumuka niiva mʉ vʉhangɨlanɨsi vwa mhumuko sa Kɨlɨsite vwɨmɨla ʉmʼbɨlɨ ghwake,
ghʉno kye kɨpʉgha kya vɨtɨki.
25 Ʉne nɨlɨ mʼbombi ghwa kɨpʉgha ɨkio,
nɨpelilue ɨmbombo ɨjio nʉ Ngʉlʉve vwɨmɨla ʉmue.
Ɨmbombo ɨjio je ja kʉpʉlɨsia ɨlɨsio lyake mʉ vʉkwɨlanɨfu.
26 Ɨlɨsio ɨlio,
lɨlyavɨkilue kʉ vʉsyefu kuhʉma mʼbʉkʉʉlʉ.
Neke lɨno ahʉfisie kʉ vaanhu vaake.
27 ɄNgʉlʉve alondagha kʉkʉvahʉfia avaanhu ʉvʉvaha nʉ vʉmofu ʉvwa vʉsyefu ʉvuo vʉno alyavombile kʉ vaanhu vano naVayahudi.
Ʉvʉsyefu ʉvuo,
kwekʉti ʉKɨlɨsite alɨ nkate mʉlyʉmue.
Ʉmwene ghwe jʉno ɨkʉtʉpeela ʉlʉhʉvɨɨlo kuuti tweni tulikwʉpɨla ʉvʉvaha vwa Ngʉlʉve.
28 Mʉ ʉluo,
tʉkʉmpʉlɨsia ʉKɨlɨsite kʉ vaanhu vooni,
tupavɨla na kuvʉlanɨsia avaanhu vooni mʉ vʉkagʉsi vwoni.
Tuvomba ʉluo,
kuuti tʉvaleete vooni pamaaso gha Ngʉlʉve kuuva vakwɨlanɨfu mʉlwa kuuva mwa Kɨlɨsite.
29 Vwɨmɨla ʉluo nighimba kuvomba ɨmbombo mʉ ngʉfu sa Kɨlɨsite sino sivomba ɨmbombo nkate mʉlyʉne.