Kukulɨngʼhania vwɨmɨla kukwisa kwa Mʉtwa
5
Vanyalʉkolo viitu,
natʉlɨ nʉ vʉfumbue ʉvwa kʉvalembela,
vwɨmɨla ʉnsiki ʉghwa kwisa ʉMʉtwa.
2 Ʉlwakʉva ʉmue mʉkagwile kuuti ɨkɨghono ɨkya kwisa ʉMʉtwa,
luliiva mʉ ngʼhenyemʉkɨla ndavʉle ʉmʉlyasi vʉle ikwisa pakɨlo.
3 Avaanhu viliiva vijova viiti,
“Tʉlɨ nʉ lʉtengaano,
kange tʉlɨ mʉ vwavʉke,”
apuo pepano ʉvʉtipulua vʉkʉvisila mʉ ngʼhenyemʉkɨla,
ndavʉle ʉvʉvafi ʉvwa kʉpaapa vʉle vʉkʉmwisila ʉmʉkɨjʉʉva ʉnya vʉkunue.
Mʉ ʉluo navilikuluka nambe padebe.
4 Looli ʉmue mwe vɨtɨki vajiitu,
ɨkɨghono ɨkio nalʉliiva mʉ ngʼhenyemʉkɨla ndavʉle ʉmʉlyasi vʉle ikwisa,
ʉlwakʉva namʉlɨ mʉ ngʼhiisi.
5 Ʉmue mweni mʉlɨ vaana va lʉmuli,
vaana va pamwisi.
Ʉsue twe vɨtɨki,
natʉlɨ vaanhu va pakɨlo,
nambe va ngʼhiisi.
6 Lɨno,
tʉlekaghe piiva ndavʉle avange vano vighonelela,
looli tʉvisaghe maaso na kukulolelela.
7 Ʉlwakʉva vano vighonelela,
vighona pakɨlo.
Na vano vighaala,
vighaala pakɨlo.
8 Neke ʉsue twe vaanhu va lʉmuli,
tulolelelaghe.
Tʉvisaghe nʉ lwɨtɨko,
nʉ lʉghano,
ndavʉle ʉnsikali vʉle ifwala ɨkya kʉsigha ɨkɨfuva kyake.
Kange,
tʉvisaghe vaanhu vano vihʉvɨɨla ʉvʉpoki,
ndavʉle ʉnsikali vʉle ifwala ɨkofili ɨja kyʉma kʉ mutu.a
9 Ʉlwakʉva ʉNgʉlʉve naalyatʉsalwile,
kuuti atʉtipule nɨ ngʼhalaasi jaake,
looli alyafumbilue kuuti tʉkave ʉvʉpoki vwɨmɨla ʉMʉtwa ghwitu ʉYesu Kɨlɨsite,
10 jʉno alyafwile vwɨmɨla ʉsue,
kuuti tʉvisaghe palɨkɨmo nʉ mwene,
tʉʉve vʉʉmi nambe tʉʉve tʉfwile.
11 Lɨno,
mʉnyamasaniaghe na kukangasania ndavʉle muvomba.
Amaghendele ghano ghanoghiile mʉ kɨpʉgha kya vɨtɨki
12 Lɨno vanyalʉkolo viitu,
tʉkʉvasʉʉma mʉvakagʉlaghe vʉnofu vano vivomba ɨmbombo kʉkʉvatanga ʉmue,
vano vikʉvalongosia mwa Mʉtwa na kʉkʉvapavɨla.
13 Mʉvapʉlɨkaghe fiijo na kʉkʉvaghana vwɨmɨla ɨmbombo jaave.
Kange,
mukalaghe nʉ lʉtengaano.
14 Vanyalʉkolo viitu,
tʉkʉvasʉʉma mʉvapavɨlaghe avoolo,
mʉvakangasyaghe vano vadendevwike,
mʉvatangaghe avasila ngʉfu.
Kange,
mʉvisaghe vanya lugudo kʉ vaanhu vooni.
15 Mʉlolaghe vʉnono kuuti,
ʉmuunhu ghweni naivangɨla kwa nnine.
Looli ifighono fyoni mʉghimbaghe kʉvombelanɨla inofu jʉmue kwa jʉmue na kʉ vaanhu vooni.
16 Mʉvisaghe nʉ lʉkeelo ifighono fyoni.
17 Kange,
mufunyaghe kwa Ngʉlʉve ifighono fyoni,
18 mʉmhongesyaghe ʉNgʉlʉve mʉ sooni,
ʉlwakʉva isio se sino ʉmwene ilonda mʉvombaghe mwa Yesu Kɨlɨsite.
19 Mʉlekaghe kʉkʉnkaana ʉMhepo ʉMwɨmɨke.
20 Kange,
namʉngapuniaghe ʉvʉvɨli,
21 looli mʉghelaghe sooni.
Mʉgadɨlɨlaghe inofu,
22 na kʉkʉvʉleka ʉvʉviivi vwoni.
23 ɄNgʉlʉve jʉjuo jʉno ɨkʉtʉpeela ʉlʉtengaano,
avavalasie lwoni.
Avadɨmaghe amoojo ghiinu,
ʉvwʉmi vwinu,
na mavɨlɨ ghiinu,
kuuti mʉleke kuuva nʉ vʉhosi,
kuhanga pano alaava ikwisa ʉMʉtwa ghwitu ʉYesu Kɨlɨsite.
24 ɄNgʉlʉve jʉno ɨkʉvakemeela,
ɨkʉvavombela isio,
ʉlwakʉva ʉmwene ghwa kyangʼhaani.
Amasio agha kʉhwesia
25 Vanyalʉkolo viitu,
na jʉsue mʉtʉfunyilaghe kwa Ngʉlʉve.
26 Mʉhʉngɨlanaghe mwe vɨtɨki vooni nɨ saavo ɨnya lʉghano mwa Yesu Kɨlɨsite.
27 Nɨkʉvasʉʉma mʉ lɨtavua lya Yesu Kɨlɨsite kuuti,
ɨkalata ɨjɨ mʉvɨmbɨlaghe avɨtɨki avajiitu vooni.
28 Ʉlʉsʉngʉ ʉlwa Mʉtwa ghwitu ʉYesu Kɨlɨsite,
lʉvisaghe numue.