Ɨmbombo ja Paulo kʉ Tesalonike
2
Vanyalʉkolo,
mʉkagwile jʉmue kuuti kukwisa ʉsue kʉlyʉmue,
kʉkaale nʉ lʉvʉmbʉlɨlo ʉlʉkome.
2 Kange mʉkagwile kuuti,
ye tʉkyale kufika kʉlyʉmue,
tʉkapumusivue na kulighua kʉ lɨkaaja lɨla ɨlya Filipi.
Neke ʉNgʉlʉve akatʉpeliile ingʉfu kupʉlɨsia ɨMhola ɨNofu kʉlyʉmue,
napano kʉlyale nʉ vʉlʉgʉ.
3 Ʉnsiki ye tupʉlɨsia kʉlyʉmue,
natʉkafumbilue kujova isa vʉdesi,
nambe kujova imbiivi,
nambe kʉkʉvasyanga.
4 Looli tupʉlɨsia ʉlwakʉva ʉNgʉlʉve ghwe mwene alyalamwile kuuti tʉnoghiile,
fye nambe atʉpeliile ɨmbombo ɨja kʉpʉlɨsia ɨMhola ɨNofu.
Lɨno,
ʉvʉfumbue vwitu,
navwa kʉvahovosia avaanhu,
looli kupʉlɨsia sino ʉNgʉlʉve ikeela,
ʉlwakʉva ghwe jʉno akagwile sooni,
sino sili nkate mʉ moojo ghiitu.
5 Kange mʉkagwile kuuti,
natwajovagha amasio neke mʉtʉghane,
nambe kukufisa mʉ lʉmonga kuuti mwe tʉkavɨle ɨkyʉma.
ɄNgʉlʉve jʉjuo akagwile kuuti sino tujova sa kyangʼhaani.
6 Kange,
natwalondagha avaanhu vatʉpaale,
mʉʉve mwemue,
nambe avange vooni.
7 Ʉlwakʉva ʉsue tʉlɨ vasungʼhua va Kɨlɨsite,
tʉkanoghiile kusighila fimonga kʉlyʉmue,
lɨno natʉkavombile ʉluo.
Looli tʉkaale vakoola kʉlyʉmue ndavʉle ʉmama jʉno isʉnga avaana vaake.
8 Fye lʉlɨvuo,
na jʉsue tʉkavaghanile fiijo,
fye nambe tʉkakeliile kʉkʉvavʉʉla ɨMhola ɨNofu ɨja Ngʉlʉve,
palɨkɨmo na kukutavʉla kuvomba sooni sino sinoghiile kʉkʉvatanga,
ʉlwakʉva mʉlɨ vaghanɨke viitu kyangʼhaani.
9 Vanyalʉkolo!
Mukʉmbʉka vʉle twaghimbagha na kuhangajɨka,
twavombagha ɨmbombo pakɨlo na pamwisi,
kuuti natʉngavisaghe nsigho kwa jʉmonga kʉlyʉmue.
Twavombagha isio kuuti tʉpʉlɨsie kʉlyʉmue ɨMhola ɨNofu ɨja Ngʉlʉve.
10 Ʉmue mʉkagwile,
najʉ Ngʉlʉve akagwile,
kuuti ye tʉlɨ kʉlyʉmue mwe vɨtɨki,
amaghendele ghiitu ghalyale magholofu,
tʉkavɨngɨlɨlagha ʉvwakyangʼhaani,
kange natʉkapɨkwagha mʉ lʉmonga.
11 Kange,
mʉkagwile vʉle twamʼbombelagha ʉmuunhu ghweni,
ndavʉle ʉnhaata vʉle ɨkʉvavombela avaana vaake jʉjuo.
12 Tʉkavakangisie,
tʉkavanyamisie,
na kʉkʉvavʉʉla kuuti,
mʉlekaghe kukatala kuvɨngɨlɨla sino ʉNgʉlʉve ikeela.
ɄNgʉlʉve ʉjuo ghwe mwene ɨkʉvakemeela,
mwingile mʉ Vʉtwa na mʉ vʉvaha vwake.
13 Kange,
tʉkʉmhongesia ʉNgʉlʉve ifighono fyoni,
ʉlwakʉva ye mupʉlɨkɨsia ɨlɨsio lyake kuhʉma kʉlyʉsue,
namʉkʉpiile hwene lɨsio lya muunhu,
looli mʉkʉpiile kuuti lye lɨsio lya Ngʉlʉve kyangʼhaani.
Ɨlɨsio ɨlio lye lɨno livomba ɨmbombo nkate mʉ moojo ghiinu ʉmue mwe vɨtɨki.
14 Vanyalʉkolo viitu,
mʉlyapumusivue na vaanhu ava kʉlyʉmue,
ndavʉle avɨtɨki mwa Yesu Kɨlɨsite ava kʉ Yudea,
vʉle valyapumusivue na Vayahudi avajanave.
15 AVayahudi avuo,
ve veene valyamʼbudile ʉMʉtwa ʉYesu,
valyavabudile avavɨli,
kange ve vano vakatʉpumwisie kyongo na jʉsue.
Avaanhu avuo,
vikʉnkalasia ʉNgʉlʉve,
kange valʉgʉ va vaanhu vooni,
16 vighimba kʉkʉtʉsigha kupʉlɨsia ɨMhola ɨNofu ɨja Yesu Kɨlɨsite kʉ vano naVayahudi,
ɨMhola jɨno jaale jɨkʉvapeela ʉvʉpoki.
AVayahudi avuo vifikwongelesia inyɨvi,
kuhanga ɨngʼhalaasi ja Ngʉlʉve jɨvisiile!
ɄPaulo ilonda pitangʼhana na Vatesalonike
17 Vanyalʉkolo viitu,
avaanhu avuo ye vatʉghimbiile kulekana numue ʉnsiki ghʉla ʉnʼdebe,
tʉkalekiine kɨmʼbɨlɨ,
neke amoojo ghiitu ghakaale palɨkɨmo numue.
Ʉnsiki ghwoni ʉghuo,
tʉkaale nʉ vʉsyʉkue ʉvwa kʉtangʼhana numue.
18 Lɨno,
twalondagha pikwisa kʉlyʉmue,
kyongo ʉne ne Paulo kekinga nalondagha kukwisa,
neke ʉSetano atʉsighagha.
19 Ʉlwakʉva ʉmue mwemue mʉkʉtʉpelela ʉsue kuuva nʉ lʉhʉvɨɨlo,
nʉ lʉkeelo,
na kukughinia pamaaso gha Mʉtwa ghwitu ʉYesu,
alaava ikwisa.
20 Kyangʼhaani,
ʉmue mwemue mʉkʉtʉpelela kuuva nʉ lughinio nʉ lʉkeelo.