Kukukala mʉ sɨla jɨno ikeela ʉNgʉlʉve
4
Lɨno vanyalʉkolo viitu,
mʉmanyiile kuhʉma kʉlyʉsue vʉle lʉnoghiile kukukala ndavʉle ikeela ʉNgʉlʉve.
Enendɨɨkɨ fye mukukala,
lɨno,
tʉkʉvasʉʉma mʉ lɨtavua lya Mʉtwa ʉYesu mʉvombaghe vʉle vʉle na kukila.
2 Ʉlwakʉva mʉkagwile vʉnono indaghɨlo sino tʉkavapeliile mʉ lɨtavua lya Mʉtwa ʉYesu.
3 ɄNgʉlʉve ilonda mʉvisaghe vagholofu,
na kʉkʉvʉleka lwoni ʉvʉghendamwalu.
4 Avaanhu vooni vavisaghe vanya kʉghalolelela amavɨlɨ ghaave,
mʉ vwɨmɨke na mʉ vwoghofi.
5 Valekaghe kuvɨngɨlɨla ʉvʉnoghelua vwa mʼbɨlɨ,
ndavʉle vivomba vano navɨtɨki,
avaanhu vano navankagwile ʉNgʉlʉve.
6 Mʉ ʉluo,
ʉmuunhu ghweni naangamhokaghe ʉmwɨtɨki ʉnʼjaake,
nambe kʉkʉmfumba.
Ndavʉle tʉkavavʉlile na kʉkʉvapavɨla kuuti,
vooni vano vivomba isio lulikʉvavona ʉlʉkwegho ʉlwa Mʉtwa ʉNgʉlʉve.
7 Ʉlwakʉva ʉNgʉlʉve naakatʉkemeliile kuvwafuka,
looli akatʉkemelile kuuti tukalaghe mʉ vʉgholofu.
8 Lɨno,
ʉmuunhu ghweni jʉno isiita imbʉlanɨsio isi,
naɨkʉnsiita ʉmuunhu,
looli iiva ɨkʉnsiita ʉNgʉlʉve,
ʉjuo ghwe mwene ɨkʉvapeela ʉMhepo ghwake ʉMwɨmɨke.
9 Lɨno,
natʉlɨ nʉ vʉfumbue ʉvwa kʉvalembela ʉmue ɨmhola ɨja kʉghanana,
ʉlwakʉva mʉvʉlanɨsivue nʉ Ngʉlʉve jʉjuo,
ndavʉle mʉnoghiile kughanana.
10 Lweli se seene muvomba,
mʉvaghanile avɨtɨki avajiinu,
mʉ ɨɨsi jooni ɨja Makedonia.
Vanyalʉkolo viitu,
lɨno tʉkʉvasʉʉma mʉghinaghe kughanana.
11 Mʉvisaghe vaanhu va kukala nʉ lʉtengaano,
nʉjʉnge alolaghe isa mwene na kuvomba jʉjuo imbombo saake.
Isi se sino tʉkavalaghiile kuuti mʉvombaghe.
12 Apuo muuva muhʉfia ʉlʉveelo ʉlʉnono pamaaso gha vano navɨtɨki,
kange muvisagha vaanhu vano navihʉvɨɨla ifya vange.
Sino silihʉmɨla alaava ikwisa ʉMʉtwa
13 Vanyalʉkolo,
tulonda mʉkagʉle sino silihʉmɨla kʉ vɨtɨki vano vafwile,
kuuti mʉlekaghe kuuva nʉ lʉsukunalo ndavʉle avange avasila lʉhʉvɨɨlo.
14 Ʉsue,
tʉkagwile kuuti ʉYesu alyafwile,
kange alyasyʉkile.
Mʉ ʉluo tuhʉvɨɨla kuuti,
ʉNgʉlʉve ilikʉvaleeta palɨkɨmo nʉ Yesu avaanhu vooni vano vafwile mʉ lwɨtɨko.
15 Isi sino tʉkʉvavʉʉla,
mbʉlanɨsio sa Mʉtwa ʉYesu kuuti,
ʉsue twe vano tuliiva vʉʉmi pano alaava igomoka ʉMʉtwa,
natulikʉvalongolela vano vafwile.
16 Ʉlwakʉva ʉMʉtwa jʉjuo ilikwika kuhʉma kʉkyanya nɨ ngʼhemeelo,
ɨlɨsio lya nyamhola ʉmʼbaha lilipʉlɨkɨka,
nalʉ lʉkelemo ʉlwa Ngʉlʉve lulipʉlɨkɨka.
Neke vano valyafwile vikʉmwɨtɨka ʉKɨlɨsite,
vilisyʉsɨvua taasi.
17 Pe ʉsue,
twe vano tʉjiighe vʉʉmi,
palɨkɨmo na vano vasyʉsivue,
tulitolua mʉ mafunde kʉkʉmwambɨlɨla ʉMʉtwa kʉ mpalanga.
Pe tukukalagha palɨkɨmo nʉ Mʉtwa ifighono fyoni.
18 Lɨno,
mʉnyamasaniaghe na masio aghuo.