Ɨkalata ɨja Paulo kʉ
Vakolosai
Ɨmhola ɨndongosi
Ɨkalata ɨjɨ alyalembile ʉnsungʼhua ʉPaulo. Alyavalembiile avɨtɨki ava mʉ lɨkaaja ɨlya Kolosai. Ɨlɨkaaja ɨlɨ lɨlyale ʉlʉbale ʉlwa kʉvʉseemo mʉ ɨɨsi jɨno ifighono ifi jitambʉlua Vʉtuluki. Ʉnsungʼhua ʉPaulo naalyavaghendiile avɨtɨki ava mʉ lɨkaaja ɨlio, ʉlwene alyavalembiile ɨkalata ɨjɨ, ʉlwakʉva alyapʉliike kuuti kwevale avavʉlanɨsi va vʉdesi mʉ kɨpʉgha kya vɨtɨki. Avavʉlanɨsi avuo valyale vivʉlanɨsia kuuti avɨtɨki vilondua kuvɨngɨlɨla inyiiho isa Vayahudi, ndavʉle kuvombelua ɨkɨvʉngo ɨkya kʉdumula ɨngola ɨja kɨdɨɨmi na kʉkʉvɨmɨka avanyamhola. Vangavombaghe isio ʉNgʉlʉve ɨkʉvʉpɨla kuuva vaanhu vaake.
Lɨno, ʉPaulo ilemba ɨkalata ɨjɨ kʉvakʉmbʉsia avɨtɨki kuuti, kufua kwa Kɨlɨsite kwe kʉno kʉvapokile. Ɨkʉvavʉʉla kuuti ʉKɨlɨsite alɨ kʉkyanya, ghwe nya vʉtavʉlɨlua kʉ vanyamhola vooni ni fiinu fyoni fino kwefili. Fye nambe vilondua kʉkʉmwɨmɨka ʉKɨlɨsite mwene. Kange, ɨkʉvakʉmbʉsia kuuti, ʉlʉveelo lwave lʉhʉfyaghe kuuti aveene vasalʉlua va Ngʉlʉve.