Ɨkalata ɨja vʉvɨlɨ ɨja Paulo kʉ
Vatesalonike
Ɨmhola ɨndongosi
Ɨkalata ɨjɨ alyalembile ʉnsungʼhua ʉPaulo kʉ vɨtɨki ava kʉ Tesalonike. Alyalembile ye ghakilile ameesi ndaghalɨngi kuhʉma ɨkʉvalembela ɨkalata ɨja kwanda. Mʉ kalata ɨjɨ, ɨkʉvakangasia avɨtɨki kusindamala mʉ lwɨtɨko nambe valɨ mʉ mhumuko. Luvoneka avaanhu vamonga valyale viiti, ʉKɨlɨsite isile kange mʉ ɨɨsi, nambe kuuti alɨ piipi fiijo kukwisa, mʉ ʉluo vavʉhɨɨle kuvomba ɨmbombo. Pe ʉPaulo ɨkʉvapavɨla avɨtɨki kuuti navangavɨtɨkaghe avaanhu avuo, kange navangavisaghe voolo. Ɨkʉvavʉʉla kuuti kukwisa kwa Kɨlɨsite silitala taasi kuvoneka imhumuko imbaha mʉ ɨɨsi. Kange, ilikwisa taasi ʉmʉlongosi ʉmʼbiivi fiijo jʉno ilikʉvalongosia avaanhu kuuva vagalʉsi kwa Ngʉlʉve.