4
Lɨno vanyalʉkolo vango vaghanɨke,
nɨsyʉkilue kutangʼhana numue.
Ʉmue mwemue mʉkʉmhelela nɨhovoke,
kange vwɨmɨla ɨmbombo jɨno nɨvombile kʉlyʉmue nilikwʉpɨla ɨngeela.
Enendɨɨkɨ vaghanɨke vango,
mʉkangalaghe mwa Mʉtwa.
Amasio agha kʉkangasia
2 Nɨkʉkʉsʉʉma ʉve Eodia nuuve Sintike mʉpʉlɨngʼhanaghe,
ʉlwakʉva ʉmue mweni mʉlɨ vavɨngɨlɨli va Mʉtwa.
3 Na jʉʉve ghwe mʼbombi nʼjango ghwe nnofu,
nɨkʉkʉsʉʉma ʉvatange avakɨjʉʉva avuo,
ʉlwakʉva vaghimbile fiijo kupʉlɨsia ɨMhola ɨNofu palɨkɨmo nuune,
nʉ Kelementi palɨkɨmo na vavomba mbombo avajango avange vooni vano amatavua ghaave,
ghalembilue mʉ kɨtabu ɨkya vwʉmi.
4 Mʉhovokaghe ifighono fyoni,
ʉlwakʉva mʉlɨ mwa Mʉtwa.
Nijova kange niiti,
mʉhovokaghe!
5 Amaghendele ghiinu ghahʉfyaghe ʉvʉkoola vwinu kʉ vaanhu vooni,
ʉlwakʉva ʉMʉtwa ʉYesu alɨ piipi pigomoka.
6 Namʉngavisaghe ni nganighani nambe padebe.
Ʉlwene mʉ sooni mʉnsʉmaghe ʉNgʉlʉve na kʉkʉmhongesia.
Ʉvʉfumbue vwinu mʉmʼbʉlaghe ʉNgʉlʉve.
7 Mʉ ʉluo ʉNgʉlʉve ɨkʉvapeela ʉlʉtengaano ʉlʉkome kukila vʉle vikʉlʉtangʼhania avaanhu.
Ʉlʉtengaano ʉluo lʉkʉvapelela mʉleke pikwoghopa nambe kuhangajɨka,
ʉlwakʉva ʉmue mʉlɨ mwa Yesu Kɨlɨsite.
8 Lɨno vanyalʉkolo vango,
mʉsaghaghe isa kyangʼhaani,
mʉsaghaghe sino sinoghiile kukwoghopua,
mʉsaghaghe isa vʉgholofu,
mʉsaghaghe isila vʉlamafu,
mʉsaghaghe isa lʉkeelo,
mʉsaghaghe sino sihovosia,
mʉsaghaghe inono palɨkɨmo na sino sipelela kulʉmbua.
9 Mʉvombaghe sino mʉmanyiile na kukwʉpɨla kuhʉma kʉlyʉne,
sino mʉpʉliike na kʉkʉsivona.
ɄNgʉlʉve jʉno ɨkʉvapeela ʉlʉtengaano,
ivisagha palɨkɨmo numue.
ɄPaulo ihongesia aVafilipi
10 Nɨlɨ nʉ lʉkeelo ʉlʉkome mwa Mʉtwa,
ʉlwakʉva lɨno mʉkʉmbwike kange kʉkʉnhanga.
Nakwekʉti mʉkasyemilue kʉkʉnhanga,
ʉlwene namʉkaale nʉ nsiki ʉghwa kʉvomba ʉluo.
11 Pano nijova ʉluo nakwekʉti naghilue kɨmonga,
jeeje!
Ʉne nɨmanyiile kukwʉpɨla sooni.
12 Nɨmanyiile kukwaghɨlua,
nɨmanyiile kuuva ni fiinu finga.
Nɨmanyiile kukwʉpɨla sooni sino sikʉnyisila,
nɨɨve ni fiinu finga nambe nɨɨve nɨ njala;
nɨɨve mmofu nambe naghɨlue.
13 ɄKɨlɨsite ghwe mwene ɨkʉmheela ingʉfu kukwʉpɨla isio sooni.
14 Nambe fye lʉlɨvuo kʉlyʉne,
mʉkavombile vʉnofu kʉkʉnhanga mʉ lʉpumuko lwango.
15 Ʉmue Vafilipi mʉkagwile jʉmue kuuti,
ye nipʉlɨsia ɨMhola ɨNofu kʉlyʉmue ʉlwa kwanda,
na kuvʉʉka mʉ kɨghavoa kiinu ɨkya Makedonia,
nakwekɨkaale ɨkɨpʉgha ɨkɨngɨ ɨkya vɨtɨki kɨno kyanhangagha.
Looli jʉmue mwe vano mwatavʉlagha na kukwʉpɨla ifiinu kuuti finhange.
16 Nambe ye nɨlɨ kʉ Tesalonike,
kekinga mʉkasungʼhile ʉlʉtango mʉ fino naghilue.
17 Nakwekʉti ʉne nilonda pi pikwʉpɨla ifiinu kuhʉma kʉlyʉmue,
jeeje!
Ʉlwene nilonda mwʉpɨle inyifuunyo kuhʉma kwa Ngʉlʉve vwɨmɨla ʉvʉpeesi vwinu.
18 Lɨno,
nʉpiile ifiinu fyoni fino mʉkasungʼhile nʉ Epafulodito.
Ifiinu ifio finga fiijo.
Ʉlʉtango ʉluo lʉhwene lɨtekelo ɨlɨnya lʉnuusi ʉlʉnono,
lɨno lɨnoghiile kwa Ngʉlʉve,
likwʉpɨlua na kʉkʉmhovosia ʉmwene.
19 Lɨno,
mwa Yesu Kɨlɨsite,
ʉNgʉlʉve ghwango ɨkʉvapeela ifiinu fyoni fino mulonda kuuva nafyo kulɨngʼhana nʉ vʉmofu vʉno vʉlɨ mʉ vʉvaha vwake.
20 ɄNgʉlʉve ʉNhaata ghwitu aghinwaghe ifighono fyoni.
Ameni.
Amasio agha vʉsililo
21 Mʉvahʉngɨlaghe avaanhu vooni vano vikʉmwɨtɨka ʉYesu Kɨlɨsite.
Avanyalʉkolo vano valɨ palɨkɨmo nuune vikʉvahʉngɨla.
22 Avɨtɨki vooni,
fiijo vano valɨ mʉ nyumba ɨja Kaisali,b
vikʉvahʉngɨla.
23 Ʉlʉsʉngʉ ʉlwa Mʉtwa ghwitu ʉYesu Kɨlɨsite lʉvisaghe numue.