Ɨkalata ɨja Paulo kʉ
Vafilipi
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Paulo nʉ Timoti,
twe vavombi va Yesu Kɨlɨsite.
Tʉkʉvalembela ʉmue mweni mwe vano mʉkʉmwɨtɨka ʉYesu Kɨlɨsite,
mwe vano mukukala mʉ lɨkaaja ɨlya Filipi,
palɨkɨmo na valoleleli na vatangɨli va kɨpʉgha ɨkya vɨtɨki.
2 Ʉlʉsʉngʉ nʉ lʉtengaano kuhʉma kwa Ngʉlʉve ʉNhaata ghwitu,
na kwa Mʉtwa ʉYesu Kɨlɨsite,
fivisaghe numue.
ɄPaulo ɨkʉvasʉmɨla aVafilipi
3 Jaatu pano nɨkʉvakʉmbʉka ʉmue,
nɨkʉmhongesia ʉNgʉlʉve ghwango.
4 Kange,
jaatu pano nɨkʉvasʉmɨla ʉmue mweni kwa Ngʉlʉve,
nɨkʉvasʉmɨla nʉ lʉkeelo,
5 ʉlwakʉva ʉmue mʉlɨ palɨkɨmo nuune kuvomba ɨmbombo ɨja kʉpʉlɨsia ɨMhola ɨNofu,
kuhʉma ɨkɨghono ɨkya kwanda ye mukwʉpɨla ɨMhola ɨjio kuhanga kufika lɨno.
6 Nɨkagwile vʉnofu kuuti,
ʉNgʉlʉve jʉno akatengwile kuvomba ɨmbombo ɨnofu ɨjɨ mʉ moojo ghiinu,
ifivombagha ʉluo kuhanga ikwɨlanɨsia mʉ kɨghono kɨla ɨkya kʉgomoka ʉYesu Kɨlɨsite.
7 Nɨnoghiile kusaagha ʉluo vwɨmɨla ʉmue mweni,
ʉlwakʉva nɨvaghanile fiijo.
ɄNgʉlʉve mʉ lʉsʉngʉ lwake avatangile ʉmue palɨkɨmo nuune kuvomba ɨmbombo ɨja kwoleka na kuhʉfia ʉvwakyangʼhaani ʉvwa Mhola ɨNofu,
pano nɨlɨ mʉ ndinde,
na pano nanɨlɨ mʉ ndinde.
8 ɄNgʉlʉve akagwile vʉle nɨvasyʉkilue fiijo ʉmue mweni,
mʉ lʉghano ʉlʉhʉma kwa Yesu Kɨlɨsite.
9 Kɨno nɨkʉvasʉmɨla kwa Ngʉlʉve kye ɨkɨ:
Ʉlʉghano lwinu lʉfikwongelelaghe fiijo,
mʉ vʉkagʉsi na mʉ vʉlamʉsi ʉvwa kyangʼhaani,
10 kuuti mʉsitangʼhaniaghe sino sinoghiile.
Mʉ ʉluo muuva vagholofu,
kange vasila nkole kuhanga kufika ɨkɨghono kɨla ɨkya kʉgomoka ʉKɨlɨsite.
11 Mʉ vwʉmi vwinu muvombagha isa vʉgholofu mʉ ngʉfu sa Yesu Kɨlɨsite,
kuuti avaanhu vamʉghiniaghe na kʉkʉmʉlʉmba ʉNgʉlʉve.
Imhumuko sa Paulo sitangile kukwɨsia ɨMhola ɨNofu
12 Lɨno vanyalʉkolo vango,
nilonda mʉkagʉle kuuti imhumuko sino sinyaghile,
sitangile fiijo kukwɨsia ɨMhola ɨNofu.
13 Lolagha,
avasikali vooni ava nyumba ɨja ntwa palɨkɨmo na vange vooni,
vakagwile kuuti ʉne nɨdindilue mʉ ndinde vwɨmɨla kʉkʉmʼbombela ʉKɨlɨsite.
14 Kange,
vwɨmɨla ʉne kudindilua mʉ ndinde,
avɨtɨki vinga vakangiile mwa Mʉtwa ʉYesu,
vipʉlɨsia ɨlɨsio lya Ngʉlʉve kɨsila vwoghofi.
15 Kwevale avaanhu vamonga vipʉlɨsia imhola isa Kɨlɨsite,
ʉlwakʉva valɨ nɨ kɨvini na mabaatu.
Neke kwevale avange vano vipʉlɨsia nʉ mwojo ʉmʼbalafu.
16 Avaanhu vano vipʉlɨsia nʉ mwojo ʉmʼbalafu,
vilongosivua nʉ lʉghano,
ʉlwakʉva vakagwile kuuti,
ʉNgʉlʉve asalwile ʉne kuvomba ɨmbombo ɨja kwoleka ɨMhola ɨNofu.
17 Avange avuo vipʉlɨsia imhola isa Kɨlɨsite mʉlwa kwilana,
navipʉlɨsia nʉ mwojo ʉmʼbalafu,
ʉlwakʉva visaagha kuuti kuvomba ʉluo,
vikwongelesia ʉlʉpumuko lwango mʉ ndinde.
18 Neke ʉluo nalʉtalamu!
Avaanhu vapʉlɨsyaghe imhola sa Kɨlɨsite nʉ mwojo ʉmʼbalafu nambe vapʉlɨsyaghe mʉ vʉkedʉsi,
ɨkɨvaha ʉKɨlɨsite ipʉlɨsɨvua.
Ʉluo lwe lʉno lʉkʉhovosia.
Kange nifihovokagha,
19 ʉlwakʉva nɨkagwile kuuti,
vwɨmɨla inyifuunyo siinu nʉ lʉtango kuhʉma kwa Mhepo ghwa Yesu Kɨlɨsite,
nikwavʉka.
20 Nihʉvɨɨla fiijo kuuti,
ndalʉve ndaani nakwekɨlɨ kɨno kyande kɨkʉmhelela nɨpele isoni mʉ mbombo jango.
Looli kutengʉlɨla lɨno ni fighono fyoni,
nɨkʉmʉghiniagha ʉKɨlɨsite mʉ ngʉfu sango sooni.
Nivombagha ʉluo mʉ vwʉmi vwango vwoni,
nɨɨve mwʉmi nambe nɨfue.
21 Kʉlyʉne nave nɨjighe mwʉmi nɨkʉmʼbombela ʉKɨlɨsite,
nave nɨfue niiva nʉ lʉvʉmbʉlɨlo ʉlʉkome.
22 Neke nave ʉne kujigha mwʉmi kʉkʉmhelela kuvomba ɨmbombo ɨnya lʉvʉmbʉlɨlo ʉlʉkome mʉ mbombo ja Kɨlɨsite,
apuo nanɨkagwile nɨsalʉle lʉlɨku!
23 Nɨlɨ pakate pa nongua ivɨlɨ isio.
Nɨlɨ nʉ vʉsyʉkue kʉkʉvʉleka ʉvwʉmi ʉvʉ,
nɨlʉte kukukala nʉ Kɨlɨsite.
Kʉlyʉne ɨlio lye lɨnono kukila.
24 Neke vwɨmɨla kʉkʉvatanga ʉmue,
lʉnono fiijo nɨjighe mʉ vwʉmi ʉvʉ.
25 Ʉlwakʉva nɨlʉtangʼhinie ʉluo,
nɨkagwile nijigha mwʉmi,
nifikukalagha numue kuuti nɨvatange mʉkʉle na kuuva nʉ lʉkeelo mʉ lwɨtɨko.
26 Mʉ ʉluo niliiva nisile kange mulikughinia fiijo,
ʉlwakʉva ʉYesu Kɨlɨsite anhangile nɨgomoke kʉlyʉmue.
27 Lɨno,
ɨkɨvaha kye ɨkɨ:
Amaghendele ghiinu ghavisaghe ndavʉle jilʉngɨka ɨMhola ɨNofu ɨja Kɨlɨsite.
Mʉ ʉluo,
niise kʉlyʉmue,
nambe nɨleke pikwisa,
nɨpʉlɨkaghe kuuti mufikangala nʉ mwojo ghʉmo,
kange mʉlɨ vʉmo kusigha avalʉgʉ vano visofia ʉvwakyangʼhaani vwɨmɨla ʉlwɨtɨko lwinu,
lʉno luhʉma mʉ Mhola ɨNofu.
28 Namʉngoghopaghe avalʉgʉ viinu nambe padebe.
Ɨkio kiiva kye kɨvalɨlo ɨkya kʉvahʉfia aveene kuuti vitapitipulua,
neke kʉlyʉmue kɨvalɨlo kya kʉvahʉfia kuuti mutapipokua.
ɄNgʉlʉve ghwe mwene ivomba isi.
29 Ʉlwakʉva ʉNgʉlʉve naavatangile kʉkʉmwɨtɨka ʉKɨlɨsite kwene,
looli palɨkɨmo na kupumusivua vwɨmɨla ʉmwene.
30 Lɨno,
ɨmbombo jɨno muvomba ɨja kʉsigha avalʉgʉ vano visofia ʉvwakyangʼhaani,
je mbombo jɨno mʉkanyaghile nilua najo.
Nambe lɨno mʉpʉliike kuuti nɨjiighe nilua najo.