Ʉvʉgholofu ʉvwa kyangʼhaani
3
Lɨno,
vanyalʉkolo vango,
mʉhovokaghe ʉlwakʉva mʉlɨ mwa Mʉtwa!
Nanikatala kʉkʉvalembela amasio ghala ghala ghano nɨkavalembiile ʉlʉtasi,
ʉlwakʉva amasio aghuo ghikʉvatanga kukwɨma vʉnono mʉ lwɨtɨko.
2 Mʉvisaghe maaso na vahosi,
vano vahwene mbua,
visimilisia ʉlwiho ʉlwa kʉvombelua ɨkɨvʉngo ɨkya kʉdumula ɨngola ɨja kɨdɨɨmi.a
3 Ʉsue,
twesue tʉvombilue ɨkɨvʉngo ɨkya kyangʼhaani,
ʉlwakʉva tʉkʉmwɨmɨka ʉNgʉlʉve mʉlwa kʉlongosivua nʉ Mhepo ghwake na kukughinia ʉlwakʉva tʉlɨ mwa Yesu Kɨlɨsite.
Ʉsue natuvɨɨka ʉlʉhʉvɨɨlo lwitu mʉ fiinu fya mʼbɨlɨ,
4 nambe nɨnoghiile kuvomba ʉluo!
Nave kwale ʉmuunhu jʉno isaagha kuuti anoghiile kuvɨɨka ʉlʉhʉvɨɨlo mʉ fiinu fya mʼbɨlɨ,
ʉne nɨnoghiile kukila.
5 Ʉne nɨlyavombilue ɨkɨvʉngo ɨkya kʉdumulua ɨngola ɨja kɨdɨɨmi ye nɨlɨ ni fighono lekelakwoni kuhʉma niholua,
ʉne nɨlɨ Mʉisilaeli,
nɨlɨ ghwa kɨsina ɨkya Benyamini,
kange nɨlɨ Mʉebulania ghwa kyangʼhaani.
Vwɨmɨla kuvɨngɨlɨla indaghɨlo isa Moose,
nɨkavɨngɨlɨlagha vʉnono,
ʉlwakʉva nɨlyale Mfalisayi.b
6 Nave kye kɨvavɨlɨsi kya mbombo ja Ngʉlʉve,
nɨlyale nighimba fiijo kupumusia ɨkɨpʉgha ɨkya vɨtɨki,
ʉlwakʉva nɨkasaghagha kuuti,
kuvomba ʉluo kwe kʉmhovosia ʉNgʉlʉve.
Kange,
vwɨmɨla ʉvʉgholofu mʉlwa kʉvɨngɨlɨla indaghɨlo,
ʉne nɨlyale nsila nkole nambe ghʉmo.
7 Neke sooni sino silyale sivoneka nya lʉvʉmbʉlɨlo kʉlyʉne,
lɨno nɨvwene sila lʉvʉmbʉlɨlo vwɨmɨla ʉYesu Kɨlɨsite.
8 Kyangʼhaani,
isio sooni nɨvwene sila lʉvʉmbʉlɨlo pano nilɨngʼhania nʉ lʉvʉmbʉlɨlo ʉlʉvaha ʉlwa kʉnkagʉla ʉYesu Kɨlɨsite,
ʉMʉtwa ghwango.
Vwɨmɨla ʉmwene,
nɨlamwile kʉkʉsileka sooni.
Kʉlyʉne isio sooni sihwene makakala neke nɨvʉmbʉlɨle kuuva nʉ Kɨlɨsite,
9 nɨɨve mwa mwene.
Ʉne nanivalɨlua ʉvʉgholofu vwɨmɨla kuvɨngɨlɨla indaghɨlo,
looli mʉlwa kʉmwɨtɨka ʉKɨlɨsite.
Ʉvʉ vwe vʉgholofu vʉno vuhʉma kwa Ngʉlʉve,
kange ipelua ʉmuunhu jʉno ɨkʉmwɨtɨka.
10 Ɨkɨɨnu kɨno nilonda ʉne kwe kʉkʉnkagʉla ʉKɨlɨsite,
na kukagʉla ingʉfu sino silyansyʉsisie ʉmwene.
Nilonda kupumuka ndavʉle alyapumwike ʉmwene,
kange nilonda kufua ndavʉle alyafwile ʉmwene,
11 kuuti ʉNgʉlʉve akasyʉsie na jʉʉne kuhʉma kʉ vafue.
Kughimba kuhanga kufika kʉvʉsililo
12 Nakwekʉti niiti nɨmalile ʉlʉghendo mʉ lwɨtɨko,
nambe kuuti nɨlɨ mʉgholofu lwoni,
jeeje!
Ʉlwene nighimba kuhanga nʉpɨle ʉlʉvonolo lʉno vwɨmɨla ʉluo ʉYesu Kɨlɨsite asalwile ʉne kuuti nɨɨve ghwake.
13 Vanyalʉkolo vango,
ʉne nanisaagha kuuti nʉpiile ʉlʉvonolo ʉluo,
ʉlwene nivomba lɨmo,
nɨkʉghasyemua ghooni ghano ghakilile na kutʉngʉmalɨla ghano ghalɨ kʉvʉlongolo.
14 Lɨno,
nighimba kuhanga nʉpɨle ʉlʉvonolo ʉlwa vwʉmi kʉkyanya,
lʉno ʉNgʉlʉve alyatʉkemeliile kukilila ʉYesu Kɨlɨsite.
15 Ʉsue tweni twe vano tʉkangiile mʉ lwɨtɨko,
tʉvisaghe nʉ vʉfumbue ʉvuo.
Neke nave pakate palyʉmue vamonga visaagha sino nasilɨngʼhiine niisi,
ʉNgʉlʉve ɨkʉvahʉfia mʉsikagʉle.
16 Lɨno,
ɨkɨvaha kye ɨkɨ,
tʉnoghiile kuvɨngɨlɨla sila sila sino ʉNgʉlʉve atʉhʉfisie.
Avalʉgʉ ava kɨkovekano kya Kɨlɨsite
17 Vanyalʉkolo vango,
mweni mwɨghaghe kʉlyʉne.
Kange,
mʉmanyɨlaghe kʉ vaanhu vano vivɨngɨlɨla ɨkɨhwanɨkɨsio kɨno tʉvahʉfisie.
18 Ʉlwakʉva kekinga nɨvavʉlile ɨmhola ɨjɨ,
lɨno nɨkʉvavʉʉla kange na misosi,
kuuti kwevale avaanhu vinga vano amikalɨle ghaave ghivonia kuuti,
vikaana ɨmhola ɨja vʉpoki ʉvwa Kɨlɨsite pa kɨkovekano.
19 Avaanhu avuo ʉngʉlʉve ghwave lye lɨleme,
vikughinia vwɨmɨla imbombo saave sino vivomba inya soni.
Kange,
amasaaghe ghaave visaagha fi fiinu ifya pa ɨɨsi apa.
Ʉvʉsililo vwa vaanhu avuo,
kwe kʉtipulua.
20 Neke ʉsue ʉvukalo vwitu vʉlɨ kʉkyanya,
tʉkʉmʉghuula nʉ vʉsyʉkue ʉvʉkome ʉMpoki ʉMʉtwa ghwitu,
ʉYesu Kɨlɨsite,
iise kuhʉma kʉkyanya.
21 Ʉmwene alɨ ni ngʉfu isa kʉvɨɨka ifiinu fyoni mʉ vʉtavʉlɨlua vwake.
Mʉ ngʉfu isio ilihambʉsia amavɨlɨ ghiitu agha,
amajovejoove kuuti ghahwanane nʉ mʼbɨlɨ ghwake ʉmʉnya vʉvaha.