ɄTimoti isungʼhua kʉ Tesalonike
3
Pambele twakunua kukiva,
ʉlwakʉva natʉkakagwile sino sivombeka ʉkuo.
Pe twalamʉla kuuti,
yekʉba tʉjighe jʉsue kʉ Atene.
2 Pe twansuungʼha ʉTimoti ʉnyalʉkolo ghwitu,
jʉno ivomba ɨmbombo ɨja Ngʉlʉve palɨkɨmo nusue,
ɨmbombo ɨja kʉpʉlɨsia ɨMhola ɨNofu ɨja Kɨlɨsite,
kuuti iise kʉkʉvakangasia mʉ lwɨtɨko lwinu.
3 Twavomba ʉluo,
kuuti ʉmuunhu ghweni alekaghe kudendevʉka vwɨmɨla imhumuko isi.
Ʉmue mʉkagwile kuuti,
tʉlɨ vaanhu va kʉkilila imhumuko.
4 Ʉlwakʉva ye tʉlɨ numue,
tʉkaale tʉkʉvavʉʉla kuuti tulipumusivua,
lɨno ndavʉle mʉkagwile,
fye silivuo.
5 Fye nambe ʉnsiki ghʉla ye nɨkunilue kukiva,
nɨkansuungʼha ʉTimoti,
kuuti nɨkagʉle imhola isa lwɨtɨko lwinu.
Navomba ʉluo,
ʉlwakʉva nasaghagha kuuti,
pamo ʉSetano ʉmʉgheli,
avaghelile na kʉkʉvaghwɨsia.
Neke ɨmbombo jiitu jɨno tʉkavombile kʉlyʉmue,
pe jiiva sila lʉvʉmbʉlɨlo.
Imhola inofu isa Vatesalonike
6 Lɨno,
ʉTimoti isile kuhʉma kʉlyʉmue,
atʉvʉlile imhola inofu vwɨmɨla ʉlwɨtɨko nʉ lʉghano lwinu.
Atʉvʉlile kuuti jaatu mʉkʉtʉkʉmbʉka nʉ lʉkeelo,
kange mʉlɨ nʉ vʉsyʉkue kutangʼhana nusue,
ndavʉle na jʉsue vʉle tʉlɨ nʉ vʉsyʉkue kutangʼhana numue.
7 Lɨno vanyalʉkolo viitu,
imhola isa lwɨtɨko lwinu,
sitʉkangisie mʉ mhumuko siitu sooni.
8 Pano tuvona ʉmue mukangala mwa Mʉtwa,
ʉsue tukupʉlɨka vavʉke mʉ vwʉmi vwitu.
9 Ndepoonu tʉkʉmhongesia ndaani ʉNgʉlʉve vwɨmɨla ʉmue?
Ʉlwakʉva tʉlɨ nʉ lʉkeelo ʉlʉkome pamaaso gha Ngʉlʉve vwɨmɨla ʉmue.
10 Pakɨlo na pamwisi tʉkʉnsʉʉma fiijo ʉNgʉlʉve,
kuuti atʉtange twise kange kʉlyʉmue,
neke tʉvatange sino sipelile mʉ lwɨtɨko lwinu.
11 Lɨno,
tʉkʉnsʉʉma ʉNgʉlʉve ʉNhaata ghwitu jʉjuo,
nʉ Yesu ʉMʉtwa ghwitu,
atʉdindulile ɨsɨla tʉfike kʉlyʉmue.
12 ɄMʉtwa avapeele kughanana fiijo,
na kʉkʉvaghana avange vooni,
ndavʉle ʉsue vʉle tʉvaghanile ʉmue.
13 Kange,
avakangasyaghe amoojo ghiinu,
kuuti mʉvisaghe vɨmɨke,
kɨsila nkole pamaaso gha Ngʉlʉve ʉNhaata ghwitu,
alaava ikwisa ʉMʉtwa ghwitu ʉYesu palɨkɨmo na vɨmɨke vaake vooni.