Ɨkalata ɨja vʉvɨlɨ ɨja Paulo kʉ
Vatesalonike
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Paulo.
Ʉne palɨkɨmo nʉ Silwanoa nʉ Timoti,
tʉkʉvahʉngɨla ʉmue mwe kɨpʉgha kya vɨtɨki,
kɨno kɨlɨ mʉ lɨkaaja ɨlya Tesalonike,
mwe vaanhu va Ngʉlʉve ʉNhaata ghwitu nʉ Mʉtwa ʉYesu Kɨlɨsite.
2 Ʉlʉsʉngʉ nʉ lʉtengaano kuhʉma kwa Ngʉlʉve ʉNhaata ghwitu,
na kwa Mʉtwa ʉYesu Kɨlɨsite fivisaghe numue.
Ʉvʉhɨghi vwa Ngʉlʉve ɨkɨghono ɨkya vʉsililo
3 Vanyalʉkolo viitu,
tʉnoghiile kʉkʉmhongesia ʉNgʉlʉve ifighono fyoni vwɨmɨla ʉmue.
Tʉnoghiile kuvomba ʉluo,
ʉlwakʉva ʉlwɨtɨko lwinu na kughanana kwinu kukwongelela fiijo.
4 Fye nambe ʉsue tukughinia vwɨmɨla ʉmue,
pano tʉlɨ mʉ fipʉgha ifingi ifya vɨtɨki va Ngʉlʉve.
Tukughinia vwɨmɨla ʉlugudo nʉ lwɨtɨko lwinu lʉno mʉlɨ nalwo mʉ mhumuko sooni sino sikʉvisila.
5 Isio sihʉfia kuuti,
ʉvʉhɨghi vwa Ngʉlʉve vwa kyangʼhaani.
Mʉ vʉhɨghi ʉvuo ilikʉvapeela kunoghela kukwingila mʉ Vʉtwa vwake,
ʉVʉtwa vʉno vʉkʉvapelela kupumusivua.
6 Ʉlwakʉva ʉNgʉlʉve ihɨghɨla mʉ vwakyangʼhaani:
Ʉmwene ilikʉvapeela ʉlʉpumuko vano vikʉvapumusia ʉmue,
7 kange ʉmue mwe vano mupumusivua,
ilikʉvapeela ʉvwavʉke palɨkɨmo nusue.
Isio silivombeka pano ʉMʉtwa ʉYesu,
alaava ikwisa kuhʉma kʉkyanya palɨkɨmo na vanyamhola vaake avanya ngʉfu.
8 Ilikwisa mʉ lʉlape lwa mwoto.
Ʉlʉkwegho lwa Ngʉlʉve lulikʉvaagha vooni vano visiita kʉkʉnkagʉla ʉmwene,
kange navikʉnda ɨMhola ɨNofu ɨja Mʉtwa ghwitu ʉYesu.
9 Avuo lulikʉvaagha ʉlʉtipulo ʉlwa kʉvʉsila kʉsila,
na kuvʉsɨvua pamaaso gha Mʉtwa,
nʉ vʉvaha vwake ʉvʉnya ngʉfu.
10 Isi silivombeka ɨkɨghono kɨla,
pano ʉMʉtwa igomoka kughinisivua na vaanhu vaake vooni vano vikʉmwɨtɨka.
Na jʉmue muliiva palɨkɨmo na veene,
ʉlwakʉva mʉkɨtiike ʉvwolesi vʉno tʉkavavʉlile vwɨmɨla ʉmwene.
ɄPaulo ɨkʉvasʉmɨla aVatesalonike
11 Lɨno,
tʉkʉvasʉmɨla jaatu kwa Ngʉlʉve ghwitu,
kuuti avatange mʉnoghele kukukala ndavʉle ɨngʼhemeelo jaake vʉle jiiti.
Tusʉʉma kuuti mʉ ngʉfu saake,
avatange mʉvombe ʉvʉfumbue vwinu vwoni ʉvwa kʉvomba inofu,
palɨkɨmo ni mbombo isa lwɨtɨko lwinu.
12 Tusʉʉma enendɨɨkɨ,
kuuti ɨlɨtavua lya Mʉtwa ghwitu ʉYesu lɨghinisivwaghe vwɨmɨla sino avombile kʉlyʉmue,
na jʉmue mughinisivwagha vwɨmɨla ʉmwene.
Isi sivombekagha vwɨmɨla ʉlʉsʉngʉ lwa Ngʉlʉve ghwitu,
nʉ lwa Mʉtwa ʉYesu Kɨlɨsite.