Kuuva nʉ lujisio ndavʉle ʉYesu
2
Lɨno,
ʉlwakʉva mʉkangasivue mwa Kɨlɨsite,
ʉlʉghano lwake lʉvanyamisie,
mʉlɨ vʉhangɨlanɨsi nʉ Mhepo ʉMwɨmɨke,
kange mʉkyaghile ɨkɨsa nʉ lʉsʉngʉ lwa Yesu Kɨlɨsite,
2 nɨkʉvasʉʉma mʉmhelele nɨhovoke fiijo mʉlwa ʉmue kuuva na mapʉlɨngʼhano,
kughanana na kuuva nʉ mwojo ghʉmo.
3 Namʉngavombaghe lʉmonga mʉlwa kwilana nambe kuuva nʉ lughinio,
looli mujisyaghe,
nʉjʉnge amʼbonaghe ʉnnine kuuti anoghiile kukila ʉmwene.
4 Ʉmuunhu ghweni naangasaghaghe lʉlwa mwene,
looli asaghaghe nʉ lwa vange.
5 Mʉvisaghe na masaaghe amanono ndavʉle alyale nagho ʉYesu Kɨlɨsite:
6 Ʉmwene kuhʉma mʼbʉkʉʉlʉ alyalɨngʼhiine nʉ Ngʉlʉve.
Neke nambe alyalɨngʼhiine nʉ Ngʉlʉve,
alyavwene nalʉnono kujigha akoleliile ʉluo.
7 Looli ʉmwene akalʉleka ʉluo lwoni,
akijisia,
akava hwene nkami.
Akaholua ndavʉle avaanhu,
akava muunhu.
8 Akijisia,
akava nkʉndi kwa Ngʉlʉve kuhanga kufua,
kufua mʉlwa kʉkomelelua pa kɨkovekano!
9 Mʉ ʉluo ʉNgʉlʉve akamʉghinia fiijo,
akampeela ɨlɨtavua ɨlɨvaha kukila amatavua ghooni,
10 kuuti vwɨmɨla ʉvʉvaha ʉvwa lɨtavua lya Yesu,
ifipelua fyoni kʉkyanya,
pa ɨɨsi na kʉvʉlʉngʉ,a
fifughamaghe pamaaso ghaake.
11 Kange,
ʉmuunhu ghweni ɨtɨkaghe kuuti,
ʉYesu Kɨlɨsite ghwe Mʉtwa.
Mʉ ʉluo iiva ɨkʉmʉghinia ʉNgʉlʉve ʉNhaata.
Kuuva lʉmuli
12 Lɨno vaghanɨke vango,
ndavʉle mʉlyale vakʉndi ifighono fyoni ye nɨlɨ palɨkɨmo numue,
nambe ʉnsiki ʉghʉ pano nɨlɨ kʉtali numue mʉghinaghe kuvomba sino sihʉfia ʉvʉpoki vwinu.
Mʉvombaghe isio nʉ vwoghofi na kutetema.
13 Mʉvombaghe enendɨɨkɨ,
ʉlwakʉva ʉNgʉlʉve ghwe mwene ivomba ɨmbombo nkate mʉlyʉmue,
na kʉkʉvapeela ʉvʉsyʉkue ni ngʉfu isa kʉvomba imbombo sino ikeela ʉmwene sivombeke.
14 Mʉvombaghe sooni kɨsila kʉngʼuula nambe kukanɨngʼhana,
15 neke mʉʉve vaana va Ngʉlʉve,
vagholofu,
vasila nkole mʉ kɨsina ɨkɨ ɨkɨhosi,
ɨkɨnya nyiiho imbiivi.
Mʉnoghiile kuuva lʉmuli pakate pa vaanhu ndavʉle inhondue vʉle simulika kʉkyanya.
16 Mʉgadɨlɨlaghe ɨlɨsio ɨlya Ngʉlʉve lɨno lileeta ʉvwʉmi.
Apuo na jʉʉne pe niliiva nɨ kya kughinia ɨkɨghono kɨla ɨkya kʉgomoka ʉKɨlɨsite,
ʉlwakʉva lulivoneka pa vʉvalafu kuuti,
ʉlʉghimbo lwango nɨ mbombo jango nafilʉtile vʉvʉle.
17 Ʉlʉpumuko lwinu vwɨmɨla ʉlwɨtɨko kwa Ngʉlʉve lɨtekelo lɨno likwʉpɨlua nʉ mwene.
Nambe ʉlʉpumuko na kufua kwango kʉghelekue pa lɨtekelo ɨlio,
niiva nʉ lʉkeelo vwɨmɨla ʉlwɨtɨko lwinu,
kange nihovoka palɨkɨmo numue.
18 Enendɨɨkɨ na jʉmue mʉhovokaghe,
kange mʉhovokaghe palɨkɨmo nuune.
ɄTimoti nʉ Epafulodito
19 Nihʉvɨɨla kuuti ʉMʉtwa ʉYesu angakeele,
nɨkʉnsuungʼha kʉlyʉmue ʉTimoti ifighono ndafilɨngi fino fikwisa,
neke angʼhangasie ʉmwojo vwɨmɨla imhola inofu sino ilikwisa naso kuhʉma kʉlyʉmue.
20 Nijova ʉluo,
ʉlwakʉva nɨlɨ nsila muunhu ʉjʉnge jʉno ndepoonu ɨkʉvavɨkɨla mwojo ndavʉle ʉTimoti.
21 Kwekʉti,
avange vooni vitʉngʉmala ni mbombo saave,
navivɨkɨla mwojo ɨmbombo ɨja Yesu Kɨlɨsite.
22 Ʉmue mʉkagwile vʉle ʉTimoti avoniike muunhu nnofu.
Avombile ɨmbombo ɨja kʉpʉlɨsia ɨMhola ɨNofu palɨkɨmo nuune,
ndavʉle ʉmwana vʉle ivomba nʉ viise.
23 Nihʉvɨɨla kʉkʉnsuungʼha ʉTimoti kʉlyʉmue pano kyanɨkagwile sino kyande sikʉnyaagha vwɨmɨla kudindilua mʉ ndinde.
24 Nɨkʉmhʉvɨɨla ʉMʉtwa ʉYesu kuuti ɨkʉnhanga,
na jʉʉne niise ngʼhaningʼhaani kʉlyʉmue.
25 Neke lɨno nɨvwene lʉnono taasi nɨntavʉle ʉnyalʉkolo ghwitu ʉEpafulodito jʉno mʉkansungʼhile kuuti iise anhange fino nɨkaghilue.
Ʉmwene ʉjʉ ivomba ɨmbombo palɨkɨmo nuune,
kange mʉlua lɨlʉgʉ palɨkɨmo nuune vwɨmɨla ɨMhola ɨNofu.
26 Nɨntavwile ʉlwakʉva asyʉkilue kutangʼhana numue,
kange ipumuka mʉ mwojo ghwake vwɨmɨla ʉmue,
ʉlwakʉva mʉkapʉliike kuuti akaale ntamu.
27 Lweli akaale ntamu fiijo,
ghʉkaale ghukova,
neke ʉNgʉlʉve ansʉngʉkɨla,
ansosia.
Nakwekʉti ansʉngʉkɨla jʉjuo mwene,
looli asʉngʉkɨla na jʉʉne kuuti nɨleke pikwongelesivua ʉlʉsukunalo pa ʉlʉ lʉno nɨlɨ nalwo.
28 Mʉ ʉluo nɨkʉnsuungʼha ngʼhaningʼhaani kʉlyʉmue kuuti kyande mʉmwaghile,
mʉhovoke,
na jʉʉne ʉmwojo ghwango ghʉnyamale.
29 Lɨno,
mʉmwambɨlɨlaghe nʉ lʉkeelo lwoni mwa Mʉtwa ʉYesu.
Avaanhu vano valɨ ndavʉle ʉjʉ mʉvoghopaghe,
30 ʉlwakʉva akitavwile kuhanga alondagha pifua vwɨmɨla ɨmbombo ɨja Kɨlɨsite.
Akuluka kufua vwɨmɨla kʉkʉndetela ʉlʉtango lwinu,
ʉlwakʉva nakyale kiiva kɨhʉʉgʉ ʉmue mweni kʉkʉndetela.